¹ Akati anyokela ku kapenamu mopendashe amashiku ghanandi, pakisa papulikikwa ukuti akaba kukwabo. ² Abandu abingi bakabungana nukumala amalo ghoshi na pamulyangoshe, pope ghakamala po uyesu akisa ababusha amashu kukwabo. ³ po abalisha bamo bakisa kukwake bakisa nu mundu uwakufwa imbafu; bakamunyamula abandu folo (4). ⁴ Bakati bapotwa ukufika papipi ichifukwa cha chilundilo , bakisa bafumya umusonje ghoghukaba pamwanya pa yesu, bakati bafumya pakisa paba ubwashi bakisa bisha ichinyasi cho pakaghonapo umundu uwakufwa imbafu. ⁵ Akati atesha ulwitiko lwabo, uyesu akati kwa mundu uwakufwa imbafu yula akati, ''mwana, imbibi shako shahobokeliwa.'' ⁶ Abalembi bamo bakikala palapala, bakisa bilalusha mumyoyo yabo, ⁷ ''Umundu uyu angayugha bule bububu? akayugha fyo fitabaghile! wini yuyo angahobokela imbibi loli uchala mwene?'' ⁸ Mwalubilo uyesu akisa amanya fyo bakinong'onagha mundumbula yabo ukwendela mwambepo umwikemo . Akisa ababusha ukuti, ''choni cho mukwinong'ona fififi mundumbula shinyu? ⁹ Choni cho chipepe ukumubusha umundu uwakufwa imbafu ukuti 'imbibi shako shahobokeliwa,' pamu ukuyugha ukuti, egha ichinyasi chako ubukaghe'? ¹⁰ Lole ukuti mumanye pakuti umwana wamundu ali namaka pa chisu cha pasi pakuhobokela imbibi,'' akati kuwakufwa imbafu, ¹¹ nguti kukwako, nyamuka, egha ichinyasi chako, bukagha kunyumba kwako.'' ¹² Akanyamuka sona mwalubilolubilo akegha ichinyasi nukubuka kunyumba yake pandashi pa bandu boshi chochikapangisha ukuti boshi baswighe nukumughindika uchala, bakayugha bakati, ''tutaketite luma ngati ifi'' ¹³ Uyesu akabuka sona mumbafu mwanyanja, ichilundilo chikisa kukwake akisa anda ukubamanyisha. ¹⁴ po akendagha, akisa amuketa u Levi umwana wa Alifeyo umusongesha isongo ikalite mu tenthi akisa amubusha ati, ''ngonge.'' akanyamuka nukumukonga. ¹⁵ Uyesu akaya pakulya ichakulya mu nyumba iya Levi nabakusongesha imisongo pamupene nabatula nongwa nabamanyili bake pakuti bakaba bingi, poboshi bakamukonga. ¹⁶ Mwo abasimbi, bobakaba bafalisayi baketa ukuti uyesu akulya nabatula nongwa nabakusongesha imisongo bakabasusha abamanyili bake ukuti, '' choni cho akulya nabakusongesha imisongo sona na batula nongwa?'' ¹⁷ Uyesu akati apulika ifi akababula akati, ''abandu bobisashe mumibili yabo batakulondagha lumo umughanga (dokotala), babibi wene bo bangamulonda. Ndakisa ukwitisha abandu awisa lole abatula nongwa ¹⁸ Pakabalilo ko abafundiwa ba Yohani na bafalisayi bakafunga ukulya. Abandu bamo bakisa nukumusha ukuti, ''Choni chicho abamanyili ba Yohani na bamanyili ba bafalisayi bakufunga pakulya lole abamanyili bako batakufunga pakulya? ¹⁹ Uyesu akababula akati, ''wewamwitisha kubukwati angafunga pakulya po umwene bukwati ali palapala? pala umwene ukwati ali palapala atangafunga pakulya. ²⁰ Lole ishiku likuya pakwisa po umwene bukwati ayukufumapo pamaso ghabo, pamashiku ghaghagho bakwisa ukufunga pakulya. ²¹ Nayumo we angaghambika ichigamba ichamwenda ughupya musekesha umukulu. Pala ifi fingachitika umwenda ughupya ghunganyepula umuselekesha ughumale. Ukunyepuka kungaba kukulu ingani. ²² Nayumo yuyo angabika ivinyo muchakubikila ichakale pala fingabombiwa bunobuno angapundisha ifya kubikilamo fyoshi pamupene nu vinyo fingakomanika pachifukwa ichi ivinyo wakuwika muchakubikilamo ichipsa. ²³ Ishiku limo ilya sabata uyesu akaya pakwendela n gano abamanyili bake bakanda pakufuna ingano. ²⁴ Abafalisayi bakamubushikisha wakati, ''keta choni cho bakupanga ifindu fyo fitakwitikishibwa pishiku lya sabata?'' ²⁵ Akababusha akati, '' mutabelengitepo fyo u Devidi akapanga mo atamiwa sona isala yamubaba umwene na bandu bo akaba nabo. ²⁶ Mo akingila mu nyumba ya chala po u Abiyata akaba mu puti usongo akalya ichibama cho chikalangishiwa ku aliweshi, ''kupupatula umuputi sona akabapa fimo bo akaba nabo?" ²⁷ Uyesu akati, ''Ishiku lya sabata bakapangila chifukwa cha mundu, batakapanga chifukwa cha sabata hagha. ²⁸ Paichi umwana wa mundu mwenecho nishiku lya sabatashe.