¹ La imala egite kisi la merera via amite ge abi e sipi ge goio e Itali,Egite tau e Pol vikapopo me egite la valua la karabusu isahari lotalo la lima la mulugaluga tegite Ami la isala e Julias. ² Amite sae e sipi loio e Adramitium,amite seli moli oilo goio mae la ba Asia. Amite golau la mago. E Aristakus te tesalonika te mesodonia eia tamai gomai vikapopo le amite. ³ La logo isa polo amite poru oio la mautu uru e Sidon,oio laba alele e Julius soko la puhi tigi le Pol a veiala ge goio te tabarabarala ge visuli eia. ⁴ Tela ba alele amite seli olau la mago polo galili gio la parava la olu e Siprus lavuhula la lolovi vagari. ⁵ La imala amite seli goio mae e Silisia me Pamfilia amite goio poru oio e Maira la mautu uru le Lisia. ⁶ Tela ba alele la mulugaluga tegite opisa poga e Sipi te Aleksendra aviage hari mae soio e Itali.eia goio veia mite sae soio te Sipi alele. ⁷ Amite hari kadele moli la logo usu polo amite guvi hagavi soio e Cnidus,la lolovi vagari amite kati koramuli ge polo sio la ba alele, ala amite polo kovu mae loio la mautu e krit la gale le Salmon loio. ⁸ Amite hari alamoli a tivura sele,goio amite guvi oio la mautu isa egite toila e Fea Havens, a hagavi la mautu la parao e lasea. ⁹ Amite abi la imala malau, goio la imala peremua tegite Juda polo,la mago kamakora seleti tela hirari. goio e Pol mera vagari soio tegite. ¹⁰ Mutou la gauru ale etato viage tili mulia etatoge poga la tikumula isahari ge kokovu,kama la papaga moli me Sipi, la mahuli gato tai ¹¹ Alamoli la gama gite opisa tautomi la tiala oiote la tahalo ale au e Sipi me tamale Sipi a kama tautaulailo la merera e Pol veiagite. ¹² La tilaloa le sipi kama koramuli ge totola te la imala lolovi, ala egite ale au e Sipi usu via e sipi kage poru, etato ge hari moli kara etato ge guvi oio la mautu uru e Fonix ge poutali la lovi ge kaluvu ,e Ponix eia la brisi oilo krit, a lagu mae soio tela lima gato e meru ,tela porosile la matala haro me te la lima gato e gata tela porosile la matala haro. ¹³ La imala la lovi tela lima gato e gata ge vai rorovi egite ale au e Sipi ge lapu la anka me egite ge harimuli la parava le krit. ¹⁴ Ala moli la imala kama taba la lovi isa vagari sele,egite toila e meru lolau mae la olu pati vaiti sotalo. ¹⁵ La imala e Sipi poga la mago akati koramuli ge tolosogi la lovi,e tato ge abiala la lovi la imala me etato ge pati moli. ¹⁶ Amite hari kovu loio tela olu isabisi egite toila e Kauda, kabili tela tikumula amite kisitatola e boti bisisi. ¹⁷ La imala egite lapu e boti soata, egite abi lamotala kisitola la vovo le sipi egite taga via amite souka ge kaka oata la sikalu ala egite pigi la la angka sotalo la mago me amite pati moli. ¹⁸ La lovi la hura pigi geru sele amite la logo isa polo egite soko la piligi la golgolu oata te Sipi sotalo la mago. ¹⁹ Tela vaitolu la logo egite pigi la papaga le Sipi sotalo la mago. ²⁰ La imala la matabu me la haro kama guvi matagaga somai tamite la logo isahari,la lovi mela hura pigi vulo amite,la gabutala ale via ge koli rivu amite oukati, la gauru isa moliti amitege heletaro e sipi ge tuga. ²¹ Egite kama ali