¹ Tahuna ri ru palupu a ngava pali maea ria rigi bole a sip rigi lakea o Itali,ri rua e Pol turana maka bakovi na bavi na limana ni mugana opisa na ami a rane e Julias. ² Mia mi rike vona tara sip na tanga dagi e Adramitium i ngaru ni pasi ramai a darine Esia.Lakea mia mi puru na dari.Aristakus iea o Tesalonika iea o Masedonia ia tara i valai turane mia. ³ Na parava tara mi dili na tanga dagi e Sidon,na tabeke nga e Julias i rata kamumua e Pol i rua i vano i matai maka turana ge bole a ni kori ne ria. ⁴ Na tabeke nga mia mi pasi na dari mi pasi haluae a bodu e Saiprus,na rana a vilu i pori dagi i valai mia. ⁵ Tahuna mia mi pasi tabukoi lakea na darine Silisia turane Pamfilia,mia mi rike o Maira tara tanga dagi iea o Lisia. ⁶ Na hini nga ni mugana opisa i masia tara sip iea o Aleksendria i ngaru ni pasi lakea o Itali.Lakea i ru mia mi rike vona ra sip iea. ⁷ Tahuna mia mi pasi kiroko kiroko liu turana ni madihi i kara na parava i kupo lakea muri liu mia mi bele tabukoi iea o Snsidus,a vilu i tukari mia ni ramai ra dala iea,lakea mia mi pasi kapiloho na tanga e Krit,tabeke tara ne Salmon. ⁸ I madihi hateka mia ni pasi ramai a dari i kara mia migi bele vona tara tanga ri galea e Fea Hevens,i tabuli tabukoi na tanga dagi iea o Lasea. ⁹ Mia mi bolea a parava i ola,na tuhuna na maka Juda ri kara ni pile a maki ni kani, i vano pali,ngane i hale liu a dari ni pasi vonga.Lakea e Pol i habi a ni ta matakari maea, "Hurika bakovi,"Iau a matai maea a dala sigi ngaru ni lakea vona,bara si bole a ni hale ni velu vona,kama na mahala na sip kunana,ni mahuri ne teu a bakovi ranga." ¹¹ Lakea ni mugana opisa i ru loboa tamudina na kepten turana tahona sip kama ru luholitorea maka ngava e Pol i rata. ¹² Na rana bris na sip kama i kara ni dili vona na parava na vilu,lakea i kupo maka kepten na sip ri ta kama te kara ni dili,mia bara mi tabana ni pasi i kara mia bara mi bele na tanga dagi iea o Foniks bara ni dava a vilu bari lobo.Ia tara bris na sip iea o Krit,ia i mata lakea maea na limana maurimu na tabekena ni rikea haro na limana kanena na ni rikena haro. ¹³ Tahuna a vilu na limana kanena i vala kiroko kiroko i ramai a ni luhoi na maka kepten ri lalu rikea anka ri pasi ramai a dari ne Krit. ¹⁴ Pali muri na parava i kapo tara vilu dagi, ni gale e hankais,i pori dagi valai ne mia na bodu. ¹⁵ Tahuna a sip i bolea ra ni mava turana vilu kama i kara ni pololele na vilu ge vango,mi pasi kunana ge lobo taro a vilu. ¹⁶ Mi pasi ramai a tanga i kapiloho na bodu kiroko tara ne gale e Kauda,na palana ra ni mava mi koloa ra bout kiroko. ¹⁷ Tahuna a bout kiroko i rike pali,lakea na mota vona ri koloa vona kakaina sip.Ri mangenge a hini mi nunu langa na rakaru iea o Sitis,lakea ri pagea angka i puru na dari mi pasi kunana. ¹⁸ Kimi rehi ne mia vilu turana dari i kule lae mia na parava tara tabu i ri vakatubu ni voroki puru maka kago i puru na dari. ¹⁹ Na parava i tolu ri voroki tabu maka maki na sip i puru na dari. ²⁰ Tahuna a haro turana maka hada kama ri para kamumu na hunu na parava i kupo,a vilu a vala i kule mia,lakea ra ni luhoitora ni kori mule mia i lobo a dala i taku