¹ Ni Pablo, maysa nga adipen ti Dios ken apostol ni Jesu-Cristo, para iti pammati dagiti napili a tattao ti Dios ken ti pannakaammo iti kinapudno nga umanamong iti kinanasantoan, ² nga addaan iti sigurado a namnama a biag nga agnanayon nga inkari ti Dios, a saan nga agulbod, naikari sakbay ti amin a panawen ³ Iti umno a tiempo, inwaragawagna ti saona babaen iti mensahe nga intalekna kaniak nga idanonko babaen ti bilin ti Dios a mangisalakantayo. ⁴ Kenka Tito, maysa a pudno nga anak a lalaki iti kadawyan a pammatitayo. Parabur, asi, ken kapia manipud iti Dios Ama, kenni Kristo Jesus a manangisalakantayo. ⁵ Gapu iti daytoy a panggep nga imbatika idiay Creta, tapno maiyurnosmo dagiti banbanag a saan pay a nalpas, ken mangdutok kadagiti panglakayen iti tunggal siudad kas imbilinko kenka. ⁶ Ti maysa a panglakayen ket masapul nga awan pakababalawanna, asawa a lalaki iti maysa a babai, addaan iti napudno nga annak a saan a maibilang a kas nadangkes wenno saan a disiplinado. ⁷ Kasapulan para iti agay-aywan, kas mangimatmaton iti bumalay ti Dios, nga awan pakababalawanna. Masapul a saan isuna a naariwawa wenno saan a maanawa. Masapul a saan isuna a nalaka nga agpungtot, saan a naigamer iti arak, saan a mannakiriri, ken saan a naagum a tao. ⁸ Ngem ketdi, masapul a managsangaili isuna, maysa a gayyem ti naimbag. Masapul a nanakem isuna, nalinteg, nadiosan, ken managteppel. ⁹ Masapul a tenglenna a sititibker ti mapagtalkan nga mensahe a naisuro, tapno mabalinna a papigsaen dagiti dadduma babaen iti napudno a sursuro ken mailintegna dagiti bumusbusor kenkuana. ¹⁰ Ta adu dagiti nasukir a tattao, awan mamaayna nga panagsasao ken manangallilaw, nangnangruna dagidiay adda iti pannakakugit. ¹¹ Kasapulan a mapasardeng isuda. Isursuroda dagiti saanda koma nga isuro para iti nakababain a gunguna ken riribukenda dagiti sibubukel a pamilia. ¹² Kinuna ti maysa kadagiti bukodda a propeta, "Dagiti taga -Creta ket kanayon a managulbod, dakes ken napeggad nga ay-ayup, ken sadut a nararawet." ¹³ Pudno daytoy a pamaneknek. Ngarud,ilintegmo isuda a siiinget, tapno agbalinda a napudno iti pammati, ¹⁴ a saanda nga asikasuen dagiti sarsarita dagiti Judio wenno kadagiti bilin dagiti tattao a mangtallikud iti kinapudno. ¹⁵ Kadagiti nadalus, amin a bambanag nadalusda. Ngem kadagiti narugit ken saan a mamati, awan ti nadalus, ngem agpada a nadadael ti panunotda ken ti konsiensiada. ¹⁶ Ibagbagada nga ammoda ti Dios, ngem ilibakda isuna babaen kadagiti aramidda. Nakababain, nasukir ken awan serserbida iti aniaman a naimbag nga aramid.