¹ Na parava iea e Isu i pea ruma i vano i made na rerena dari. ² Hurika bakovi a ngatavine ri kupo ri made haluea e Isu,lakea ia i rike vona tara bout i made lakea hurika bakovi a ngatavine ri pesi na rerena dari. ³ Lakea e Isu i tovo e hurika bakovi a ngatavine na ni ta vakakika i kupo.Ia i ta,"Longo!Tara bakovi ni rata hania i vano ni varo a vuana maki ni kani. ⁴ Tahuna ia i voro a vuana maki ni kani polomeli na malala,ranga vutuna maki ni kani i boru langa na rerena dala i valai e virika kadirovo ri kani ra vutuna maki ni kani. Ranga vutuna maki ni kani i boro langa na maka kedo kiroko i uka malala ge kupo vona,i laviriri ri rike,na rana,i uka malala ge kupo ge tabuli na kedo kiroko. ⁶ Tahuna a haro i rike valai,ri kere laviriri hateka ri malai,na rana,kane ria i tabuli polomeli kunana i uka naru. ⁷ Ranga vutuna maki ni kani i boru langa na mota padipadi na tahuna ri rike,a mota padipadi i rike i rako kari ria. ⁸ Ranga vutuna kai i boru langa na malala kamumu ri vua,ranga i vua i ravulu i mule ma murina i bloko taku,ranga i vua i ravulu polotara,ranga i vua i ravula tolu a maki ni kani. ⁹ Bakovi i tahoka talinga,ia ge longoa ge bole kamumua ngava iea,." ¹⁰ Pali muri e hurika murimuri ri nana maea e Isu,"Navai o rata virika ni ta vakakika o ta turane hurika bakovi a ngatavine?" ¹¹ Isu i koli mule ria i ta maea,"Mua bara mu vivi,na rana,virika ni ta kapiloho na harikinga na hunu i bele kavakava ne mua pali.Pali e hurika bakovi a ngatavine nga kama ri lohoka ma na harikinga na hunu. ¹² Lakea e hurika bakovi a ngatavine erei ri bole kamumu a ngavagu lakea ri ru na tamudine ria turana ni luhoi ne ria,Deo biri habi i kupo ne ria bara ri vonu liu.Pali e hurika bakovi a ngatavine erei kama ri bole kamumu a ngavagu,ria bara ri longo kabrungia ngavagu,ria kama rigi luhoi tabu virika ngavagu kama rigi luhoi tabu virika maki lobo ri rata hosi. ¹³ Lakea iau a hini a ta vakakika ne hurika bakovi a ngatavine.Na rana,ria ri matai virika maki iau a rata,pali ria kama ri lohoka vona ra vuhuna ngava iea. ¹⁴ Ni ta profet ne Aisaia i bele kavakava ne hurika bakovi a ngatavine,ia i ta,'boro longoa ngavagu,pali kama go longo kamumua go lohoka vona ra vuhuna ra ngava iea.Boro matai maka maki iau a rata,pali kama go matai kamumu go lohoka na maka vuhuna maki. ¹⁵ Lakea i ta tabu maea,na hini nga kunana i tora hateka a tamudine ria hurika bakovi a ngatavine pali kama ri kara ni longoa ngavane Deo,i manga kunana ri kapikaria matane ria pali kama ri kara ni matai tara maki,o rigi longoa tara ngava,o rigi lohoka hateka na tamudine ria,rigi kara ni haba bito na sin iau bara rata kamumu ria. ¹⁶ Pali bara mu vivi na rana mua mu matai kamumu virika maki iau a rata,mu longo mu lohoka kumumu na maka ngava iau a rata. ¹⁷ Iau a ta muholi hateka ne mua,hurika profet turane hurika bakovi malamala ri made hosi ri tahoka ni ngaru dagi ni matai virika maki mua mu matai ngane,pali kama ri matai,ri ngaru hateka ni longo ra ngava mua mu longo ngane,pali kama ri longo. ¹⁸ Longo kamumua a vuhuna ngava ni ta vakakika na bakovi i varo a vutuna kai. ¹⁹ Tara bakovi i longo a ngava na harikinga ne Deo kama i ru kamumua na tamudina na ni luhoi vona,ia i manga vutuna kai i boru na hare dala,a bakovi hale e satan i valai laviriri i rata vorokia na tamudina. ²⁰ Bakovi i laviriri hateka ni longona ni tane Deo turana ni vivi dagi,ia i manga a vutuna kai i boru langa na malala kedokedo. ²¹ Bakovi i bole a ni tane Deo a ni luhoi tara vona i kapo kunana,kama i ru