¹ Ni Pedro, maysa nga apostol ni Jesu-Kristo, kadagiti ganggannaet iti naiwaras, dagiti napili, iti intero a Ponto, Galacia, Capadocia, Asia, ken Bitinia. ² Daytoy ket maibatay iti pannakaammoda iti Dios nga Ama, babaen iti panangpasanto ti Espiritu Santo, para iti panagtulnog kenni Jesu -Cristo, ken para iti pannakaiwarsi iti darana. Umadu koma kadakayo ti parabur ken talna. ³ Madaydayaw koma ti Dios nga Ama ni Apotayo a Jesu-Kristo! Gapu iti dakkel nga asina, intedna ti baro a pannakayanak para iti sibibiag a namnama babaen iti panagungar ni Jesu-Cristo manipud ken patay ⁴ para iti maysa a tawid a saanto a mapukaw, saanto nga aglati, ken saanto nga agkupas. Naireserba idiay langit para kadakayo. ⁵ Nasalaknibankayo babaen iti pannakabalin ti Dios babaen iti pammati para iti pannakaisalakan a nakasagana a maiparangarang iti maud-udi nga al-aldaw. ⁶ Agragsakkayo iti daytoy, uray pay ita, ket kasapulanyo ti agsagaba iti nadumaduma a pannubok iti bassit laeng a tiempo. ⁷ Tapno mapadas ti pammatiyo, a napatpateg pay ngem balitok a madadael, uraynu masubok dayta babaen iti apuy. Mapasamak daytoy tapno ti pammatim ket agbanagto iti pammadayaw, dayag ken dayaw iti pannakaiparangarang ni Jesu-Kristo. ⁸ Saanyo isuna a nakita, ngem ay-ayatenyo isuna. Saanyo isuna a makita ita, ngem mamatikayo kenkuana ket maragsakankayo unay nga addaan ti saan a maiyebkas a rag-o a napno iti dayag. ⁹ Aw-awatenyo itan ti pagbanagan ti pammatiyo, ti pannakaisalakan dagiti kararuayo. ¹⁰ Maipapan iti daytoy a pannakaisalakan, dagiti mammadto a nangipadto maipapan ti parabur nga umay kadakayo, sipapasnek a nagsukimat ken siaannad a nagsukimat, ¹¹ sinukimatda nu siasino ken kaano ti panangipakita ti Espirito ni Kristo nga adda kadakuada idi impakaammona kadakuada dagiti panagsagaba ni Kristo ken ti dayag a sumaruno kadagitoy. ¹² Naiparangarang daytoy kadakuada a saanda nga agserserbi iti bagbagida, no diket dakayo, idi nagsaoda kadagiti banag nga imbaga ita kadakayo dagiti nangikasaba iti ebanghelio kadakayo babaen ti Espiritu Santo manipud langit , bambanag nga il-iliwen dagiti anghel a kitaen. ¹³ Isu a sisasagana ti nakemyo. Ken patibkerenyo ti panagpanpanunotyo. Maaddaankayo iti naan-anay a namnama iti parabur a maitedto kadakayo iti pannakaiparangarang ni Jesu- Kristo. ¹⁴ Kas natulnog nga annak, saanyo a suroten dagiti tarigagayyo a sinurotyo idi awan pay pannakaammoyo. ¹⁵ Ngem kas iti nangayab kadakayo ket nasantoan, agsantokayo met iti amin a kababalinyo iti biag. ¹⁶ Ta naisurat, ''Agsantokayo, gapu ta siak santoak.'' ¹⁷ Ket no aw-awaganyo iti ''Ama'' daydiay mangukom a di mangidumduma ken mangukom iti tunggal maysa sigun ti aramidna, agtultuloykayo nga agbiag a buyogen ti buteng bayat ti tiempo a panagnaedyo ditoy a kas gangganaet. ¹⁸ Ammoyo a saan a babaen ti madadael a pirak wenni balitok a nasubbotkayo manipud iti awan serserbina a kababalin a natawidyo kadagiti kapuonanyo, ¹⁹ ngem nasubbotkayo babaen iti napateg a dara ni Kristo, kas maysa a kordero nga awan pakapilawanna ken awan mulitna. ²⁰ Napilin ni Kristo sakbay ti pannakaparsua ti lubong, ngem ita kadagitoy maud-udi a tiempo, naiparangarang isuna kadakayo. ²¹ Namatikayo iti Dios babaen kenkuana, a pinagungar ti Dios manipud iti patay ken intedna kenkuana ti dayag tapno iti pammati ken talekyo ket addada iti Dios. ²² Inaramidyo a nadalus dagiti kararuayo babaen iti panagtulnogyo iti kinapudno. Daytoy ket para iti napudno a nainkabsatan nga ayat, isu nga agiinayatkayo a sipupudno manipud iti nadalus a puso. ²³ Naiyanakkayo manen, saan a manipud iti bukel nga agrupsa, ngem manipud iti bukel a saan nga agrupsa, babaen iti sibibiag ken agtaltalinaed a sao ti Dios. ²⁴ Ta ''isu-amin a lasag ket kasla ruot, ket ti amin a dayagna ket kasla sabong ti ruot. Malaylay ti ruot ken agtinnag ti sabong, ²⁵ ngem ti sao ti Apo ket agtalinaed nga agnanayon.''