¹ ¡Topätucui! TÖ̧Ä̧NÄ̧HUA̧ ichö mo̧ro̧ päi'a'a cuiäretucu pperetö icua pä'ö tö̧cuä̧rä̧tu̧cua̧'a̧nä̧, ² TTÖTÄ jȩchä̧cua̧sä̧ pi̧jä̧nä̧ ka̧cuä̧tö̧ Jerusalén ötahuiyä rohuäu 'chuttädönä. Ttoju'isode'inä pperetö'icu ja̧'hua̧ta̧'a̧nö̧ nä̧tö̧rö̧mä̧ 'chu'ädö suronä jȩttä̧cuo̧tö̧. Päcuädäsa jo̧mȩ ötahuiyä ttö̧ja̧rö̧mä̧ kara'acu ttȩpä̧cuo̧tö̧, ja̧'hua̧nö̧ ja̧'a̧nä̧ korotömä ttȩpo̧co̧u̧ ötahuiyänätä ttö̧jä̧cuo̧tö̧. ³ Ja̧'hua̧nö̧ ja̧'a̧ttö̧ TÖ̧Ä̧NÄ̧HUA̧TÄ̧ 'chä̧nö̧ ö̧ro̧huä̧huä̧cua̧ pi̧jä̧nä̧ tti̧rȩjä̧ jö̧nä̧ ka̧cuä̧tu̧cu̧ ji̧yȩnö̧ pä̧nä̧ örohuähuinö ta'anö. ⁴ Ji̧yȩnö̧ mo̧ro̧ päi'omenä CHUTÄ ö̧jä̧cua̧ Olivos De'amä, juȩnȩmä̧ jerusalenttömä kä̧hua̧ räopa'acu ja̧'a̧. Olivos De'amä kä̧'ȩpö̧ icuähuäcua'a kara'anä kä̧hua̧ räopa'acä pätecua'anämä kä̧hua̧ ma̧ä̧cha̧'a̧cu̧ mȩji̧yä̧ pämärächi'omä ja̧'hua̧ta̧'a̧nö̧ juttomemä jä̧cua̧'a̧ ki̧'i̧pä̧cua̧'a̧ kä̧hua̧ u̧huo̧jua̧'a̧cu̧ pätecua'amä kä̧hua̧ ieruhua'acu jö̧nä̧. ⁵ Ja̧u̧nu̧ o'ca'a TÖ̧Ä̧NÄHUA̧TTÖ̧ muä̧'quiyu 'cä̧tȩ jo̧mȩ pämäroppä päi'omenä ucutumä ducuecuächäcuotöjä̧, ja̧'hua̧nö̧ ja̧'a̧ mu̧ä̧'quiyu pämäroppä päi'omenä dö'ecuächö Azalra̧'a̧ cui̧rȩbȩhui̧'ä̧cuo̧tö̧jä̧. Ucutumä̧ ducuecuächäcuotöjä Uzías ru̧hu̧á̧ jö̧nä̧ Judanä hueö pä̧nä̧ rȩjȩ ma̧ä̧cho̧mȩnä̧ ducuecuächinätu̧cu̧ta'anö. Ja̧'hua̧nö̧ jo̧mȩnä̧ CHI̧Ä̧NÄHUA̧ DIOS i̧chä̧cua̧ o'ca to'inä umuhuäyotö suroju jui'ätucu. ⁶ Ja̧u̧nu̧ mo̧ro̧mä̧ tȩa̧u̧mä̧ juiyäcua'a, diyau'inä diyaujuiyäcua'a, ja̧'hua̧nö̧ ja̧'a̧nä̧ diyähuo'qui juoächö juiyäcua'a. ⁷ Ja̧u̧nu̧ moró, TÖ̧Ä̧NÄHUA̧TÄ̧ u̧huo̧juä̧cua̧, juiyäcua'a moro̧'inä yodo'inä, nipä̧ro̧mȩtä̧ tȩä̧huä̧chi̧'ä̧cua̧'a̧. ⁸ Ja̧u̧nu̧tä̧ moró̧ Jerusalén ötahuiyäcu ajiya rärepäcua'a. juhuoya päcuädoyamä huerächäcua'a ajé röotomä kä̧hu̧á̧ räopa'acu ja̧'hua̧ta̧'a̧nö̧ koroto ppächotomä