¹ Goio eau hilo la ilo lalage ale halaba mela Magasa ale halaba, la siloko la ilolalage me la siloko la magasa kokovuti, mela mago oukati. ² Eau hilo lou la Siti ale maroka viuviu, e Jerusalem ale halaba, ale gali loilo la ilo lalage loio te Deo, egite viraragia mae la uturobo ale vitokoromoa ge te haruala. ³ Eau lolo la golu ale uru sele loio la Troun a vei mae, " Hiloa! La muloula te Deo eia vikapopo mele egite valua me hatavile, me eiage mou tomi le egiteu. Egite ge la valalua me hativile tetala, me e Deo lou eia ge vikapopo mele egiteu me eia ge e Deo tegiteu. ⁴ Eia ge sabubu vei tomi la masali gite loio la mata giteu, oio vola la pileho ge oukati, ouka la ilo burukola, mela tilali, la iligiligi. La papaga tomi ale mamuga tugati. ⁵ La tahalo ale popou oata la Troun vei mago, " hiloa! La papaga tomi eau igo halaba tia. " Eia vei mago, " Kekesi tola la papaga aleie sotalo la vuhula la merera aleie eme ge taho tavua me eia sesele. ⁶ Eia goio veiagu mago, "La papaga aleie a guviti! Eau la silokoloko mela kaluvuluvula. La tahalo ale malehu eau ge abiala la lalu ale la mapala ge ouka loio tela vilelo la lalu la mahulila. ⁷ La tahalo ale pepe eia ge abi tomi la papaga aleie, me eau ge e Deo tetala, Eiage e Latugu ale hatamale. ⁸ Alamoli tegiteu ale kamavagari, la tautaulao ouka, ale hate mamasi, egite ale bilibili, La hilotavula ale kamakora, la irasi, ale igigo la puhigolo, ale vasigogolo, la muli giteu ge oio la silali le loiloiale ale kakaha. Ale la pileho la vailuala." ⁹ Isa tegiteu la vaivitu la Angelo gomai taku, ale isasa tahoka la Disi ivitu eia volu mela ilea ale la tapasila ivitu, me eia vei mae, "Gomai. Eau ge vahililo le emei la uturobo me rutule latu la sipsip." ¹⁰ Goio eia boko taro eau oilo la kalulu soio tela Olu isauru me a malau goio eia vahililo le eau la Siti ale maroka e Jerusalem a gali loilo la ilo lalage a loio te Deo. ¹¹ E Jerusalem tahoka la marasala te Deo, la matagagala mae la uati ale tartigi taho, a mae la uati ale tataroa me a matatagaga mae la Jespa. ¹² Eia tahoka ale uru, me la kilapila oata vikapopo mela matala savulusa getelua, vikapopo mela Angelo savulusa gete lua oio la matale. me oata la mata egite kekesi la isa gite la maratatila te latatu le Israel. ¹³ Loio la ba le ist la mata ovola itolu. loio la ba e Not la mata itolu, me loio tela gale e wes la mata itolu. ¹⁴ La kilapi la Siti eia tahoka la vuhula otalo savulusa gete lua, me oata vola la isa giteu la Aposel te latula sip savulusa getelua. ¹⁵ La tahalo ale meramera tomi le eau eia tahoka la obu ale igolula la Gol ge abi la malaula Siti, la matala, mela kilapila logala. ¹⁶ La Siti tabuli bolabola, la malaula visauru moli mae la bolala. eia goio abi la malaula Siti la rod la ilabi la giligi, La taosen savulusa getelua tela Stadia oio la malaula, (la malaula, la bolala, la urula egite visauru moli). ¹⁷ Eia goio abi la malaula kilapi logala, 144 kiubit a bitolu koramuli la giligi tala tahalo ( a mae moli ale la Angelo abiti la malaula). ¹⁸ La kilapila logala egite tigila la Jespa mela Siti eia la Gol moli, mae la Glas ale matagaga taho, ¹⁹ La vuhula kilapi logala egite tokoromo tahola la uatati papahi ale marasa. la silokola la Jespa, la vailuala la sapire, la vaitolula la Agat, la vaivala la Emarel, ²⁰ La vailimala la Oniks, la vaivolola la Kanelien, la vaivitula la Krisolait, La ivalula la Beril, la valasiula la Topas, la savulula la Krisopras, la savulusa getetesala la Jasint, la savulu luala la Ametist. ²¹ La mata savulusa getelua eia la Peal ale savulusa getelua, egite tomi la mamata tomi egite igolula la Peal isasa. La gauru tomi oilo tela Siti eia la Gol moli Amae la Glas ale emege mata sele moli soilo. ²² Eau kama hilo isa la luma la lotu oilo la Siti, La vuhula la uru e Deo ale vagari me e latu la sipsip eia la luma la lotu. ²³ La Siti le la matagaga la haro ouka la Taio ge paga soilo vola la vuhula Matagagala te Deo ge matagaga oilo vola, me la lamula eia e latu la sipsip. ²⁴ Me la mautula ge tuga oilo la matagaga la Siti alele, me egite e suara tela magasa ge vahari la marasala tegite soilo vola. ²⁵ Me la matala kamage kakapi tela imala haro, me oilo vola la logo ge ouka. ²⁶ Me egite ge vahari la marasala mela tilogo tela mautula soilo vola, ²⁷ Alamoli la paga ale kama maroka isa kama ge tiroro soilo vola ouka ere isa ale igigo la papaga la mahelala ouka la vasigolola, ouka egite moli ale la isa giteu kekesi tia oilo la Buku la mahulila te e latu la Sipsip.