1 To asamblea ri ané a lebandá, y a yebá a Jesús flende a Pilato. 2 Ané a komensá a akusá a ele, chitiando: "A enkontrá é ombe a tá dañá nasió suto, ke a nú rejá ndá tributo a Sésar, y a disí ke Éle memo sendá Kristo, un rey." 3 Pilato a prundá, i a disí "¿Sendá bo Rey ri má Judíos?" Y Jesús a kotestá y a disí: "Bo a chitialo." 4 Pilato a disí a má prinsipales saserdotes y má chochá ri jende: " I a enkontrá fatta endi é ombe nú." 5 Poro ané taba insistí, chitiando: " Éle alborotá jende, insiñando po to Judea, a komensá endi Galilea y tambié endi é paraje." 6 Asina ke kuandí Pilato a kuchá eto, a prundá si é ombe jueba ri galilea. 7 Kuandí a deskubrí ke Éle taba bajo autorirá ri Ereodes, a mandá a Jesús a Erodes, kié tambié taba endi Jerusalén endi é ría. 8 Kuandí Erodes a miná a Jesús, i a ndá gutto, pokke éle a keleba miná a ele po un chochá ri tiembo. Ele a kuchá sobre Éle y a eperá minalo asé aggú milagro ngande. 9 Erodes a prundá a Jesús un chochá ri kusa, poro Jesús nú a kotestá ná. 10 Má prinsipá Saserdotes y eskribas a palá, akusandole kú biolensia. 11 Erodes kú soldao sí a insultalo, y a bulá si Éle, y a bitilo kú chepa emosa, repué a mandalo uto bé kú Pilato. 12 Erodes y Pilato asé kombilesa é ría memo (Tiembo atrá ané sendá enemigo) 13 Repué Pilato a yamá a má prinsipá saserdotes y a má kanmaján y un chochá ri jende, 14 y a disí: "Enú a tree a é ombe kumo uno ke a dirigí jende asé kusa nú kaiko, y guatiá, i, asé kuestionao flende a enú, i a enkontrá fatta nú endi é ombe sobre kusa po kuá enú a akusá ele. 15 Nú, ni Erodes, po lo ke a mandá uto bé a suto, y guatiá, ná ke a merese muette poleba asé echo po Éle. 16 "I, po e to, a katigalo y a sottalo." 17 Pilato taba obligao a sottá a má judíos un jende preso endi fiesta. 18 Poro ané a gritá to, chitiando: "¡Juela kú é ombe, y sottá a Barrabás!" 19 Barrabás jueba un ombe ke a tá puetto endi tramakuá po rebelió endi siurá i po matá jende. 20 Pilato a dirijí a ané uto bé, reseando sottá a Jesús. 21 Poro ané a gritá, chitiando: "Krusifikalo, Krusifikalo." 22 Ele a disí a ané una tersera bé: ¿Po ke? ¿Ke kusa mala asé é ombe? Nú a enkontrá ná endi Éle ke mereska pena ri muette. Po eto, repué ri katigo, i a sottalo." 23 Poro ané jueba lo ke a insistí kú kutú ri boso, piriendo ke Éle jueba krufikao. Y boso sí a kombesé a Pilato. 24 Asina ke Pilato a desidí ndá lo ke ané tá pirí. 25 Ele a sottá a ke ané tá pirí, kuá taba puetto endi tramakuá po rebelió y kitámbila a jende. Poro a entregá a Jesús a Boluntá ri ané. 26 Miendla a yebalo afuela, agalá a Simón ri Sirene, ke a miní ri kampo, y a poné krú sobre ri ele pa ke ele a kaggála, A siguí a Jesús. 27 Un chochá ri jende y ri muhé kié a tá yolá y a lamentá po Éle, a siguilo. 28 Poro Jesús a miná a ané, i a disí: "Moná ri Jerusalén, nú yolá po i, yolá po enú memo y po moná sí. 29 Pué miná, a miní ría endi kuá ané a disí: 'Lilenga má jende ke nú polé tén moná o a kriá uno. 30 Repué ané a komensá a disí a má montañas: 'Kaí sobre suto,' y a má kopito: 'Kubrí to suto.' 31 Pué si asé é kusa miendla árbol tá berde, ¿ke a pasá kuandí at tá seko?" 32 Uto ombe, bilingó kriminá, jueba yebao kú Éle pa sé muetto. 33 Kuandí a yegá a paraje ke asé yamá "Kalabera", aí ané asé krusikao jundo a má kriminá, uno a rerecha y uto a ikiedda. 34 Jesús a disí: "Tatá, peddoná ané, pokke ané nú sabé lo ke asé." Y ané ichá suette, patiendo bitilo sí. 35 Jende a pemmanesé guatiando miendla má kamaján tambié a bulá ri Éle, chitiando: "Éle a sabbá uto. Sabbá a bo memo, si Éle sendá Kristo ri Rioso, Ekogió." 36 Má soldao tambié a bulá ri ele, y asekka a Éle, ofresiendo binagre, 37 y chitiando: "Si bo asé Takurimbo ri má judíos, sabbá a bo memo." 38 Tambié asé un kartel sobre Éle: " Ete sendá takurimbo ri má judíos." 39 Uno ri má kriminá kié taba krusifikao, a insultalo, chitiando; " ¿Nú sendá bo Kristo? Sabbá bo memo y a suto." 40 Poro uto a respondé: "¿Akaso nú tén mierdo a Rioso sí, ya ke tá bajo memo kondena ke suto? 41 Suto tá akí po ke a mereselo po to kusa lo ke asé. Poro é ombe nú asé ná nú kaiko." 42 Y ele añadí: "Jesús, kolá ri mí kuandí a miní reino ri bo." 43 Jesús a disí: " Ri belá belá I a disí, agüe bo a tán kú i endi paraíso." 44 Aora jueba kumo ora sesta y okurana a miní sobre to tiela asta ora nobena 45 miendla ke lú ri só a okuresé. Antonse kortina ri masiruma a lompé po mitá. 46 Jesús a gritá kú kutú, I a disí: "Tatá, endi mano ri bo a enkomendá epíritu mí." Kuandí a disí eto, a lungá. 47 Kuandí senturión miná lo ke a susedé, ele a glorifiká a Rioso, chitiando: "Seguro ete sendá un ombe jutto." 48 Kuandí to má chochá jende kiene a tá reunió a presensiá é ebento a miná má kusa ke asé, ané a regresá ndando bindaso endi pecho sí. 49 Poro to kunosió sí y má muhé kiene a siguí renje Galilea a mantené lejo, guatiando é kusa. 50 Aora abé un ombe ke asé yamao José, ke a pettenesé a Konsilio, un ombe kaiko y jutto 51 (ele nú taba ri akueddo kú desisió y kusa lo ke a pasá), ele kuá jueba Arimatea endi Judea, ele taba epera po reino ri Rioso. 52 É ombe, asekka a Pilato, a pirí kueppo ri Jesús. 53 Ele a bajalo y a enbobelo endi lino fino y a kolokalo endi tumba ke abia kortada endi piegra, andi narie taba kolokao ante. 54 Sendá Ría ri Preparasió y ría ri reposo taba po kumensá. 55 Má muhé, kiene a salí kú Éle ri Galilea, a siguilo repué y a miná tumba y kumo kueppo jueba puetto. 56 Ané a bobbé a posá sí y a prepará pomada. Repué, endi ría ri reposo ané a deskansá ri akueddo a mandamiendo.