¹ A mugamuga i nana ria maea,ra makea i muholi?" ² Stiven i taki ria maea,"Hurika turagu turane hurike tata mai,mu ru a tuline mua na ngavagu; bagetua ne Deo i bele kava ne tamane teu e Abraham na tahuna ia i made iea o Mesopotamia muga ne vona ge lakea o Haran, ³ Deo i taki maea,"O pe purua a malala vomu turana tara vomu,pali o vano lakea vona tanga bara vakasiri ioe vona. ⁴ Lakea i pea a malala na maka Kaldia i vano i madi o Hanan,vona ra hini nga muri ne tamana i mate,ia i valai vona malala ri ngane mu made vona. ⁵ Deo kimi habia vona ra tabekena malala,uka,pali lakea i uka tara hini ge karea ni ru langa vahana polomeli vona.Uka,ia i rata ni ta gamai ne vona,ge rata ra e Abraham turana hamona. ⁶ Deo i taki maea ia,hurika hamona bara ri made na tanga tebi na tahuna ranga hurika bakovi a ngatavine na hini nga bara ri voravora tavula na ni rata leho bara ni ratapile hale liu ria biri vano na pida i ravulu polorua. ⁷ Pali,iau bara luhoi kadoa ra tanga dagi na hini e hurika Israel ri made ri rata leho vona,'Deo i ta maea,'muri bara ri pagitala ri turume puruma ne nau na tanga iea.' ⁸ Muri,Deo bari habi a kontrak ni pala kuline Abraham,lakea e Abraham i bele manga tamane Aisak ia i palea kuline na parava i polotolu.E Aisak i bele manga e tamane Jekop i bele manga e tamane hurika mugamuga ri ala ravulu taku a polona i rua. ⁹ Pali ra maka mugamuga nga to hate kapupu ne Josep lakea to ngolia na mahala lakea to habi lakea o Isip,pali e Deo i made turana. ¹⁰ lakea i kolia vona maka ni mava vona.Ia i ngarua e Josep lakea i habia a ni luhoi kamumu ne vona e Josep na matane Fero. ¹¹ Ngane a pago dagi i bele na hini lobo iea o Isip turane Kenan pali a halenga dagi liu i bele,maea e hurika tamane mia i uka tara dala ni matakana maki ni kani. ¹² Pali a tahuna e Jekop i longo maea i tahoka a maki ni kani iea o Isip,ia i rudu e hurika tamane mateu to vano muga na tahuna tou ni matakana maki ni kani. ¹³ Huriki e tamane mia ri vano tabu ni matakana maki ni kani,Josep i ratea ge kavakava ne tou a maka turana turane Fero tara i mata kilala hurika tara ne Josep. ¹⁴ Josep i rudu a maka turana mai tou togo hamule togo takia e tamane Jekop ge valai o Isip,turana maka tara vona lobo,pali a ni gi ne ria i ravulu polorua a polona i lima. ¹⁵ Lakea e Jekop i hamule puru o Isip,ia i turane huriki e tamane mia ri mate. ¹⁶ Ri kalohoa podane Jekop turane huriki e tuna ri lakea o Sekem ni tanu na tanga e huriki ri mate pali a hini i konea na silva na maka tune bakovi ne Hamor Sekem. ¹⁷ Lakea i valai tabukoi a parava ra ni ta gamai bari bele kavakava,ra ni ta gamai e Deo i ratea ne Abraham,hurika tara a bakovi a ngatavine iea o Israel ri bele kupo haleliu iea o Isip, ¹⁸ i vano ge bele tara king ge matakaria e Isip lakea ra king iea kama i lohoka vona e Josep. ¹⁹ Ra king iea i tami e hurika bakovi a ngatavine ne mia i tora ne huriki e tamane mia rigi ru kava e hurika koma kiroko nahani rigi made mahuri. ²⁰ Na tahuna iea e Moses i bele,i kamumu hateka na matane Deo ri matakaria i vano na keva i tolu pololilo na ruma e tamana. ²¹ Tahuna ri ru talea,tune Fero a koma ngatavine i