¹ Ammomi a no ti naindagaan a pagtaengan a pagnanaedanmi ket nadadael, adda ti patakdermi manipud iti Dios. Maysa a balay daytoy a saan nga inaramid dagiti ima iti tattao, ngem maysa nga agnanayon a balay idiay langit. ² Ta iti daytoy a tolda, umas-asug kami, kayatmi la unay ti makawesan iti nainlangitan a pagtaenganmi. ³ Kayatmi ti maaddaan iti daytoy gapu ta babaen iti panangikawesmi iti daytoy, saandakaminton a masarakan a lamolamo. ⁴ Ta pudno a kabayatan nga addakami iti daytoy a tolda, umas-asug kami a madagdagsenan. Saanmi kayat ti maussuban. Ngem ketdi, kayatmi ti makawesan, tapno ti matay ket mabalin a tilmunen iti biag. ⁵ Ti nangisagana kadakami para iti daytoy a banag ket ti Dios, a nangted kadakami ti Espiritu a kas kari ti dumtengto. ⁶ Ngarud kankanayonkami a natalged. Ammomi a kabayatan nga agnanaedkami iti daytoy a bagi, adayokami iti Apo. ⁷ Ta magmagnakami babaen iti pammati, saan a babaen iti panagkita. ⁸ Isu nga addaankami iti kinatalged. Kaykayatmi pay nga adayokami iti bagi ken adda iti denna ti Apo. ⁹ Isu nga ikagumaanmi, addakami man iti pagtaenganmi wenno iti adayo, nga ay-ayoen isuna. ¹⁰ Ta masapul a dumatagtayo amin iti sango iti tugaw iti pangukoman ni Kristo, tapno maawat iti tunggal maysa ti maikari para kadagiti banbanag nga inaramidna iti bagi, para iti pagsayaatan man wenno pagdaksan. ¹¹ Ngarud, gapu ta ammomi ti panagbuteng iti Apo, allukoyenmi dagiti tattao. Ti kinasiasinomi ket nalawag a makita ti Dios. Namnamaek a nalawag met daytoy kadagiti konsensiayo. ¹² Saandakayo manen nga al-allukoyen tapno kitaendakami a kas napudno. Ngem ketdi, ik-ikkandakayo iti rason a mangipannakkel kadakami, tapno adda maisungbatyo kadagidiay nga agpaspasindayaw iti maipapan iti langa ngem saan a no ania ti adda iti puso. ¹³ Ta no awan kami iti nasayaat a panunot, daytoy ket maipaay ti Dios. Ket no adda kami iti umiso a panunot, daytoy ket maipaay iti pagimbaganyo. ¹⁴ Ta ti ayat ni Kristo ti mangparparegta kadakami, agsipud ta awan duaduami iti daytoy: nga adda maysa a tao a natay maipaay iti amin, ket isu ngarud a natay ti amin. ¹⁵ Ken natay ni Kristo para iti amin, tapno dagiti agbibiag ket saandan nga agbiag para kadagiti bagbagida. Ngem ketdi agbiagda koma para kenkuana a natay ken napagungar. ¹⁶ Gapu iti daytoy, manipud ita, saankamin a mangukom iti siasinoman segun iti pangrukudan iti tao, uray no inaramidmi idi daytoy a wagas kenni Kristo. Ngem ita saanmin nga uk-ukomen ti siasinoman iti kastoy a wagas. ¹⁷ Ngarud, no adda ti siasinoman kenni Kristo, isuna ket maysa a baro a parsua. Napukawen dagiti daan a banbanag. Kitaenyo, nagbalindan a baro. ¹⁸ Naggapu amin dagitoy a banbanag iti Dios. Inkappianatayo kenkuana babaen kenni Kristo, ken intedna kadatayo ti ministerio a panangikappia. ¹⁹ Dayta ket, babaen kenni Kristo, ituntunos ti Dios ti lubong kenkuana, saanna a bilbilangen dagiti panaglablabsingda a maibusor kadakuada. Italtalekna kadatayo ti mensahe iti panangikappia. ²⁰ Isu a nadutokankami a kas mangibagbagi ni Kristo, a kasla agpakpakaasi ti Dios babaen kadakami. Agpakaasi kami kadakayo, maipaay kenni Kristo: "Makikappiakayo iti Dios." ²¹ Pinagbalinna ni Kristo a daton para iti basoltayo. Isuna ti saan a pulos a nagbasol. Inaramidna daytoy tapno agbalintayo a kinalinteg iti Dios kenkuana.