¹ Tio ale oilo e ikonium e Paul me Barnabas tomi goiolo la luma la lotu tegite Juda egira valolo la valolola tegira isapolo sele egira lapu olu la gale la valua me hatavile usu sele egite e Juda me Greek tomi tautaulailo. ² Goio egite Juda ale kama vulo goio igo marapa la gabutala gite Gentael igo egite la tia tikumua gite tabarabara giteu. ³ Tio egite pou oio la ba alele la imala malau,vagogala la merera vikapopo mela vagarigari la uru,tela imala ale eia abia gite la sesele la gilogo tetala. eia igo la papaga aleie vikapopo mela irovilala mela paga la vikarutula te la lima le Paul me Barnabas. ⁴ Alamoli egite la valua me hatavile oilo la siti vilele;isahari goio tegite Juda isahari goio tegite la aposel. ⁵ Egite Gentael me egite Juda vikapopo me egite la mulugaluga tegite tovolaila via kama ge vipou tigi egite, ⁶ Alamoli la imala egite rovia maele,egite hele soio la mautu e Likaonian te Listra me Derbe mela gale la mautu tomi alele, ⁷ Oio la ba alele egite solo la valolo la merera te uru. ⁸ Oio e Listra la tahalo isa pou,la vahala mauba,eia gulugulu ti oilo la ilo le tilala,me eia kama tatuga. ⁹ La tahalo alele lolo e Paul ale valolo. e Paul goio matavu vagari ti eia a goio hiloa mae eia tahoka la tautaulailo ale ge tartigi rivu lou. ¹⁰ Tio eia goio vikara soio tetala me la golula oata sele,"eme magiri oata la vahamu."la tahalo le raga soata goio tuga polo galili tio. ¹¹ La imala egite la valua me hatavile hilo la rova ale e Paul igotia,egite goio avigia tio, oio la merera tegite Likaonia," e gite Deo guvi tahalo ti sotalo tegato." ¹² Egite tola le Barnabas e "Zeus, "e Paul e Hermes," la vuhula eia la tahalo la valolo. ¹³ E paraseo le zeus, la luma la lotu tetala logala moli la siti; eia vikapopo me egite la valalua masaga ge gutu la opa tegite. ¹⁴ Goio la imala egite la aposel,e Barnabas me Paul, egira lolo vutia,egira sile la kairobo tegira goio hari sogala tegite la valalua me hatavile, taliti soio tegite,v15 ¹⁵ "Amuto la vala, ilava amuto igo la papaga ale mae? amite tai la tahalo moli, amite visauru moli mae amutou ele. amite valolo moli la merera soio tamutou, via ge amuto ge vulo taro la paga la magasa ge vulo tavu e Deo,ale vipou la mori,mela magasa,la mago,mela papaga tomi ale oilo vola. ¹⁶ Araura,eia piligi moli egite la valua la mautula tuga mae la masaga giteu. ¹⁷ Alamoli soloio, eia kama piligi taro molia via isa kamage,magiri la selela, oilo te alele eia igo la papaga ale tartigi me eia abia muto la hura mela haro mela ilali,a vivolu la hate muto la ilali me la sagegela." ¹⁸ Oio tai la merera aleie,e Paul me Barnabas sautola egite la valalua loio tela viabila soio tegite. ¹⁹ Tio egite jada isahari loio e Antiok me ikonium gomai ali la ilo giteu la valalua. egite goio dumu le Paul la uati lapu kalavea loilo la siti gogala,egite gabutala via eia peho ti. ²⁰ Alamoli la imala egite la disaipel magiri galilia, eia hiliti moli lotalo goilo lou la siti. galgeli mae, eia tuga soio e derbe vikapopo me Barnabas. ²¹ Egite valolo la merera te uru oilo la siti alele usu tegite guvi mae la disaipel,mulmuli egite beua soio e Listra,goio mae e Antiok. ²² Egite solo la igolula vai vagari la kalulu gite la disaipel tututolea gite ge magiri vagari oilo tela tautaulailo,egite vei mago," etato ge tiroro soilo la mautu la sagegela te Deo oilo tela iligiligi isahari." ²³ Tio egite turi isahari egite la mulugaluga oilo tela luma la lotu tomi,me egite peremu mela kilaka,egite tau egite soio te la lima la uru, ale egite tautaulailo oio tetala. ²⁴ Goio egite polo oilo e pisidia gomai mae e Pamphilia. ²⁵ La imala egite valolo la merera te uru oilo e perga,egite tuga gotalo e Attali. ²⁶ Loio tela ba alele egite seli mae soio e Antiok, la ba ale egite tau egite soio la gilogo te Deo tela igolu ale egite vipuru tia. ²⁷ La imala egite guvi oio e Antiok egite tola kapopo la lotu tomoli,egite goio vigile mulia gite la papaga tomi ale e Deo igo tia soio tegiteu,me a kope tai ti la mata soio tegite la Gentael. ²⁸ Egite pou la imala malau vikapopo me egite la disaipel.