bolea i matakaria lakea i dagi i bele manga bakovi ne vona kunana. ²² Moses i bole a ni tovo na maka ni luhoi na Isip ia i bele dagi hateka na nitana na leho vona tara. ²³ Pali a tahuna i ravulu va a pida vona,ia i rikerike a tamudina ni vano ni matai e hurika turana,hurika tara iea o Israel. ²⁴ Ia i masia tara bakovi i bole a ni hale na limana bakovi tara iea o Isip ia i koria ra Israel i bimatea a bakovi iea o Isip ²⁵ Moses i luhoi maea e hurika turana rigi luhoi maea e Deo i bole mule ria na limana kunana,pali kama ri matakilala. ²⁶ Na parava i muri,ia i bele na maka tara na Israel lakea i matai ria ri ta vagege mule ne ria lakea i ngaru ni vakabele a ni tamudi taku na naro i kamumu lakea i taki ria i ta maea; Huriki a bakovi,i matou a maki turana mai,gera hini tomo rata hale mule matou?' ²⁷ "Pali ra bakovi erei ra bakovi i habi a ni mava na turana,i kope talea e Moses ge vano basi lakea i ta,Erei i pasi ioe go manga matakari ne mia? ²⁸ Ioe o ngaru ni bimate iau,palupu manga ioe o bimatea ra bakovi iea o Isip ravi?' ²⁹ Moses i ha na tahuna ia longoa ra ngava;ia i bele bakovi basi na malala na maka Midia,vonga i bele manga tamana koma bakovi i ala rua. ³⁰ "Tahuna i valai a pida i ravulu va i lobo,tara Ensel i bele ne vona na tanga tavula na Lolo i Sainai,pololilo na kanono na robo. ³¹ Na tahuna e Moses i matai a kanono,ia i turutu hale liu na maki ia i masia;lakea na tahuna ia i lakea tabukoi ni masia,tara ngava i bele na ngavane Viridagi,lakea i ta maea, ³² 'Iau e Deo ne huriki e tamamu, turane Deo ne Abram,ne Aisak,turane Jekop.'Tahuna e Moses i longoa ra ngava iea ia i mangege hale liu lakea ia kama i matanono tabu. ³³ "Viridagi i taki maea e Moses,'Rata voroki a vahapolo na vahamu,na rana a hini o pesi vona a malala kiripiripi. ³⁴ Iau a matai hateka ni mava ne hurika bakovi a ngatavine ne nau ri made iea o Isip;Lakea iau a longo a ni tangi ne ria lakea iau a puru valai ni bole mule ria;ngane ioe o valai,Bara rudoe o lakea o Isip.' ³⁵ "Re Moses ri haba bito vona,na tahuna ri ta, "Erei i pasi ioe ni bele manga matakari turana a bakovi ni luhoi kado?'- re Moses pali ia i rudua e Deo i rudua manga matakari lakea ia bakovi ni bole mule huriki na bavi iea o Isip.Deo i rudua na limana ensel erei i bele ne Moses na robo. ³⁶ Moses i bole ria ri pagitala o Isip,muri ne vona i rata maka mirikel turana kilakila pololilo iea o Isip na dari i vururu,na tanga tavula i vano na pida i ravulu va. ³⁷ "Re Moses kunana erei i taki e huriki a tara iea o Israel maia,'Deo bari vakabelea tara propet na palane mua huriki a turagu,ia bara propet manga iau.' ³⁸ Ra bakovi ia erei ru vakorokoro turana ensel na tanga tavula lakea a ensel i ta turana na lolo Sainai,ra bakovi iea erei i made turane tamane mia,ra bakovi iea i bole a nagava i tahoka ni mahuri ni habi ne mia. ³⁹ "Ra bakovi iea erei e tamane mia kama ri ngaru ni longo a ngavana;pali ri lilitalea ne ria,lakea ri luhoi mule e Isip. ⁴⁰ Na tahuna iea ri taki maea e Aron,'Ratea tara erei e deos ne erei ge muga mia.Na rana re Moses,erei i bole mia pagitala na malala ne Isip,mia kama mi lohoka na ara maki i bele