kamumua na tamudina na ni luhoi vona.Ra bakovi maea biri pe laviriria ni luhoi tora vona,tahuna a ni mava turana ni toni i bele.I manga vutuna kai i rako lagalaga pali kama i puru na malamala. ²² Bakovi i longo a ni tane Deo i rua na tamudina na ni luhoi vona,pali ia i luhoi hateka ni rupalupu a moni,kago turana a maki vona malala kama i luhoi ia e Deo ge rata narona.Pali ia i manga vutuna kai i boru langa na mota padipadi. ²³ Bakovi i bole kamumua ni tane Deo lakea i ru kamumua na tamudina na ni luhoi vona i ramai kumumua ra ngava.Ia i manga vutuna kai i boru langa na malala kamumu i vua kamumu.Ranga i vua i ravulu hamule mai a murina i bloko taku ranga i vua i ravulu polotara ranga i vua i ravulu tolu." ²⁴ Isu i ta vakakika tabu ne hurika bakovi a ngatavine.Ia i ta,"Harikinga ne Deo i manga a bakovi i varo a vutuna kai kamumu i manga wit a maki na hania vona. ²⁵ Pali a tahuna ne hurika bakovi ni matakari a hania ri mahita pali,hurika pile na tahona hania ri valai ri voro a vutuna kukuni hale na krukruna hania na wit lakea i vano pali. ²⁶ Tahuna a vutuna wit i mapoka i rike i vakatubu ni vua,kukuni hale tara i rike. ²⁷ Hurika voravora na tahona hania ri valai ri taki maea,ViriDagi,ioe o varo a vutuna kai kamumu na hania vomu,pali e virika kukuni hale ri bele navai? ²⁸ Tahona hania i ta,a pile nau i valai i varo a kukuni hale,pali e hurika voravora ri taki maea ia,ioe o ngaru mia migi liputala ra kukuni hale e? ²⁹ Pali a tahona hania i ta,Uka,nahani lipua,maga motogo lipu ranga kukuni hale turana wit. ³⁰ Rua a kukuni hale turana wit rugu rike palupu i vano ge bele na tahuna ni ru kadolu a maki ni kani.Na tahuna ni ru kadolu a maki ni kani i moro pali na hania,bara taki e hurika bakovi ni ru kadolu a maki ni kani maea,"Lipu voroki taro ra kukuni hale o rotu boro runagni na kanono.Muri o ru kadolu virika vutuna wit o ru na ruma na maki ni kani nau.""' ³¹ Muri e Isu i rata ni ta vakakika ne hurika bakovi a ngatavine.Ia i ta,"Harikinga na hunu i manga vutuna kai na kai a mastet i tara bakovi i bolea i varoa na hania vona. ³² Ra vutuna kai a mastet ia i kiroko hateka na palane virika vutuna kai ranga ne hurika bakovi ri kara ni varo.Pali na tahuna i mapoka i rike dagi,ia i kara ni rede ranga maki ni kani na hania.Ia biri bele dagi manga kai,virika kadirovo ranaga bara ri rata ruma ne ria na rahana." ³³ Isu i rata tabua tara ni ta vakakika ne hurika bakovi a ngatavine maea,"Harikinga na hunu i manga yist tara ngatavine i bole i papote i pulo turana cap na plaua i tolu biri vava vona plaua." ³⁴ Parava vakaroro,tahuna e Isu i ngaru ni ta turane hurika bakovi a ngatavine,ia bari i ta vakakika ni ta turane ria. ³⁵ Ia i rata hini nga ni vakatora tara ngavana profet i herea hosi.Ra profet iea ia i ta maea,"Bara rata virika ngava na ni ta vakakika,bara rata virika ni ta vakakika ni tovo hurika bakovi a ngatavine ne virika maki i tabuli kapiloho,tubu na tahuna iau a rata rikea hunu a malala." ³⁶ Tahuna e Isu i pe e hurika bakovi a ngatavine i hamule na ruma,hurika murimuri vona ri valai ri taki maea ia,"Ioe o kara go taki kamumu mia vona vuhuna ni ta vakakika na kukuni hale i bele na hania na wit." ³⁷ Lakea e Isu i taki maea ria,"Bakovi erei i varo a vutuna kai kamumu i vakasiria a tuna Bakovi." ³⁸ Hania i vakasiria ra malala iea,lakea virika vutuna kai i vakasiri e hurika bakovi ri ramai a ngavane Deo,a kukuni hale i vakasiri e hurika bakovi ri rata naro hale ri ramai a ngavane satan. ³⁹ Lakea ra pile iea i varo a kukuni