¹ TÖ̧Ä̧NÄ̧HUA̧ O'cajuiyunä̧ ju̧ru̧huamä̧pi̧yȩ huȩnȩ ucuocumä pä'inö: '' ² TÖ̧Ä̧NÄ̧HUA̧ O'cajuiyunä ju̧ru̧hua̧mä̧, pi̧yȩ pä'ö; ¡Sión ttö̧ja̧rö̧ repeda'attö rö̧ä̧nä̧ ä'cuoyäusä ja̧'hua̧ta̧'a̧nö̧ jahuäjuru repeda'attö rö̧ä̧nä̧ chämisuräcusä. ³ TÖ̧Ä̧NÄ̧HUA̧ O'cajuiyunä ju̧ru̧hua̧mä̧, pi̧yȩ pä'ö: Ttömä ppa̧dä̧chä̧cua̧sä̧ Siónnä juȩnȩ Jerusalénnätä̧ chujä̧cua̧sä̧, ja̧'hua̧'a̧nö̧ ja̧'a̧ttö̧ Jerusalénmä isopäi'önä ötahuiyä pä'ö ottäcuome Ja̧'hua̧ta̧'a̧nö̧ TÖ̧Ä̧NÄ̧HUA̧ O'cajuiyunä̧ Ju̧ru̧hua̧ttö̧ mö̧ä̧'camä suroju juiyu möä'ca pä'ö ottäcuä'ca. ⁴ Bu̧'osä̧ Ja̧'hua̧ta̧'a̧nö̧ Busaju'inä pä̧'ä̧chö Ja'roö̧nä̧ ttö'äcuö̧tö̧ Jerusalén, plazannä̧, ttöttä'ca jue'ecu ya̧u̧cu̧nä̧ Juä'amä̧ ru̧'a̧nä̧ ttöhuäcuächä'attö ja̧'a̧ttö. ⁵ Ppo̧'ä̧ttö̧ u̧mä̧tö̧ ppo̧'ä̧tö̧ nä̧tö̧'i̧nä̧ ttirecuähuotö juȩnȩ järe'äcuähuömȩmä̧ Ötahuiyättö̧; Ja̧'hua̧'a̧nö̧ ja̧'a̧ttö̧ Juȩnȩtä̧ tti'ärehuähuottö. ⁶ TÖ̧Ä̧NÄ̧HUA̧ o'cajuiyönä ju̧ru̧hua̧mä̧ pi̧yȩ pä'ö: ¿Ji̧yȩnö̧ mo̧ro̧ pitö totte'ächa'anä ka̧cui̧pi̧nä̧tö̧ttö̧ tottomenä ji̧yȩtȩ jȩttö̧ juiyö'anö̧ i̧jȩcuä̧chö̧ttö̧mä̧, Ttö'inä i̧jȩcuä̧cha̧'a̧ tochöttö'inä jȩttö̧ juiyö'anö jä̧cuȩ? Pä'ötó TÖ̧Ä̧NÄ̧HUA̧MÄ̧. ⁷ TÖ̧Ä̧NÄ̧HUA̧ o'cajuiyönä ju̧ru̧hua̧mä̧ pi̧yȩ pä'ö: ¡Topätucuittö, Täcö tö'cö ja̧'a̧ mo̧ro̧ päia'a'inä, nipä̧cho̧mȩnä̧'inä pi̧jä̧nä̧ttö̧mä̧ chi̧tti̧mö̧rö̧ surojöttö ttö̧ji̧pö̧nä̧ ppädäda pä'ömä! ⁸ ¡Ja̧'hua̧nö̧ ja̧'a̧ttö̧ Ttömä jahuätörömä ppa̧dä̧dä̧cua̧sä̧ ja̧'hua̧nö̧ jo̧mȩnä̧ jahuätömä Jerusalén kä'co jo̧mȩ ttö̧jä̧cuo̧tö̧, ja̧'hua̧nö̧ ja̧'a̧ttö̧ jahuätömä Ttö chi̧tti̧mö̧ ttäcuotö ja̧'hua̧ta̧'a̧nö̧ Ttömä pä'äjita'anö isopäi'önä'i̧nä̧ jueö huȩnȩnä̧'inä ttu̧ru̧hua̧ Dios jö̧nä̧ chä̧cua̧sä̧! ⁹ TÖ̧Ä̧NÄ̧HUA̧ o'cajuiyönä ju̧ru̧hua̧mä̧ pi̧yȩ pä'ö: Ucutumä huo̧juä̧tö̧jä̧, yabonötä̧ cuä̧ju̧cuä̧cuo̧tö̧jä̧ cuä̧ju̧cui̧nä̧tu̧cu̧ huȩnȩtä̧ profetatö̧ ttucuocua'a, chö̧jo̧de aditö ttö̧jä̧mä̧di̧no̧mȩttö̧ kä̧mä̧dö̧, juhuodemä ojusode ja̧'a̧, TÖ̧Ä̧NÄ̧HUA̧ o'cajuiyönä ju̧ru̧hua̧mä̧: Pä̧i̧cu̧nä̧ aditätucui jo̧mȩnö̧ päi'önä cäcuädätucua. ¹⁰ Ja̧'hua̧nö̧ ja̧'a̧ ja̧u̧ ä'canäji mo̧ro̧mä̧ yorö'iso ya̧tȩ'inä u̧huä̧ju̧mä̧ ca̧ca̧to̧cö̧ pinö, yabonä̧nö̧ ȩmä̧huä̧'inä juiyina̧'a̧, ttö̧ja̧sa̧rö̧'i̧nä̧, de'a i̧sa̧rö̧'inä ja̧'hua̧ta̧'a̧nö̧ ttaboiyotucu huȩnȩ juiyönä kä̧cuä̧huä̧mä̧ tti̧'cho̧mȩnä̧'inä ppa̧ttä̧cho̧mȩnä̧'inä juiyina̧'a̧. Ttömä ttippeyänä ka̧cuä̧tu̧cu̧mä̧ yotucupönä ttuju'cäu juiyönä jȩpi̧nö̧sä̧. ¹¹ Ja̧'hua̧nö̧ ja̧'a̧nä̧ jitämä, mo̧ täbocu mo̧ro̧ ji̧nö̧'a̧nö̧mä̧ jo̧ca̧'a̧ jä̧cua̧'a̧, totte'ächa'anä ka̧cui̧pi̧nä̧tu̧cu̧mä̧ pä'ötó TÖ̧Ä̧NÄ̧HUA̧ o'cajuiyönä ju̧ru̧hua̧mä̧. ¹² Ttömä ttö̧ja̧mä̧ huȩnȩ juiyönä ttö̧jö̧nä̧ jȩchä̧cua̧sä̧; uva i̧sä̧tä̧ boipä̧ta̧mä̧ u̧huä̧ju̧ huȩjä̧cua̧'a̧ ja̧'hua̧nö̧ jo̧mȩnä̧ rȩjȩmä̧ u̧huä̧ju̧ huȩju̧nä̧ iyäcua'a; mo̧ro̧jä̧ra̧'a̧ttö̧ ajiya ka̧ppȩppȩnö̧ ma̧ä̧cua̧'a̧, ja̧'hua̧nö̧ jo̧mȩnä̧ Ttömä pitö ttö̧ja̧ totte'ächa'anä ka̧cui̧pi̧nä̧tö̧rö̧mä̧ pi̧yȩmä̧ ttöäre päi'önä chiyäcuotö. ¹³ Ucutu jȩ'cuä̧tu̧cu̧nä̧ i̧jȩcuä̧ ttö̧ja̧ pinätö̧jä̧ korotö ttö̧ja̧ suronä jȩttö̧nö̧tä̧ pä'ö ku̧nä̧huo̧tö̧rö̧, Judá ttö̧ja̧'inä ja̧'hua̧ta̧'a̧nö̧ Israel ttö̧ja̧'inä. Ja̧'hua̧nö̧ ja̧'a̧ttö̧ ra̧huä̧pi̧jo̧mȩttö̧ rä'epö chicuäcuotöjä ja̧'hua̧nö̧ jȩcho̧mȩnä̧ ucutumä adiunö jö̧nä̧ ppädäcuähuä ttö̧ja̧ cuäcuotöjä. Yecuecuätucuä; cujurucu aditätucui! ¹⁴ TÖ̧Ä̧NÄ̧HUA̧ o'cajuiyönä ju̧ru̧hua̧mä̧ pä'ö: Ja̧'hua̧nö̧tä̧ amöcuädö ku̧ni̧nö̧sä̧ ro̧dȩpa̧tö̧ pä'ömä cu̧tä̧mö̧ mi̧nä̧ Ttörö ttu̧ra̧huä̧ri̧nö̧mä̧, pä'ö TÖ̧Ä̧NÄ̧HUA̧ o'cajuiyönä ju̧ru̧hua̧mä̧, ja̧'hua̧nö̧ pdina'anä jȩpo̧cö̧ pinösä̧, ¹⁵ ¡ja̧'hua̧nö̧ ji̧nö̧ta'anö pi̧yȩ pä̧nä̧i'nä cha̧mö̧cuä̧dä̧cua̧sä̧ pä'äjita'anö