kunana mia migi pea sip migi vano. ²¹ Tahuna kama ri kani ri made tabaka kunana,Pol i pesi na palane ria i ta,"Maka bakovi,iau a taki mua ni made iea o Krit,pali kama mu longo toto iau si valai,masia bara si hale si velu. ²² Mavonga iau bara habi a ngava ni vaka tora na ni luhoi ne mua.Na rana ge uka tara ni mahuri ge velu,pali a sip kunana maki ge velu. ²³ Na rodo rira tara ensel ne Deo iau a vasileki vona,ensel i pesi tabukoi nau. ²⁴ lakea i ta,'Nahani mangenge,o vano o pesi na matane Sisa,lakea o masia,Deo i vakasiria ni dodo vona ne vomu turana maka bakovi a ngatavine ri pasi turamu.' ²⁵ Mavonga mua maka turagu,mu pesi tora,na rana iau a luhoitora ne Deo ia bari bele manga hini takau. ²⁶ Pali tege nunu langa vona ranga bodu." ²⁷ Tahuna mia mi pasi i vano na rodo ravulu taku a polona i va,i kule mia vilu i taparaki mia na dari ne Adriatik.Na kururodo na maka voravora na sip ri hataki maea ri bele tabukoi na malala. ²⁸ Lakea ri bolea mota ri voroki purua na dari ri matai maea 40 mita ri vano papote ri ru tabua ri matai maea i 30 mita tabu. Lakea ri mangenge ra sip biri koro na maka kedo,lakea na mapana sip ri voroki puru a anka i va ri vasileki maea ge palala laviriri a hini. ³⁰ Maka voravora na sip ri matakana dala rigi hataroa sip rigi ha ri ru puru maka bout kiriko i puru na dari,lakea ri tatami maea rigi voroki puru maka anka ge puru na dari. ³¹ Pali e Deo i takia ni mugana opisa turana nugu maheto maea,"Pali ra maka bakovi rigi tabana na sip,kama mugu kori mule mua." ³² Lakea maka nugu maheto ri palakudu maka mota na bout ri boru puru na dari ri pasi ri vano. ³³ Na tahuna i palala hiningi, e Pol i taki ria rigi bole ranga maki ni kani.Ia i tamaea," Teu te valai na parava i ravulu a polona i va ne teu koma te kani. ³⁴ Pali Iau a nana mua mugu vaveru ranga maki ni kani,ne mua mugu made.Pali bari uka tara ne mua ge velu a vuna na gina." ³⁵ Tahuna i taki ra hininga, i bole a bret i ta kamumu ne Deo na matane huriki lobo.Muri i kevea bret pali ri vaka tubu ni kani. ³⁶ Muri ria lobo ni taki ria na maka ngava pali ria ranga ri bole ri kani. ³⁷ Mia mi ala 276 polomeli na sip. ³⁸ Tahuna ri kani ri maru,ria ri voroki tala ranga wit puru na dari rigi rata sip ge maraha. ³⁹ Natuna i palala,ria komaa ri mata kilalea malala,pali ria ri masia bala a bike,pali ria ri vata maea rigi dili vona ra hininga. ⁴⁰ Pali ria ri palakudu a maka mota ni nugu tata sip ri voroki puru na dari.Vona ra hiningi ri palakudu a maka mota na rada pali tugu rikea mapana sel i lakea na vilu pali ri dili. ⁴¹ Pali a sip i rike na rakaru pali vililoi lae.Pali koma i kara ge vano,pali a sten vona i rata pilea ni tora na dari i tarebo lae. ⁴² Pali e huriki a nugu maheto ri vata rigi bimate a maka bakovi ri made na bavi pali ge uka tara ne ria ge huru ge ha. ⁴³ Pali a mugamuga na maka nugu maheto ia i ngaru ni koria e Pol,pali mavonga i ta kari ne tou;pali taki e huriki erei ri palala ni huru rigi to muga rigi huru dili na malala. ⁴⁴ Pali muri e huriki ranga bari muri,ranga bari pasi langa na palang pali ranga na maki na sip.Ne vona ra hininga kunana mia lobo mi bele kamumu na malala.