¹ Ni Pablo nga apostol ni Kristo Jesus babaen iti pagayatan ti Dios, kenni Timoteo a kabsattayo, kadagiti iglesia ti Dios nga adda idiay Corinto ken kadagiti amin a namati iti entero a rehion ti Acaya. ² Maadda koma kadakayo ti parabur ken kappia manipud iti Dios nga Amatayo ken ti Apo tayo a ni Jesu- Kristo. ³ Mapadayawan koma ti Dios ken Ama ni Apotayo a Jesu-Kristo. Isuna ti Ama ti asi ken Dios ti amin a liwliwa. ⁴ Liwliwaennatayo ti Dios kadagiti amin a pagrigatantayo tapno maliwliwatayo dagidiay marigrigatan. Liwliwaentayo dagiti sabali iti isu met laeng a liwliwa nga inusar ti Dios a nangliwliwa kadatayo. ⁵ Ta no kasano karigat ti panagsagaba ni Kristo gapu kadatayo, kasta met ti liwliwatayo babaen kenni Kristo. ⁶ Ngem no maparigatkami, daytoy ket maipaay iti pannakaliwliwa ken pannakaisalakanyo. Ken no maliwliwakami, daytoy ket maipaay iti pannakaliwliwayo. Nabileg nga agtrabtrabaho ti liwliwayo no siaanuskayo a makibingay kadagiti sagsagaba a sagsagabaenmi met laeng. ⁷ Ken ti panagtalekmi kadakayo ket pudno. Ammomi a kas makibingbingaykayo met kadagiti panagsagaba, makibingbingaykayo met iti liwliwa. ⁸ Ta saanmi a kayat nga agbalinkayo a nakuneng, kakabsat, maipapan kadagiti riribukmi idiay Asia. Naparigatkami a naan-anay a nalablabes pay ngem iti kabaelanmi, iti kasta unay a saanmi payen a ninamnama ti agtultuloy nga agbiag. ⁹ Pudno, naikeddeng kadakami ti pannakatay. Ngem naaramid dayta tapno saankami nga agtalek iti bagbagimi, ngem ketdi, iti Dios, a mangpapaungar kadagiti natay. ¹⁰ Inispalnakami manipud iti makapatay a peggad ket ispalennakaminto manen. Inkabilmi ti panagtalekmi kenkuana nga isalakannakaminto manen. ¹¹ Aramidenna daytoy kas tultulongandakami met babaen iti kararagyo. Kalpasanna, adunto ti agyaman iti biangmi para kadagiti pabor a naited kadakami babaen kadagiti kararag dagiti adu a tattao. ¹² Ipagpannakkelmi daytoy: ti pammaneknek ti konsensiami. Ta nagbiagkami ditoy lubong babaen iti nadalus a panggep ken nadiosan a kinapudno. Inaramidmi daytoy a nangnangruna kadakayo, ken saan a babaen iti nainlubongan a kinasirib, ngem ketdi, babaen iti parabur ti Dios. ¹³ Saankami nga agsursurat kadakayo iti aniaman a banag a saanyo a mabasa wenno maawatan, ken namnamaek a maawatanyo koma a naan-anay ¹⁴ a kas naawatandakami kadagiti daduma a paset, ken agtalekak nga iti aldaw ni Apotayo a Jesus, dakaminto ti pakaigapuan ti panagpannakkelyo, a kas dakayo met kadakami. ¹⁵ Gapu ta natalgedak maipapan iti daytoy, kayatko ti umay kadakayo nga umuna, tapno maawatyo ti pagimbagan ti mamindua a pannakasarungkar. ¹⁶ Pangpanggepek a sarungkarankayo iti dalanko a mapan idiay Macedonia. Kalpasanna, kayatkayo manen a sarungkaran inton agsubliak nga aggapu idiay Macedonia, ket kalpasanna matulungandak a mapan idiay Judea. ¹⁷ Idi agpanpanunotak iti kastoy a wagas, agduaduaak kadi? Pangpanggepek kadi dagiti banbanag segun iti pangrukodan iti tao, tapno ibagak a "Wen, Wen" ken "Saan, Saan" iti agpada a tiempo? ¹⁸ Ngem kas napudno ti Dios, saantayo nga agpada nga ibaga ti "Wen" ken "Saan." ¹⁹ Ta ti Anak ti Dios, a ni Jesu-Kristo, nga inwaragawagmi kada Silvano ken Timoteo kadakayo ket saan a "Wen" ken "Saan." Ngem ketdi kanayon isuna a "Wen". ²⁰ Ta amin a karkari ti Dios ket "Wen" kenkuana. Kasta met a babaen kenkuana ket ibagatayo ti "Amen" iti dayag ti Dios. ²¹ Ita, patpatalgedennakami ti Dios kadakayo kenni Kristo ken dinutokannakami. ²² Inkabilna ti seliona kadakami ken intedna ti espirituna kadagiti pusomi a kas pammatalged iti itednanto kadakami. ²³ Ngem ketdi, awagak ti Dios a mangpaneknek kaniak a ti rason a saanak nga immay dita Corinto ket tapno mailisikayo. ²⁴ Daytoy ket saan a gapu ta padpadasenmi a tenglen ti pammatiyo. Ngem ketdi, makipagtrabtrabahokami kadakayo maipaay iti rag-oyo, kas agtaktakderkayo iti pammatiyo.