¹ Ipalagipmo kadakuada nga agpasakupda kadagiti agtuturay ken agtuturay, agtulnogda kadakuada, sisasaganada iti tunggal naimbag nga aramid, ² dida insultuen ti siasinoman, saanda a magagaran a makiinnapa, ken agbalinda a naalumamay, nga ipakitada ti amin a kinapakumbaba iti tunggal maysa. ³ Ta iti naminsan ket nagbalintayo nga awanan ti pannakaawat ken nasukir. Naiyaw-awantayo ken nagbalin nga adipen dagiti nadumaduma a tarigagay ken ragragsak. Nagbiagtayo iti dakes ken apal. Nakadakdakestayo ken aggiginnuratayo ti maysa ken maysa. ⁴ Ngem idi agparang ti kinaimbag ken panagayat ti Dios a Mangisalakan kadatayo, ⁵ saan a babaen kadagiti aramid iti kinalinteg nga inaramidtayo, ngem babaen ti asina nga insalakannatayo. Insalakannatayo babaen iti panagbuggo iti baro a pannakaiyanak ken pannakapabaro babaen iti Espiritu Santo. ⁶ a sibabaknang nga inbukbok ti Dios ti Espiritu Santo kadatayo babaen iti Manangisalakantayo a ni Jesu-Kristo. ⁷ Inaramidna daytoy tapno iti pannakapalinteg babaen iti paraburna ket agbalintayo a paset iti namnama iti biag nga agnanayon. ⁸ Daytoy a mensahe ket mapagtalkan. Kayatko nga agsaoka a sitatalged maipanggep kadagitoy a banbanag, tapno dagidiay agtalek iti Dios ket mapapigsada kadagiti nasayaat nga ar-aramid nga ikabilna iti sangoananda. Dagitoy a banbanag ket nasayaat ken pakagungunaan kadagiti amin a tattao. ⁹ Ngem liklikam dagiti minamaag a panagiinnapa ken naggapuan ti puli ken saan a panagtutunos ken panagririri maipanggep ti linteg. Dagidiay a banbanag ket awan pategna ken awan pakagungunaanna. ¹⁰ Liklikanyo ti siasinoman nga agar-aramid iti pakaigapuan iti panagsisina kadakayo, kalpasan iti maysa wenno dua a ballaag, ¹¹ ken ammom a ti kasta a tao ket timmallikod manipud iti umiso a dalan ken agbasbasol ken dusdusaenna ti bagina. ¹² No ibaonko ni Artemas wenno ni Tikicos kenka, pardasam ken umayka kaniak idiay Nicopolis, nga isu iti ingkeddengko a pagpalabasan ti panawen ti lammiis. ¹³ Partakam ket ibaonmo ni Zenas ti nalaing iti linteg ken ni Apolos, tapno awan ti pagkuranganda. ¹⁴ Masapul a sursuruen dagiti tattaotayo ti makipaset iti bagbagida kadagiti nasayaat nga aramid a mangipaay kadagiti napateg a kasapulan, ket ngarud saanda nga mabalin a di agbunga. ¹⁵ Amin a kakadduak ket kablaawandaka. Kablaawam dagidiay mangay-ayat kadatayo iti pammati. Parabur ti umadda kadakayo amin.