la imala malau, E Pol magiri kabili tegite avei mago, "Amuto la vala, Eau veia muto ge pou oio e Krit,alamoli amuto kama lolo la merera taku etato gomaie,ala etato poga la tikumula hagavi e tato ge kokovu. ²² Ala eau abia mutou la merera aleie ge igo vagari la gabutala tamuto, la vuhula la mahulila isa kamage kovu kabili tegato,Alamoli e Sipi moli ge kovu. ²³ Tela tapasi la logo la angelo te God ale eau loio vola,eia moli eau lotu tavua egite angel tetala magiri labaligu. ²⁴ Avei mago,'Umala taga, Pol.Eme ge magiri la lagu le Sisa,me ge hiloa, E God vaihililo lemei la gilogo tetala vikapopo me la valua me hatavile ale sae tomi lemei. ²⁵ Ala tabarabaragu, amuto ge magiri vagari, Eau tautaulailo te God ala age guvi mae ale eia veitiagu. ²⁶ Alamoli etatoge hari oata la olu pati isahari." ²⁷ La logo savulusa geteva tugati,la lovi abiamite mae soio la mago le Adriatik,Te la logo uru valiposa la valua la igolu te Sipi gabua mae amite hagaviti oilo la kaitora. ²⁸ Egite abi la mota pigia sotalo la mago ge abi la malau la magasa egite abi mugea 40 mita mulmuli egite abi lou 30 mita. ²⁹ Egite taga via e Sipi soukage tubu la wuatati,ala egite pigi e angka iva olagu la maisu la Sipi,me egite kaka viage la paga ge maga harari. ³⁰ Egite la valua la igolu te Sipi pamuli la gauru ge heletaro e Sipi,ala egite tau e boti bisisi sotalola mago,egite vasigolo via ge pigi la angka sotalo la mago. ³¹ Alamoli e Pol veia la gama giteu opisa mago,"mae la valua soloata te sipi amuto kama koramuli ge koli rivu lou amutou." ³² Goio egite ami valiutu la mota le boti a pati gale ³³ La imala la paga mamagati, E Pol karasuku egite tomi ge abi bakisi la ilali.Eia veimago, "Igoe la logola savulusa geteva [14] e tato pou talia e tato kama ali eme kama ali isa la paga. ³⁴ Ala eau tahi amuto ge abi la ilali age koli amuto mahuli. la ivu la gama muto isa kamage talulu," ³⁵ La imala a vei mae, Eia abila bret a toi tartigi soio te God tela mata gite tomi. goio a tovi la bret me a soko la ilali. ³⁶ Goio egite tomi abi la vagari tela gabutala mela tia gite me egite abi la bret egite ali. ³⁷ Amite 276 la valua oilo te Sipi. ³⁸ La imala egite ali me egite vagari, egite abi la wit pigia sotalo la mago,ge igo e Sipi ge mavulaga. ³⁹ La imala la paga maga egite kati matakilala tavu la magasa,Alamoli egite hilo isa laba la parava, la gabutala gite isa moli mae etatoge lapu e Sipi soio la ba alele. ⁴⁰ Egite vali taro la mota la angka piligia sotalo la mago,me egite lubetaroa la mota la Rada vilagula seli soio la lovi me egite hari soilo la parava. ⁴¹ Egite goio e sipi hari soata la sakalu kabili la mago egite kati tuga, la mago pigi e sipi la sten la putua. ⁴² Egite Ami kisi la merera viage bili tomi egite ale karabusu isa kamage puru soilo ge hele. ⁴³ Alamoli la gama gite opisa viage suli e Pol, ala eia mukupile la gabutalala tegite,'me eia via gite ale karamuli ge puru ge raga mamuga ge puru soilo la magasa. ⁴⁴ Me egite tomi aleio ge tilimuli egite, isahari ge pati la palang me isahari ge tela papaga ale oata te Sipi, oio tela gauru alele egite tomi guvi taho oilo la magasa.