¹ Sa ika pito nga bulan sa ika-bayenti uno ka adlaw, ang pulong sa Dios miabot pinaagi sa kamot ni Hageo nga propeta, ug miingon, ² "Sultihi ang gobernador sa Juda, si Zerubabel nga anak ni Shealtiel, ug ang labaw nga pari nga si Josue nga anak ni Jehozadak; ug ang katawhan nga nabilin gikan sa pagkabihag. Sultihi, ³ Kinsa ang nahibilin kaninyo nga nakakita niining balaya sa kanhing himaya niini? Ug unsay pagtan-aw ninyo niini karon? Daw sama sa walay pulos sa inyong mga mata? ⁴ Karon, pagmalig-on, Zerubabel!' — mao kini ang gipamulong sa Dios— 'ug pagmalig-on, Josue nga labaw nga pari nga anak ni Jehozadak; ug pagmalig-on, kamong tanan nga katawhan sa yuta!'—mao kini ang gipamulong sa Dios—'ug pagtrabaho, kay nag-uban ako kaninyo!'—mao kini ang gipamulong sa Dios nga tinubdan sa tanan. ⁵ 'Mao kini ang kasabotan nga akong gihimo uban kaninyo sa paggawas ninyo sa Ehipto, ug ang akong Espiritu mibarog taliwala kaninyo. ayaw kahadlok!' ⁶ Kay miingon niini ang Dios sa mga panon: 'Sa dili madugay tay-ugon ko pag-usab ang mga kalangitan ug ang kalibotan, ang dagat ug ang uga nga yuta! ⁷ Ug pagatay-ugon ko ang matag nasod, ug ang matag nasod magdala sa ilang mga bililhong butang nganhi kanako, ug pagalukopon ko kining balaya sa himaya!' miingon ang Dios sa mga panon. ⁸ 'Ang plata ug bulawan akoa! —mao kini ang gipamulong ang Diosa mga panon. ⁹ 'Ang himaya niining balaya mas labaw pa sa umaabot kaysa kaniadto,' miingon ang Dios sa mga panon, 'ug ihatag ko ang kalinaw niining lugara!'—mao kini ang gipamulong sa Dios sa mga panon." ¹⁰ Sa ika-bayenti kwatro ka adlaw sa ika siyam nga bulan, sa ika duhang tuig ni Darius, miabot ang pulong sa Dios pinaagi kang Hageo nga propeta ug miingon, ¹¹ "Miingon niini ang Dios sa mga panon: 'Pangutan-a ang mga pari mahitungod sa balaod, ug pag-ingon: ¹² Kung ang usa ka tawo nagdala ug karne nga gihalad na ngadto sa Dios nga giputos sa iyang bisti, ug kung ang iyang bisti nasaghid sa tinapay o sa sabaw, bino o lana, o bisan unsa nga pagkaon, kana ba nga pagkaon mabalaan ba usab?"' Mitubag ang mga pari ug miingon, "Dili." ¹³ Unya miingon si Hageo, "Kung adunay tawo nga hugaw tungod kay nakasaghid sa patay, unya nakasaghid sa bisan unsa niining mga halad, "mamahimo na ba usab kining hugaw?" Mitubag ang mga pari ug miingon, "Oo, nahimo na silang hugaw." ¹⁴ Busa mitubag si Hageo ug miingon, '"Busa ingon niini usab ang mga tawo ug kining nasora sa akong atubangan!'—mao kini ang gipamulong sa Dios—'busa mao man usab niining tanan nga ilang gihimo pinaagi sa ilang mga kamot: mahugaw kini nga halad nganhi kanako. ¹⁵ Busa karon, pamalandongi kini sukad karong adlawa, sa wala pa gibutang ang bato sa pikas bahin nga bato sa templo sa Dios, ¹⁶ bisan kinsa ang moadto sa trigohan alang sa bayenti ka kadaghanong sukod sa abot sa trigo,napulo lang ang nakuha, ug bisan kinsa ang moadto sa pugaanan sa bino aron sa pagpuga ug singkwenta ka gidaghanong sukod sa sudlanan sa bino, bayenti lang ang nakuha. ¹⁷ Gikastigo ko kamo ug ang tanan nga gitrabaho sa inyong mga kamot pinaagi sa pagpadunot ug pagpalata sa inyong mga tanom, apan wala gihapon kamo mibalik kanako'—mao kini ang gipamulong sa Dios. ¹⁸ 'Pamalandongi kini sukad karong adlawa, gikan sa ika-bayenti kwatro ka adlaw sa ika siyam nga bulan, gikan sa adlaw nga gitukod ang patukoranan sa templo sa Dios. Pamalandongi kini! ¹⁹ Aduna pa bay binhi nga nahibilin sa bodega? Wala na namunga ang paras, kahoy nga igera, granada, ug ang kahoy nga olibo! Apan gikan karong adlawa panalanginan ko na kamo!"' ²⁰ Unya miabot ang pulong sa Dios sa ika duhang higayon kang Hageo sa ika-bayenti kwatro ka adlaw sa bulan ug miingon, ²¹ "Sultihi ang gobernador sa Juda, si Zerubabel, ug ingna nga, 'pagatay-ugon ko ang kalangitan ug ang kalibotan. ²² Kay pukanon ko ang trono sa mga gingharian ug pagalaglagon ko ang gahom sa mga gingharian sa mga nasod! Baliskaron ko ang mga karwahi ug ang mga nagsakay niini; Ang mga kabayo ug ang matag-usa nga nagkabayo niini mangahulog tungod sa espada sa iyang kaigsoonan. ²³ Niadtong adlawa'—kini ang gipamulong sa Dios sa mga panin—'kuhaon ko ikaw, Zerubabel nga anak ni Shealtiel, ingon nga akong sulugoon'—kini ang gisulti sa Dios. 'Ibutang ko ikaw ingon nga silyo sa akong singsing, kay ikaw ang akong gipili!'—kini ang gipamulongsa Dios sa mga panon!"