¹ Po indimukayugheichoni? Ka tungabukilila mu mbibi ukuti ichisa chibe chakutila? ² Chitangaya chibe lumo. Utwe twe tukafwa ku mbibi, tungikala mumwo bule sona? ³ Kokuti umwe mutashimenye ukuti mumoshe tukosheliwa mwa Kilisitu Yesu tukoshiwa mubufwe bwake? ⁴ Tukashiliwa, po, ukwendela mulyosho ukuya kubufwe. ichi chikenda mulubatiko isa yiyo u Kilisitu akimila ukufuma kubufwe nubushisha bwa Tata, po nutwe tungaba bakwenenlela mubwumi ubupya. ⁵ Papo utwe linga twaba bakukolana nawe mubumubwene ubwa kufwa kwake, utwe indi tukabe pamupene nawe pabushuke bwake. ⁶ Tushimenye shishishi, pakuti usongo witu umulisha, akakomeliwa na yuyo ukuti umubibi wabutula nongwa ghube wakukomanika. Ishi shikabombiba ukuti utwe manye sona tube twebapinyiwa ku mbibi. ⁷ Kuyuyo afwile shiyughiwe ukuba mwelu nulughindiko ku mbibi. ⁸ Lole linga tufwile nu Kilisitu, tusubalile ukuti nutwe indi tukikale nawe pamupene nawe. ⁹ Tushimenye ukuti u Kilisitu akaba wa kunyamuka ukufuma ku bufwe, atangafwa sona, ifwa yitakamulamulila sona. ¹⁰ Popa mubuyo bwa kufwa yiyo akafwa ku mbibi, akafwa limulyene ku fyoshi. Polole, ubwumi bubo akwikala, akwikala bwa Chala. ¹¹ Musila yimuyene, nuweshe ubaghila wiyeghe ukufwa ku mbibi, lole wikale nu Chala mwa KIlisitu u Yesu. ¹² Popapo manye mukale imbibi shilamulile mumibili yinyu ukuti mube bakulonga fifyo ghukulonda. ¹³ Mayi mukabikaghe umubili ku mbibi ukuba fibombelo ukubombela ku butitu. Lole mwibike mwebene kwa Chala isa babo bakeghiwa ukufuma kubufwe ukuya kubwumi, sona mukabike umubili winyu kwa Chala isa chibombelo ukubombela kubugholofu. ¹⁴ Manye mwitikishe imbibi ukubalamulila papinyu umwe mube pase pandaghilo, lole pase pa chisa. ¹⁵ Ngapo apa? nditutulaghe imbibi chifukwa tuta pase pandaghilo, lole pa chisa? Chitakabangepo lumo bubo. ¹⁶ Mutashimenye ukuti umwe linga mwiyegha mwibene isa mwebapinyiwa mwaba bapinyiwa kuyuyo umwe mukumughindika? umwe mwe bapinyiwa na kumbibi yiyo yikubatangilila ku bufwe, lumo mwe bapinyiwa ku baghindikiwa bakubeghela ku bugholofu. ¹⁷ Lole amapalo ghabe kwa Chala! Papo mukaba bapinyiwa ku mbibi, lole mwasunga ukufuma mundumbula ichighaba icha bumanyishi chicho umwe mukapeghiwa. ¹⁸ Umwe mupangiwe babuke ukufuma ku mbibi, sona umwe mupangiwe bapinyiwa ku bugholofu. ¹⁹ Nguyugha isa mundu chifukwa cha kupepuka kwa mibili yinyu. Isa mumwo mukisila nimibili isa bapinyiwa kuba tulanongwa sona nababibi, musila isa yiyiyi, mwipe mwibene isa bapinyiwa ku bugholofu ukubomba imbombo inyisa. ²⁰ Pakuti po mukaba bapinyiwa kubutula nongwa, mukaba babuke ukufuma kubugholofu. ²¹ Pakabalilo kala, ka seke shiki shisho uli nasho apa nisoni? Papo fifyo fikufumamwo mu fififyo bufwe. ²² Lole ulu pakuti mwabuliwa ukufuma ku mbibi sona tamwe bapinyiwa kwa Chala, mwaba seke ishelu. Nukuba nubwumi uwa bwila nabwila. ²³ Pakuti amalipilo agha mbibi bufwe, lole ichabupe icha Chla bwumi bwa bwila nabwila mwa Kilisitu Yesu u Malafyale witu.