¹ Apan hibao-i kini: sa katapusang mga adlaw moabot ang mga peligro nga mga panahon. ² Kay ang mga tawo higugmaon nila ang ilang mga kaugalingon, mahigugmaon sila sa kwarta, hambogero, mapahitas-on, tigpasipala, masinupakon sa mga ginikanan, dili mapasalamaton, dili balaan, ³ wala na ang kinaiya nga pagbati, walay kaluoy, madinauton, walay pagpugong sa kaugalingon, bangis, dili mahigugma-on sa maayo, ⁴ mga traydor, walay pagmatngon, garboso, mahigugma-on sa lawasnon nga kalipay imbes mahigugma-on sa Dios. ⁵ Aduna silay porma nga pagkadiosnon, apan gilimod nila ang gahum niini. Talikdi kini nga mga tao. ⁶ Kay ang uban niining mga tawhana mosulod sa mga panimalay ug danihon ang mga babaye nga luya sa espirituhanong bahin nga napuno sa mga kasal-anan hinungdan nga nadani sila sa lainlaing tinguha. ⁷ Kini nga mga babaye kanunay nga mosulay nga makakat-on ug bag-ong mga butang, apan dili gyud sila makahibalo sa kamatuoran. ⁸ Sa sama nga pamaagi nga si Jannes ug si Jambres mikontra kang Moises, kini nga mga bakakon nga magtutudlo mitindog usab batok sa kamatuoran. Nadaut ang ilang hunahuna ug ang ilang pagtuo dili mapamatud-an. ⁹ Apan dili gayud sila makauswag pag-ayo, kay ang ilang pagkabuang makita man sa tanan, sama sa pagkabuang adtong duha ka mga lalaki. ¹⁰ Apan ikaw misunod sa akong mga pagtulon-an, pamatasan, tumong, pagtuo, taas nga pag-antos, gugma, pailob, ¹¹ mga paglutos, mga pag-antos, ug kung unsa ang nahitabo kanako sa Antioquia, sa Iconio ug sa Listra. Giantos nako kadtong mga paglutos, ug sa tanan niini, ang Ginoo nagluwas kanako. ¹² Ang tanan nga gusto nga magkinabuhi sa diosnon nga pamaagi diha kang Cristo Jesus lutuson gyud. ¹³ Ang mga dautan ug mga impostor mosamot gayud, samtang panguluhan nila ang uban nga masalaag sama nga sila mismo nahisalaag. ¹⁴ Apan ikaw, magpadayon ka sa imong nakat-onan ug gituohan pag-ayo, kay nakahibalo ikaw kung kang kinsa nimo kini nakat-onan. ¹⁵ Nakahibalo ka nga gikan pa sa imong pagkabata nahibaw-an na nimo ang balaan nga mga kasulatan nga naghimo kanimong maalamon sa kaluwasan pinaagi sa pagtuo diha kang Cristo Jesus. ¹⁶ Ang tanan nga Kasulatan dinasig sa Dios ug kini mapuslanon sa doktrina, sa pagbadlong, sa pagsaway, ug sa pagbansay sa pagkamatarong ¹⁷ aron nga ang tawo sa Dios mahimong takos, sangkap sa mga maayong buhat.