¹ प्याराेथियोफिलस, येशू कहन् और सिखान लागो सब बातमे मेरो सुरुकि किताबमे मए लिखो हौ। ² अपनए छाने भए प्रेरितनके येशू पवित्र आत्मासे आज्ञा दैके पिछु बो स्वर्ग उपर चलो गव कुछ दिनतक सब बात जा किताबमे लिखिहए। ³ अपन दु:ख-भोगके पिछु बहुत अग्ठो प्रमाणसे बिनके सामुने बो अपनाएके जिन्दा प्रस्तुत करी। चालिस दिनतक बा बिनके ठिन दिखानो और परमेश्‍वरको राजके बारेमे बिनके बताई। ⁴ बिनके संग खानके बैठो बा बिनके अइसो आढई, “तुम यरुस्लेमसे कहुँ मत जइऔ, पर पिता कहि भइ प्रतिज्ञाको आसरा करीओ जक बारेमे तुम मोसे सुन लै हौ ।” ⁵ काहेकी यूहन्‍ना त पानी से बप्तिस्मा दै, पर अबकी थोरी दिनमे तुमर पवित्र आत्मासे बप्तिस्मा होबैगो ।” ⁶ जहेमारे जब प्रेरित इक्ठ्ठा भए, तव बे बासे पुछीं, “हे प्रभु, का तुम इस्राएल राज्यके फिर से (पुनस्थापन) बनाए देहौ?” ⁷ बा बिनसे कहि, “पिता अपन अधिकारसे तुको भौ दिन और समय जानन तुमरो काम ना हए । ⁸ पर पवित्र आत्मा तुममे अएहए तव तुम शक्ति पए हौ, और तुम यरुशलेममे, सबए यहुदियामे, सामरियामे और पृथ्बीके अन्तिम छोर तक मिर साँची हुइहौ ।” ⁹ ।” बा जा बात कहिके पिच्छु, बे देख्तय देखत् बा उपर चलो गव और बादर मे बा बिनकि आँखी के अग्गु से लोप हुइगव । ¹⁰ जब बे बाके बादरघेन जात एकटक लगाएके देखत रहएँ, तव एकबरि सेतो लत्ता लगाए दुई आदमी बिनके जौने आएके ठाड़ीगए । ¹¹ बे कहिँ, “गालीलके आदमीयों, तुम काहे बादर घेन ठाडे देखत् हौ ? जहे येशू जो तुम मैसे स्वर्गमे लै गव हए, अभए जैसे तुम बाके स्वर्गमे जात देखेहौ, उइसी बा फिर आबैगो ।” ¹² तव बे जैतुन कहान बारो पहडसे यरुशलेम मे घुमे । यरुशलेमसे जा पहड लगभग: एक किलोमिटार दुर पडत् हए । ¹³ सहेर भितरघुसके पिच्छु बे उपरके पणमे अपन बैठन बारो कोनोमे चढे । बे पत्रुस, यूहन्‍ना, याकूब अन्द्रियास, फिलिप और थोमा, बारथोलोमाइ और मत्ती, अल्फयसको लौड़ा याकूब और उग्रपन्थी दलको सिमोन और याकूबको लौड़ा यहूदा रहँए । ¹⁴ गजब बैयर और येशूकी अइया मरियम और बोके भैयानसंग जे सब एक मन हुइके लगातार प्रार्थना करत् रहँए । ¹⁵ बे दिनमे भैयनके बीचमे पत्रुस ठाड़ो {जे आदमीको संख्या लगभग: एक सय बीस रहए}, और कहि, ¹⁶ 16"भैयारेओ, धर्मशास्त्रको वचन पुरा होनके रहए, जौन वचन येशूके पकड्न बारोको अगुवा यहूदाके बारेमे अग्गुयएसे दउदके मुहुसे पवित्र आत्मासे मस्की ।‍बिश्‍वासि ¹⁷ काहेकी बाको गिन्ती हम्रीए संग भव रहए और जहे सेबामे बा हिस्सा पइ रहए । ¹⁸ बा आदमीके अधर्मको कमाइसे एक जामिन मोल लै, और मोडके बल गिरो और बाको भोण फट्के, और बाको सबय आँति-भोण निकरगव । ¹⁹ जहे बात यरुशलेमके सबय बाशिन्दानके पता हुइगव । बा जामिनको नाउँ बे अपने भाषामे आखेल्दामा धरी, औ रगतको खेत। ²⁰ पत्रुस कहि, काहेकी भजनके किताबमे अइसो लिखोहए, 'बाको बैठनबारो ठाउँ उजाड होबए, और हुवाँ बैठन बारो कोइना होबए, और बाको कामको जिम्मेबार दुसरो लेबए ।' ²¹ जहेमारे हमर संगमे रहन बारे आदमी मैसे एक जनी के छानन् जारुरि हए, जौन आदमी प्रभु येशू हमर बीचमे रहिके भितर-बाहिर कर्त सब दिन हमर संग रहए, ²² औ अइसो आदमी जो यूहन्‍नाके बप्तिस्मा से लैके बा हमसे उपर लैजानके दिन तक हमर संग रहए | बा आदमी हम्रे सँग सँगए बाको पुनरुत्थानको साँची होनपडैगो ।” ²³ बिनमैसे दुई जनै, औ बारसाबास कहान बारो योसेफ, जौनको कुलनाउँ युस्तस रहए, और मतियासको नाउँ प्रस्ताव करी । ²⁴ बे अइसे प्रार्थना करीँ, “सब आदमीको ह्रदयको बात जान्‍न बारो प्रभु, जे दुई मैसे तुम कौनके छँटेहौ सो हमके दिखाए देओ, ²⁵ और बा जा सेवा और प्रेरितको काममे घुश पाए, जौन सेवासे यहूदा भड्कके अपन ठाउँमे मरीगव ।” ²⁶ तव बे दुईनके बीचमे चिट्टा डरीँ, और मतियासके नाउँमे पाड़ि गौ, और एघार प्रेरित संग बाको गिन्ती भव ।