¹ Iau Pol me Timoti, iem nourata tamareme ke Krais Jisas iem emgeigeike nalaulau eniko ila kire natamtamaol seime titengai mulere page Krais Jisas ² seime ire tigingin Pilipai,tirengere eremariringa me erepaulongare ke narumpua.Nakewainga taio kiami me nate tawainga ke tamara Natavolo me Aravainge Jisas Krais. ³ Iau navul savurim page iau Aktavolo page nae vunoinge iau matak nana kami. ⁴ Nae vunoinge ke iau lekpavulnga pagami, iau sevaio napavul itolaknge natini gelgelnga. ⁵ Iau nakeve nangonga ke natini gelgelnga page iami limi ginginga luila ke naol popue knge naetne matanga imai ise ailiakoko. ⁶ Iau remok votvotia page navunga tiavolemnga eio vileko, navola seie ipamunge nourata nalnge luila kiami ie pa ikeve ila la isou pa ipakaure ke naetne ke Jisas Krais. ⁷ Iau sevaio tinik igelgel pagami neiwolainge pa aisae me iau nakim iami ngata me iami neiwolainge tako alulu luila ke iau atek. Iami ta neiwolainge io ita rourata tiavolem luila ke nakewainga ke nasau iau nagingin luila ke kalabus me page nasau iau nagingin mange me naliliwole naol popue. ⁸ Natavolo ie inalpua pagau, pa aisae me iau nakim iami ngata itolaknge naremo sianganga ke Krais Jisas. ⁹ Iau napavul pagami vileko, so iami limikimnga pagire waimi tengere pau pa ipot ainge la ila ngata luila ke liminalnga. ¹⁰ Iau napavul page eniko pa aisae me iami pa avul pua page navunga soknge nalnge me nagol popuare, me iami pa akep rau avo ke naetne ke Krais. ¹¹ Iau napavul pau vileko so iami pa apon panga nanga ke nagol nalnge soknge igon ke Jisas Krais, eta navirapanganga napasis ainge ke Natavolo. ¹² Iau nakim iami waek natamtame so awotae nasae ipot kiau, eniko ipaule iau ke neinge naol popue ila ipot, eta natamtamaol sogan tinal page naol popue. ¹³ Page eniko, neiwol napalpungare me awainge ke Rom tiwotai vileko so iau navola tea nakalabus me nangongo ipot page naol popue ke Jisas Krais. ¹⁴ Waek natamtame votvotire ngata luila ke Ainge pa aisae iau nagingin ke kalabus eta ire votvotire me timotou tiavo ke tiliwole nangonga onaunange. ¹⁵ Tengere tiliwole Krais pa aisae me ire remore siange me naosinga me ire tengere tiliwole Krais pae narelmonga popue. ¹⁶ Ire aimul are tiliwole nangonga ke narelmo popue tiwotai so iau napot wai nagel ke naol nalnge. ¹⁷ Me ire seime tiliwol page Krais matanga eio ire tiliwol page nagol ke nalitainga me ke narelmo popue tiavo. Ire remore so pa tikeve iau tinik igelgel avo nasau iau nagingin ke kalabus. ¹⁸ Pa aisae? Page naroro eniko luila ke napokakanga avome nangonga onaunange,ire tivul ipot page Krais me page eniko iau tinik igelgel. II. Me pa iau tinik igelgel. ¹⁹ Me page eniko volem iau nawotai so iau pa nakorarange kalabus luila ke iami limi pavulnga me napaulonga ke nanun ke Krais Jisas. ²⁰ Me iau tinik so nakeve navunga tia me ikeve iau mamaok avo, me itolaknge naremo votvotinga ke nae vunoinge, Krais pa itoke napasis ainge page iau anok, page nasau iau namamata avo me iau namate. ²¹ Ke iau so namamata eio Krais me page namatenga epa iau natoke nakolnga. ²² Me songe iau nakim so nagingin mamatangak luila ke anok, eniko eio nourata popue kiau.Me iau pa matak ikono page naroro soknge? Iau nawotai avo o. ²³ Me iau nagingin mugula ke namatenga avo me namamatanga.Me nakimnga ainge kiau eio so nala me nagingin ke Krais,eniko eio popue ngata. ²⁴ Me so nagingin ke anok eio popue,eio page popue kiami. ²⁵ Me page naoguainga ke eniko, iau nawotai vileko so iau pa nagingin ta me natolakngami neiwol ainge ke tavoko voko ila ta me tini pa igelgel luila ke naoguainga. ²⁶ Eta luila kiau iami pa remomi pua ainge ke tinimi igelgel luila ke Krais Jisas page naetne iau pa namule namai kiami. ²⁷ Eta akep mule iami amai wai natamtamaol ke tiwata pue naol popue ke Jisas, eta page naetne iau namai ke nalei iami avo me naetne iau nagingin avo,iau pa nalonge amiol (napu),vileko so iami taio amari votvot luila ke nanun tea, page naremonga tiavolem ke tavoko ulara so tapaule naol nalnge. ²⁸ Eta sevaio amotoure natamtamaol seime tigingin tiwai iami ami mili avo.Eniko eio iwai nounaknga kire ke titoke siange ainge kire,me page iami Natavolo itoko mule iami,eniko eio imai kie Natavolo. ²⁹ Eta Ie ivul pua pagami page napasis ke Krais, eniko ke aoguai sapa page ie volem avo,me iami sevaio ala alu ke nakarkarnga naveinge me natini patanga page ie epasis pau. ³⁰ Me page nagol tingtia ke naosinga me napalpunga iwai iami ale ie kiau,ailiakoko iami pa alonge kiau.