¹ Baghaniwa, uyu ulu wikalata wa bubili yuyo nasimba kukwinyu, sona mobokalata boshi bakubakumbusha ukushionyamusha inyinong'ono shinyu ² ukuti mungakumbukila amashu ghagho ghakuyughiwa nabakungula abikemo sona nululaghilo lwa Malafyale sona umupoki yuyo akapeghiwa ukwendela mubatumiwa bako ³ Mumanye tashi ishi, ukuti abalwobesho bakuya pamashiku gha bumalilo. Tibakise babombelaghe nukwendelela ukufwana ni finyonywa fyabo. ⁴ Bakuya pakutingi, ''Ilaghano lyake ilya kwisa sona lili kughu? Ukufuna mumwo abo tata witu bakafwila, ifindu fyoshi fyikile bulabulashe, ukufuma pabwandilo bwa bupeli.'' ⁵ Mumatingo bubu bakibwa ukuti akabalilo akatali ukwendela mwishu ilya Chala kumwanya napachisu fikisa fyabako ukufuma mumishi sona ukwendela mumishi, ⁶ ukwendela muchichichi ichisu akabalilo kalakala chikisa chakomanika, chikisuliwa namishi. ⁷ Ukwendela mu chichichi kumwanya nichisu fisenguliwe fya kumulilo, fisenguiliwe fikulindilila ishiku ilya bulongi nukukomanika kwa bandu abashita Chala. ⁸ Shitakabaghila ukuti shibabwinde munyinong'ono, baghaniwa, ukuti ishiku limulyene nu Malafyale lighelile nifyinja amasabuzande, po sona ifyinja amasabuzande fili isa lishiku limulyene. ⁹ Umalyafyale atakwenda panandi panandi ukufyana namalaghisho ghake, isa mumwo bamu bakutesha isa akukaba. Atakunyonywa ukuti uwa umwe ise asobele, lole akulonda ukuti weshi alwaghe ulusako lwa lupinduko. ¹⁰ Lole napapo shili bubu, ishiku ilya Malafyale likwiya kwisa isa mwifi: kumwanya kukwisa ukushila numupwato. Fifyo fyashala fikuya ukupya numulilo, ichisu sona nimbombo sha muchisu shikwisa kubonekela pabwelu. ¹¹ Pakuti ifindu fyoshi fikwisa ukukomanika mu sila yiyiyi, mungaba luko lwa bandu waki? Mubaghile mwikale mubwikeno sona mubwumi bwa Chala. ¹² Mubaghile musubilaghe sona mulindililaghe ukwisa kwa lishiku lya Chala. Pishiku lilalila kumwanya kukuya pakukomanika nu mulilo, sona fifyo fyashala fikuya pakusunguluka nubutukifu. ¹³ Lole ukufyuma nilaghilo lyake tukulindilila imwanya imbya nichisu ichipya mumwo abagholofu bakuya kwikala. ¹⁴ Po apa, baghaniwa, pakuti mukusubalila ifindu ifi, mwiyule ukuti mwanyi mwaghiwenakabibi kamu sona nakasolo kamu pandashi papake, mulutengano. ¹⁵ Isa bubu, mwinong'onele ukukibilira kwa malafyale ukuba bupoki, isashe mumwo uwamwitu upabuli akabasimbila umwe, ukufwana namahala ghagho ghakapeghiwa kumwake. ¹⁶ U Pabulo akuyugha ifindu fyoshi ifi mubokalata bake boshi, mumwo muli ifindu fifyo fikafu pakufipulikisha. Abashita kumanya sona babo batikalisanywishe abalisha bakufikomania ifindu ifi, isa mumwo bakubombela namasimbo aghangi, ukuti babo bakomanike. ¹⁷ Po apa, baghaniwa, pakuti mufimenye ifindu ifi ukufuma kale, mwiketeleshe mwibene ukuti mutakasobele nabashimbuli babo bakufuya indaghilo sona mu potwe numwe ubusubiliwa mwinyu. ¹⁸ Lore mukule mu chisa sona mumahala gha Malafyale sona mupoki u Yesu Kilisitu. Leke u bushisha bube kukwake ulu sona nakabaliro koshi aka kubumalilo. Ameni!