¹ Ang nahaunang libro nga akong sinulat, Teofilos,suginli ang tanan nga si Jesus nagsugod pagpamohat ug pagpanudlo, ² hangtod sa adlaw nga gibayaw siya, human siya makahatag ug mga sugo pinaagi sa Espiritu Santo ngadto sa mga apostoles nga iyang gipili. ³ Human sa iyang pag-antos, gipakita niya ang iyang kaugalingon nga buhi ngadto kanila uban ang daghang makdani nga mga pagpamatood. Sulod sa kwarenta ka adlaw nagpakita siya kanila, ug nagsulti siya mahitungod sa gingharian sa Dios. ⁴ Sa dihang nakigtigom siya uban kanila gisugo niya sila nga dili mobiya sa Jerusalem, Apan hulaton ang saad sa Amahan, nga mahitungod niini, miingon siya, "Nadungog ninyo gikan kanako ⁵ nga si Juan sa pagkatinuod nagbawtismo sa tubig apan kamo pagabawtismohan diha sa Balaang Espiritu sa pipila ka mga adlaw." ⁶ Sa nagkatigom na sila gipangutana nila siya, "Ginoo, mao na ba kini ang panahon nga ipasig-uli mo na ang gingharian ngadto sa Israel?" ⁷ Miingon siya kanila, "Gidili kaninyo ang pagkasayod sa takna o sa mga panahon nga gitagal sa Amahan pinaagi sa iyang kaugalingong pagbulot-an. ⁸ Apan magadawat kamo sa gahom, sa dihang ang Balaang Espiritu mokunsad kaninyo, ug kamo magasaksi kanako sa Jerusalem ug sa tibuok Judea ug Samaria, ug sa kinatumyan sa yuta." ⁹ Sa pagsulti ni Ginoong Jesus niining mga butanga, samtang sila naghangad, siya gibayaw paitaas, ug gisalipdan siya sa panganod gikan sa ilang mga mata. ¹⁰ Samtang nagtutok sila pag-ayo sa langit sa iyang pagkayab, sa kalit lang, adunay duha ka tawo nga nagbisti ug puti nga nagtindog uban kanila. ¹¹ Miingon sila, "Kamong mga tawo sa Galilea, nganong nagtindog kamo dinhi nga naghangad sa langit? Kining Jesus nga gibayaw sa langit mobalik sa samang paagi sa pagkakita ninyo kaniya padulong sa langit." ¹² Unya namauli sila sa Jerusalem gikan sa Bukid sa Olibo, nga duol sa Jerusalem, nga may laktonon nga usa ka Adlaw'ng Igpapahulay. ¹³ Sa pag-abot nila, misaka sila sa taas nga lawak, diin sila mag-abotan. Sila mao si Pedro, Juan, Santiago, Andres, Filipe, Tomas, Bartolomeo, Mateo, Santiago nga anak ni Alphaeus, Simon nga Zealot, ug si Judas nga anak ni Santiago. ¹⁴ Silang tanan makugihon sa usa ka tuyo sa pag-ampo, uban ang mga babaye, ug si Maria nga inahan ni Jesus, ug ang iyang mga igsoon mga lalaki. ¹⁵ Niadtong mga adlawa mitindog si Pedro taliwala sa mga kaigsoonan, nga adunay sentobainti ka-tawo, ug miingon, ¹⁶ "Mga kaigsoonan, kinahanglan nga matuman gayod ang kasulatan, nga gisulti sa Balaang Espiritu kaniadto pinaagi sa baba ni David mahitungod kang Judas, nga migiya sa mga nagdakop kang Jesus. ¹⁷ Kay siya kauban man namo ug nagdawat usab sa iyang bahin niining pagpangalagad." ¹⁸ (Karon kining tawhana nagpalit ug uma gikan sa kinitaan sa iyang daotang binuhatan. Unya siya nahulog nga nag-una ang ulo, ug ang lawas niya mibuto, ug ang tanang tinai nahaw-as. ¹⁹ Ang tanang namoyo sa Jerusalem nabati mahitungod niini gitawag kini nga uma sa ilang pinulongan nga Akeldama, nga mao, Ang uma sa dugo.) ²⁰ Kay nahisulat kini sa basahon sa mga Salmo, "Tugoti ang iyang yuta nga mahimong biniyaan, ug ayaw tugoti nga adunay bisan kinsang tawo nga mopuyo didto. tugoti ang laing tawo nga magkuha sa iyang katungdanan sa pagkapangulo. ²¹ Kini gikinahanglan,busa, ang mga tawong gikauban nato sa tanang panahon ang Ginoong Jesus mianhi uban kanato ug mibiya kanato, ²² sugod sa bautismo ni Juan hangtod sa adlaw nga gibayaw siya gikan kanato, mahimong saksi uban kanato sa iyang pagkabanhaw." ²³ Gibutang nila sa unahan ang duha ka tawo, si Jose nga gitawag ug Barsabas kinsa ginganlan usab ug Justo, ug si Matias. ²⁴ sila nag-ampo ug miingon, "Ikaw, Ginoo, nakaila sa mga kasingkasing sa tanang tawo, busa ipadayag kung kinsa niining duha ang imong gipili ²⁵ aron sa pagpuli sa dapit niining pagpangalagad ug pagkaapostol sukad sa paglapas ni Judas aron sa pag-adto sa iyang kaugalingong dapit." ²⁶ Ug nagripa sila kanila; ug ang ripa natunong kang Matias ug giisip siya nga kauban na sa napulo ug usa nga mga apostoles.