vona.' ⁴¹ Pali ri ratea tara hanuna bulmakau, kiroko ri bole valai a ni habi ri habi na hanuna lakea ri vivi,na rana maki ri ratea na limane ria kunana. ⁴² Pali e Deo i habi a bito ne ria i ru ria ri turume puru ma na maka hada na hunu manga ngava i tabuli na buk ne hurika profet maea.Mua e hurika bakovi a ngatavine iea o Israel,navai mu habi ne nau maka ni habi na livoa mua mu rabalaki na tanga tavula na pida i ravulu va e? ⁴³ Mua mu tamudi taku mu bolea ruma ni turume puru ma ne vone Molek turana hada ne deo Rafan,maka maki mu rata mu lotu vona:bara bole tala basi mua bara mu polotaroa e Babilon; ⁴⁴ "Hurike tamane mia ri tahoka a ruma kape ni turume puru ma na tanga tavula,manga kunana e Deo i ta tora ne Moses,manga hini bara i rata palupu manga a hanuna maki ia i matai. ⁴⁵ Ra makea, a kape ruma ne tamane teu ri bole manga maki ne ria kunana i valai,lakea ri bole turane ria dili iea o Kenan. turane Josua.Na matane huriki e tata mai.Virika maki vona hini nga hurika tara e Deo i lilitala ria na malala ne ria,ia i habi ne huriki e tamane mia manga maki ne ria.Ra kape iea i tabuli turane huriki e tamane mia i vano i bele na parava ne Devit. ⁴⁶ Lakea ia i vorokanea ni ngaru ne Deo lakea ia i nanea e Deo ia ge matakanea tara tanga e Deo ne Jekop bari made. ⁴⁷ Pali e Solomon ia a bakovi erei i rata ruma e Deo. ⁴⁸ " Pali,e Viridagi ia e Deo polomeli liu kama i kara ni made na ruma i ratea bakovi na limana,manga hini ri taki a profet, ⁴⁹ 'Viridagi i ta,'Hunu ia a sia king ne nau, lakea a malala a murigu a pahatata langa vona.A ruma navai i mua mugu ratea nege nau?Na ara tabeke na tanga iau ga malo vona? ⁵⁰ A limagu kama i rata maka maki nga?' ⁵¹ "Mua a tara ni longo taro a ngava kama mu pala kuli na tamudine mua na talinge mua,kama mu rua a Hanu Kiripiripi;ge rata leho vona,na naro mua mu ratea i manga e huriki e tamane mua ri rata hosi. ⁵² Erei e hurika profet e tamane mua kama ri ratapile ria?Hurike tamane mua ri rabalaki e hurika profet erei ri muga valai na bakovi malamala;lakea i ngane mua mu bele manga hurika tara ni ru e hurika bakovi na limana pile mua mu bele manga bakovi ni rabalakia, ⁵³ mua mu bole a lo maka ensel ri vakabele mua kama mu nugutata maka lo." ⁵⁴ Na tahuna e hurika bakovi ni longo maka ngava,ra maka ngava nga i padi a hatena,lakea i madihi a hatena e Stiven. ⁵⁵ Pali e Stiven i vonu na Hanu Kiripiripi, ia i mata rike na hunu ia i masia a bagetua ne Deo;lakea i masia e Isu i pesi na limane Deo a kanena. ⁵⁶ Stiven i ta maea,"Masia,iau a masia hunu i mataka, lakea a masia tuna bakovi i pesi na limane Deo a kanena." ⁵⁷ Ne hurika tara ni longona ngava ri kapikari a tuline,ria ri gale dagi hateka e huriki lobo ri nunu lakea ne Stiven. ⁵⁸ Ri rutalea e Stiven i pagitala na tanga dagi ri padia na kedo.Lakea e hurika bakovi a ngatavine ri matanonoa,ri ru maka varikia ne ria na vahana tara bakovi a ranga e Sol. ⁵⁹ Tahuna ri padia e Stiven na kedo,ia i gale lakea ne Viridagi i ta maea,"Isu e Viridagi o bolea a spirit nau." ⁶⁰ Ia i pasike puru i gale dagi maea,"Viridagi,nahani nugutatea naro hale ne ria."Tahuna ia i ta maea lobo,ia i mate.