hale,i vakasiri e Satan.Tahuna ni ru palupu a maki ni kani i moro na hania,i vakasiria a ni lobona malala iea.Lakea bakovi ni ru palupu a maki ni kani i vakasiri a ensel e Deo. ⁴⁰ Na naro palupu maea ni ru kadolu virika kukuni hale bara ni gutu na kanono,Deo biri made manga jas ia biri luhoi kado e hurika bakovi a ngatavine na ni lobona malala iea ⁴¹ Tuna bakovi bari rudu virika ensel vona bara ri vano ri rata voroki maka maki bari rata hurika bakovi ri boru na sin,lakea e hurika bakovi a ngatavine erei ri longo taro a ngavane Deo. ⁴² Hurika ensel bara ri voroki re hurika bakovi a ngtavine bara ri puru na kanono dagi,bara ri hataki a ni madihi,ni tangi,bara ri kani a ngine ria. ⁴³ Pali e hurika bakovi a ngatavine ri malamala bara ri para manga ni parana haro pololilo na harikinga ne Deo.Bakovi i tahoka talinga,ia ge longo ge bole kamumu ra ngava iau a ratea. ⁴⁴ "Harikinga ne Deo i manga tara maki i dia hateka,i manga tara bakovi i puruvisia na tabekena malala ni rata hanina vona.Ia i padikelia malala i ruhulolo tabua ra maki i dia hateka,muri i vano i habitala virika maki vona lakea i hamule valai ia i konea ra tabekena malala iea. ⁴⁵ Manga kunana ra harikinga na hunu i dia hateka i manga bakovi tege ngaru ni kona pel i rike hateka mapana. ⁴⁶ Tuhuna ia i masia tara pel i dia hateka,ia i vano i habi vakuloi a maka maki i tahoka ia i vano bolea moni i konea vona ra pel iea. ⁴⁷ Lakea,ra Harikinga na hunu i manga tara bakovi i ngaru ni lakavu a manu lakea i voro a vuko na naru ia i paru virika manu i mata legelege lae. ⁴⁸ Tahuna i vonu a vuko,lakea a bakovi ni ru a vuko i lalu rikea na bike a vuko.Ia i made i bole virika manu kamumu i ru na kulopi,manu kimi kamumu,ia i vuroki. ⁴⁹ Na ni lobona malala,naro palupu kunana biri bele na maka bakovi,hurika ensel bara ri lilitala hurika bakovi hale na palane hurika bakovi ri malamala. ⁵⁰ Bara ni vuroki puru na kanono dagi re hurika bakovi nga,bara ri hatakia ni madihi dagi ri tangi ri kani a ngine ria." ⁵¹ Pali muri e Isu i nana maea e hurika murimuri vona maea,"Mua mu bole kamumu ra ni ta vakakika iau a ratea ne mua,e?Lakea hurika murimuri vona ri ta maea,"E." ⁵² Isu i taki maea ria,hurika bakovi ri longo kamumu ra maka ni ta vakakika nga lakea ri bele manga murimuri na harikinga ne Deo,ri manga tahona ruma.Tahona ruma i kara ni bole a maki hosi turana maki karaba na ruma na mahala vona. ⁵³ Tahuna e Isu i taki lobo e hurika bakovi a ngatavine pali na maka ni ta vakakika,Isu turane hurika murimuri vona ri pea ra tanga iea ri vano. ⁵⁴ Ri lakea o Nasaret a muritanga ne Isu.Ia i lakea na ruma ni vasileki ne hurika Juda i lakea i tovo e hurika bakovi a ngatavine na ni tane Deo.Tahuna e hurika bakovi a ngatavine ri longoa ngavana ri matai virika mirakel ia i rata,ri turutu hale ri ta,"Ra bakovi iea i bolea vai ra ni luhoi kamumu a ni luhoi turana ni tora ni rata mirakel? ⁵⁵ I muholi ra bakovi iea ia tuna kapenta,e?I muholi e kinana,ia e Maria hurika turana a tara vona e,Jems,Josep,Simion turane Juda, ⁵⁶ turane huriki e mahuruna,ria lobo ri made turane teu koea,e?Pali ia i bolea ra ni luhoi kamumu a niluhoi turana ni tora ni rata mirakel vai?" ⁵⁷ "Ria i mava tamudine ria vona ara maki i rata e Isu,pali e Isu i taki maea ria,"Hurika bakovi a ngatavine na tara ranga na tanga ranga ri kara ni bole kamumua tara profet,pali e hurika tara muholi vona ra profet iea turana vuhutanga,kama ri kara ni bole kamumua." ⁵⁸ Ia kama i rata a mirakel na tabeke nga na rana,kama ri luhoi tora ia.