¹ Po u Peteli nu Yohani bakabukagha ku Tempheli pakabalilo akanyiputo, pa kabalilo aka fili okoloko. ² Po umundu yuyo akalemala ukufuma mulufukwe lwa ng'ina akanyamuliwa pamulyango wa Temphile lilyo likitishiwanga ilikemo. Bakamwikashagha papo ishiku lyoshi ukuti asumaghe ku mundu weshi yuyo akingilagha mutempheli. ³ Bwo amuketa u Peteli nu Yohani ali papipi ukwingila mu Tempeli, akabasuma ifyabupe cha ndalama. ⁴ U Peteli, ukumuketelesha namaso ghake, nu Yohani, akati, ''Tukete utwe.'' ⁵ Umundu umulemale yula akabaketa, ukuti tiapokele fimo kukwabo. ⁶ Lole u Peteli akati, ''U siluva nu godi ndanawe, lole cho ndinacho, tingupe uwe. Mungamu iya Yesu Kilisitu wa kunazaleti nyamuka.'' ⁷ Pakumukola nakakono kamwisa, u Peteli akamunyamusha, nakalingalinga ifilundi fyake nupungunguno twake tukaba namaka. ⁸ Ukunyelela mumwanya, umundu umulemale yula akimilila nukwanda ukwenda; nukwingila nu Peteli nu Yohani mu tempheli, ukwenda, kunywla, nukumupalisha u Chala. ⁹ Abandu boshi bakamutesha akwenda nukumupalisha u Chala. ¹⁰ Bakashimanya ukuti umundu umulemale yula yuyo akasumagha ifyabupe pa mulyango umumoghi uwa temphile; bakisula nubwogha nukuswigha chifukwa cha fyo fifyo fikumubonekela umiundu yula. ¹¹ Bwo amukolelile u Pauli nu Yohani, abandu boshi pamupene bakakindililagha ku babo mu pochi ghagho ghakitishiwa gha Solomoni, nukushigha ngani. ¹² Bwo u Peteli aketa ifi, akabamula abandu, ''umwe bandu ba Isilayeli, choni chicho mukuswigha? choni cho mutulolotile namaso ghinu, ngati plo twetwe twapangisha ukuti umundu uyu endaghe mumaka ghitu pamu abo chala abingi. ¹³ U Chala wa Abulahamu, nuwa Isaki, nuwaYakobo, u Chala uwabotata, amukwesha umubombi wake u Yesu. Weyo mukamwika nukumukana pandashi pa Pilato, bwo alonda ukuti amwabule. ¹⁴ Mukamukana u mwikemo nu mugholofu sona mumalo mwake mukasuma mukasuma ukuti bababulile umughoghi. ¹⁵ Mukaghogha yuyo akandisha ubwumi, yuyo u Chala akamushusha kufuma kubafwe------sona twebokamboni. ¹⁶ Pakufuma pa bwimilili bwalitiko lwa mungamu yake, ingamu yake yikamupanga umundu uyu, yuyo mukumutesha nukumumanya, uwamaka. Ulwitiko lulwo lwendela mwa Yesu lwamuposha umundu uyu pamaso pa mwebandu mweshi. ¹⁷ Po, banyitu, ngumanya ukuti mukubomba ukushita ukumanya, isa mumwo abalongoshi binyu bakabombela. ¹⁸ Lole ifindu fifyo Uchala akayugha kale numulomo wa bakunguluka, ukuti u Kilisitu atamiwe, po ulu akwanilisha. ¹⁹ Pinduka, po ulu, sona ng'anamuka, ukuti imbibi shinyu shifufutiwe, ukuti twise utubalilo utwakutusha utwisa ukufuma mukwaghiwa kwa Malafyale; ²⁰ sona ukuti utume u Kilisitu yuyo aseliwe chifukwa cha wewe, Yesu. ²¹ Weyo mwene kumwanya kubaghile ukumupokelela mupaka akabalilo ka kunyoshekeshiwa kwa findu fyoshi, kufifyo u Chala akayugha kukabalilo ka kale nimilomo ya bakunguluka abikemo. ²² U Mose akayugha ukuti, 'u Malafyale u Chala akwisa ukunyamusha umukunguluka ngati nene ukufuma pakati pabobamwinyu. Mukwisa ukupulikisha kufyoshi fifyo tise ayughe kukwinyu. ²³ Tishikabombiwe ukuti umundu weshi yuyo atakupulikisha ku mukunguluka akwisakukomanika nganila pakati pa mwebandu.' ²⁴ Inga sona abakunguluka boshi ukufumila pa Samuyeli naboshi babo bakisa panyuma pake, bakayugha nukufumusha kusha mashiku agha. ²⁵ Mwebana ba bakunguluka nipangano lilyo u Chala akabapangila abosekulu binyu, isamumo akayughila kwa Ablahamu, ''Mumbeyu yako inyumba shoshi isha pachisu shikwisa ukusayiwa.'' ²⁶ Bwo u Chala akanyamusha umubombiwake, akamutuma kukwinyu tashi, ukuti ise abasaye pa kubang'anamula weshe wa umwe ukufuma kumbibi shinyu.''