¹ La irovilala uru sele eme ge hiloa oata la ilo lalage: la tavile isa kairobola la haro, me la taio lotalo la ilo pulila mela kraon la matabu ale savulusa gete lua oata la gamala. ² La tavile le eia savulatu, me eia taitali gabu la iligi la piligo, la iligiligi la piligo ale uru sele. ³ Goio la irovilala isa lou egite hilo loua oilo la lalage: Hiloa! La riva isa uru magesegese la gamala ivitu mela komola savulusa, mela la Kraon ivitu oata la gama giteu. ⁴ La kiula goio sapa taro la egiteu la matatabu la vaitolula oilo la ilo lalage pigi egite sotalo la mautu la magasa. La riva le magiri hagavi moli soio tela tavile ale hagaviti ge pigo le, via ge sogo e latula. ⁵ La tavile le pigo a hatamale, egiliki le hatamale, Eia ge muga la maututula tomi vikapopo mela To la aen. Goio e latula le egite lagi taro leia soio te Deo mela pulou la uru tetala, ⁶ La tavile le goio hele soio la ba lakuepa, soio la ba ale e Deo raragi tia tetala, la vuhula egite ge baumulia la logo ge la taosen ge isa la salatu ilua savulu volo. ⁷ La vaubi uru sele oilo la ilo lalage. E Maikel me egiteu la Angelo tetala vikue tomi la Riva, tio la Riva vikapopo me egiteu la Angelo tetala vikue rivu soio tegitu. ⁸ Alamoli la Riva kama vagari ge pepe la vikue la. La ba tai isa oukati oilo la ilo lalage viage tegite me egita la Angelo tetala. ⁹ La riva uru ---- la pase ale lapulu egite toila e Satan, Eia moli male vasigologolo la mautu la magasa tomi--- egite pigia sotalo la magasa, me egiteu la Angelo tetala tai egite pigi tomi leia sotalo. ¹⁰ Goio eau lolo la golu isa uru sele oilo la ilo lalage: " Igoe agomai ti la mahulila mela vagarila mela mautu la sagela te Deo, mela vagari le Kraist tetala. La tahalo la sukutavule tabarabara gato egite pigi tia sotalo, Eia sekela moli sukutavu egite oio la poke le Deo la logo mela haro. ¹¹ Egite pepe eia oilo tela kasoso la sipsip mela merera ale egite vigalia sogala, Egite lou kama gogo la mahulila tegite oilo tela pileho. ¹² Oilo vola sagege, amuto la ilo lalage me egite ale momou oilo tegiteu! La tikumula soio tela magasa, me soio tela mago, la vuhula la hitu tugati sotalo taume! Eia volu mela igotolola ale Uru sele la vuhula la imala tetala bakisi moliti! ¹³ La imala la Riva rovi matagagea via egite pigi ti eia sotalo la magasa, eia soko la harimuli la tavile ale pigo e latula hatamale. ¹⁴ Alamoli la tavile le egite tahoka la palapalala ilua ururu mae te Loha la vuhula eia ge hele soio la mulila ale raragi tia tetala oilo la ba la kuepa. La ba alele eia la ba ale ge baumuli la tavile le oio vola, la imala, la imala tomi, la bautu la imala---- ge heletaro la ba tela pase. ¹⁵ Goio la pase tigitaro la lalu loilo la harela mae la lalu ale ururu, a viage igoa ge mae la lalau ale hae ge sali taroa. ¹⁶ Alamoli la magasa koli la tavile le. La magasa kope la harele me eia sogomu tomi la lalu ale la Riva tigitaroa loio la harela. ¹⁷ Goio la Riva raragi ge hugu tavu la tavile e eia selea goio vaubi vikapopo egiteu la hilili la tavile le, egite ale roromuli la komanmen me egite sautola vagari la vei mulila te Isus. ¹⁸ Goio la Riva magiri oata la magasa la mago mela parava.