¹ Tio e Paraseo isa la isala e Nikodemus, eia la mulugaluga tegite Juda. ² La tahalo aleie tuga tavu e Isus tela logo me eia veiala,"Rabbi, amite rovia via eme la tahalo la vimari ale loio te Deo, la tahalo isa kama koramuli ge igo tomi la irovilala ale eme igo tia mae moli e Deo ge vikapopo me le eia." ³ E Isus goio koliala mago, Asele, me asele, maemoli isa kama ge pigo halabala lou, eia kama koramuli ge hilo la mautu la sagegela te Deo." ⁴ E Nikodemus veiala mago," La tahalo ge pigo halaba lou mave mae eia uru ti? Eia kati koramuli ge goilo lou la tiale tilala tela vailuala via ge pigo loua, age koramuli?" ⁵ E Isus koliala mago, " Asele me asele viruru, mae moli isa kama ge pigo loio tela Lalu mela kalulu maroka, eia kama koramuli ge tiroro soilo la mautu la sagegela te Deo, ⁶ La rova ale pigo loio tela vovo eia tela vovo, me la rova ale pigo loio tela kalulu maroka eia tela kalulu. ⁷ Umala karuturutu la rova eau vei tiamu ovola, Eme ge pigo halaba lou.' ⁸ La lovi ge vai soio la ba ale mave a masaga ge goio vola; eme ge lolo la tilalila, alamoli eme kama rovia a loio la ba ale mave me age give. Age maele soio tegite ale pigo loio tela kalulu maroka." ⁹ E Nikodemus koliala tahia mago, "Ale la papaga ale ge mave?" ¹⁰ E Isus goio koliala mago, Eme la tahalo la vimari le Israel, alamoli eme kama tahoka la irovilala tela papaga aleie? ¹¹ A sele , eau veiamu,etatou vei la rova etato rovia, me etato vei pala larova etato hilotia. Alamoli eme kama rara tavu la merera ale amite veipalea. ¹² Mae eau veiamu la papaga la magasa me eme kama tautaulailo, eme ge tautaulailo mave mae eau ge veiamu la papaga la ilo lalage? ¹³ Isa kama lovo soata la ilo lalage alamoli la tahalo moli ale sivo loata la ilo lalage ___ e Latu la Tahalo. ¹⁴ Mae moli e Moses aratili sae la pase oata la obu oilo la kuepa, age mae tai moli e Latu la Tahalo ale ge sio saea soata, ¹⁵ ila egiteu ale tautaulailo oilo tetala ge tahoka la mahulila ale la tapasila ouka. ¹⁶ E Deo masasga sele la mautu la magasa, ala eia sugutaroa gatou e latula ale isamoli sekela. via mae ere isasa tautaulailo oilo tetala eia kama ge kokovu ouka eia ge tahoka la mahulila ale la tapasila ge ouka. ¹⁷ E Deo kama baha e latula somai tela mautu la magasa ge igo bara la mautu la magasa, ouka agomai via ge utululu la valalua la mautula loio tetala. ¹⁸ Me egite ale tautaulailo tetala kama ge pou tela kama korala, me egite ale kama tautaulailo oilo tetala egite kama korati la vuhula egite kama tautaulailo oilo tala isale latule Deo ale isa moli. ¹⁹ Aleie eia la vuhula pulou tela ilapu matatala: La matagaga guviti oilo la mautula magasa, egite la valua me hatavile masaga sele la maligoma la matagaga ouka la vuhula la vulovulo gite akama kora. ²⁰ Ala egite tomi ale mukupilepile la matagaga, egite kama koramuli ge gamai tela matagaga, la vuhula la vulovulo gite umala ge tabuli palala. ²¹ Alamoli egiteu ale tilimuli la seselela egite ge goio tela matagaga la vuhula la valua ge hilo matagaga selea mae la vulovulola eia igoa oilo te Deo." ²² Mulmuli tealele,e Isus vikapopo me egiteu la disaipel tetala tuga soilo la mautu e Judaea. Me oio la ba alele eia abi la imala usu vikapopo me egiteu igigo la vuluhi. ²³ La imala alele e John tai oio igigo la vuluhi oilo e Aenon hagavi te Salim la vuhula la lalu usu oio la ba alele. egite la valalua ale gomai tetala eia vuhi egiteu, ²⁴ La imala alele egite souka tau e Jon soilo la luma la totorobola. ²⁵ Tio kabili tegite la Disaipel te Jon me egite Juda la mera galolola hiliti tela vei muli polola tela vuhi veiala. ²⁶ Egite gomai te Jon me egite veiala, "Rabbi, la tahalo ale vikapopo le emei oio la rere lalalu e Jodan, la tahalo ale eme mera matagaga leia, hiloa, eia tai oio vuhi egite la valalua. me egite la valua me hatavile tomi goiti tetala," ²⁷ E Jon kolia gite mago, La tahalo isa kama koramuli ge abi isa la paga kara mae la vabila alele age abiala loata la ilo lalage. ²⁸ Amuto lou koramuli ge vei matagaga la rova eau vei tia,' Eau kama e Kraist,' alamoli akama maele, ' E Deo baha mamuga eau goma eia.' ²⁹ La tavile ale ge taulai eia tela tahalo ale egite utu robo eia soio tetala, tio e vikilipi te haruala, ale magiri me eia lolo eia ale meramera, eia ge sagege pepeho la vuhula eia lolo ti la golule haruala la tavile le, Aleie, amae, la sagegela taku eia koramuli sele ti, ³⁰ La vuhula eia ge sibitala uru sele, me eau sele ge vai bisi eau. ³¹ La tahalo ale loata la ilo lalage eia loata tavu egite tomoli. Me la tahalo ale lotalo tela magasa eia ge meramera tela papaga la magasa. Alamoli la tahalo ale loata tela ilo lalage eia loata tegiteu la valua tomi. ³² Me eia veipalea la rova eia hiloa me ale eia lolotia, alamoli isa kama abi la merera tetala, ³³ Me la tahalo moli ale abi la merera tetala eia rovi selea mae e Deo eia sesele. ³⁴ La tahalo ale e Deo baha eia me eia ge meramera tela merera te Deo. Age abiamu la kalulu maroka alamoli akama ge bisi ouka age uru, ³⁵ La vuhula e tama gatou masaga sele e latula me eia abi tiala la papaga tomi a oio ti la limala. ³⁶ Me la tahalo moli ale tautaulailo oilo te latula eia ge tahoka la mahulila ale la tapasila ouka, me la tahalo ale kama roromuli e latu la tahalo eia kama koramuli ge hilo la mahulila, tiele la hatemasila te Deo ge pou oata tetala."