Jerusalén ttö̧ja̧rö̧'inä ja̧'hua̧ta̧'a̧nö̧ Judá ttö̧ja̧rö̧! Yecuecuätucuä. ¹⁶ Pi̧yȩ ja̧'tó jȩ'cuä̧tu̧cua̧ pä̧'ö̧ jö̧mä̧: Cuippeye kö̧rö̧ ya̧cu̧nä̧rö̧mä̧ jueönä ucuohuätucui. Ro̧ȩcuä̧nä̧ isotömä adiu jo̧mȩnä̧, ro̧ȩpä̧tu̧cui̧, huȩnȩ juiyönä jä̧hua̧'a̧nö̧ cuapatiyätucu. ¹⁷ Cuamiso'quitucu jacuänä suronä amucuädömä jȩ'cuä̧tu̧cuä̧ ka̧ra̧ ka̧ra̧nö̧mä̧, ja̧'hua̧ta̧nö̧ amo̧nä̧ päcuätuhuä yapare jahuä repeö, ¡Pi̧yȩmä̧ TÖMÄ cha̧u̧tu̧!, pi̧yȩtä̧ pä'ö TÖ̧Ä̧NÄ̧HUA̧MÄ̧". ¹⁸ Ja̧u̧nu̧ o'ca'a TÖ̧Ä̧NÄ̧HUA̧ ju̧ru̧hua̧ i̧huȩnȩ ichinä'a̧ ttörö, päinö: ¹⁹ TÖ̧Ä̧NÄ̧HUA̧ ju̧ru̧hua̧mä̧ pi̧yȩ pä'ö: Ttu̧cuä̧ a̧do̧chä̧cuä̧cuä̧mä̧ pa̧ja̧cuä̧nö̧ kä̧cua̧'i̧nä̧, ji̧mu̧tȩ kä̧cua̧'i̧nä̧, ji̧mu̧tȩttö̧ ta'are kä̧cua̧'i̧nä̧, ja̧'hua̧ta̧nö̧ tomurȩ kä̧cua̧'i̧nä̧ jö̧mä̧ ppa̧cuä̧chä̧cua̧'a̧ tteseu pänä ja̧ pä'ö !ja̧'hua̧ta̧nö̧ pä'cäri jȩpu̧ ttesehuäcuotö Judá ahuäruhuämä! ¡Ja̧'hua̧nö̧ ja̧ttö̧, ucutumä repeäcuähuätucui jueö jö̧tä̧ ja̧'hua̧ta̧nö̧ huȩnȩ juiyönä. ²⁰ TTÖ̧Ä̧NÄ̧HUA̧ O'cajuiyönä ju̧ru̧hua̧mä̧ pa̧'a̧nö̧ pä'ö: Ttö̧ja̧mö̧ pä'äjita'anö ttichäcuotö, ja̧'hua̧ta̧nö̧ ttötahuiyä pönä ko̧cuä̧tö̧'i̧nä̧. ²¹ Ötahuiyänä ko̧cuä̧tö̧mä̧ korome ötahuiyäcu 'chä̧nö̧ pättäcuotö: "¡TTÖ̧Ä̧NÄ̧HUA̧ ä'cajome jätepa ti̧'cha̧'a̧nä̧ ja̧'a̧tä̧ topätucuitö ja̧'hua̧ta̧'nö̧ usu ti̧'cha̧'a̧nä̧ TTÖ̧Ä̧NÄ̧HUA̧ o'caju̧iyönä ju̧ru̧hua̧rö̧! Ujutu'inä jua'atä 'chä̧tö̧jä̧. ²² ¡Ttö̧ja̧ recuätö tti̧rȩjä̧ pö̧nä̧ttö̧ tichäcuotö usu TTÖ̧Ä̧NÄ̧HUA̧ o'caju̧iyönä ju̧ru̧hua̧rö̧ Jerusalenttö̧ TTÖ̧Ä̧NÄ̧HUA̧ ppädatö pä'ö jättepäcuotö!" ²³ TTÖ̧Ä̧NÄ̧HUA̧ O'cajuiyönä ju̧ru̧hua̧mä pa̧'a̧nö̧ pä'ö: "Ji̧yȩnö̧ mo̧ro̧mä̧, to̧mu̧rȩnö̧ huotö ko̧ro̧jä̧ttö̧ ichäcuähuotö huä̧mȩnä̧ cu̧'ca̧tä̧huä̧ta̧nä̧ 'chu'ädö pättäcuotö: ¡Ujutu'inä ucucu ticha pä'ätöjä yacuocui'ätö, jä̧ju̧cuä̧jä̧tö̧jä̧ Diosmä ucucu kö pätta'a!"