huerächi'äcua'a kä̧hua̧ ma̧'a̧cha̧'a̧cu̧ du'o'i̧nä ja'huata'anö a̧'ȩ́'i̧nä̧ ka̧'a̧cu̧. ⁹ TÖ̧Ä̧NÄ̧HUA̧MÄ̧ ja̧huä̧jä̧ rȩjȩ jä̧ttä̧jä̧tä̧ ru̧hua̧ jö̧nä̧ huȩä̧cua̧. Ja̧u̧tä̧ jä̧cua̧'a̧ TÖ̧Ä̧NÄ̧HUA̧ Dios ya̧tȩtä̧mä̧, i̧mi̧mä̧ ji̧yȩtȩtä̧ ku̧nä̧rö̧. ¹⁰ Ja̧huä̧jä̧mä̧ jä̧ttä̧jä̧tä̧ Arabá jä̧'i̧ja̧'a̧nö̧ jä̧cua̧ Gueba has Rimónttö kä̧mä̧dö̧, Jerusalénttö̧mä̧ ö'ohue ja̧'a̧cu̧ cä'ädö. Juhuorö Jerusalénttömä yabocu mö̧a̧'a̧cu̧ 'chä̧cuä̧hua̧'a̧cu̧'inä jö̧nä̧. Ja̧u̧ ötahuiyämä ju̧huȩnȩtä̧ ttaditö o'ca'amä kä̧cua̧'a̧ ka̧ pä'ö jo̧mȩtä̧, Benjamín ahuaruhua ttäpatettö kä̧mä̧dö̧mä̧, ä̧cuo̧mȩnä̧ öpate kinome jubö ttö̧ja̧cuä̧cuo̧tö̧, yabonö 'cuä'o'ö äpate u̧yu̧'ca̧ri̧ jubö cä'ädö, ja̧'hua̧ta̧'a̧nö̧ to̧pä̧rö̧ pä̧cuä̧huo̧mȩ Jananel pä'ö micuomettö kä̧mä̧dö̧mä̧, ru̧hua̧ a̧huȩ vino ttaditinome jubö. ¹¹ Ttö̧ja̧mä̧ Jerusalénnä̧tä̧ ttö̧ja̧cuä̧cuo̧tö̧, Diosmä juhua'a yabonö o'cajuiyönä̧mä̧ si'epömä icuocö jä̧cua̧ jahuätörö kö'cö jui'ömä. Jerusalén ttö̧ja̧mä̧ huȩnȩ juiyönä̧tä̧ ttö̧ja̧cuä̧cuo̧tö̧. ¹² Pi̧yȩ usurä ȩmä̧cuä̧huä̧nä̧ u̧ro̧huä̧huä̧cua̧TÖ̧Ä̧NÄ̧HUA̧MÄ̧ o'catoi'önä Jerusalén ttö̧ja̧rö̧ kö'cö jui'ö curänä rohuähuinä̧tö̧rö̧mä̧: ttidepämä 'cuäipächäcua'a, ji̧nä̧ ä̧rä̧mi̧'ö̧'cotö ttö̧ja̧cua̧'a̧nä̧'inä, Ttunä käre tti'äriyämä 'cuäipächoca'a jä̧cua̧'a̧, ja̧'hua̧ta̧'a̧nö̧ ttänä kö̧ tti̧nȩmä̧ 'cuäipächäcuotö. ¹³ Ja̧u̧nu̧ mo̧ro̧mä̧ TÖ̧Ä̧NÄ̧HUA̧TTÖ̧ rö̧ä̧nä̧ yecuäcuähuä rȩbȩhuä̧cua̧'a̧ jahuätörömä. Yotucunämä tta̧mö̧nä̧ pa̧ja̧tö̧ tturohuähuäcuotö ja̧'hua̧ta̧'a̧nö̧ korotucu cuä'äcuäu tticuäcuotö. ¹⁴ Judá ttö̧ja̧'inä ttaboiyitucumä Jerusalénttö tturohuähuäcuotä. Ja'huätömä ttö̧ca̧ca̧tä̧cuo̧tö̧ ttippeyänä ka̧cuä̧tö̧ ttiäre oro'inä, plata'inä ja̧'hua̧ta̧'a̧nö̧ ttö̧'ca̧tä̧huä̧ti̧yu̧ adihuäjuäi'inä rö̧ä̧nä̧. ¹⁵ Ja̧'hua̧ta̧'a̧nö̧ Usurä ttȩmä̧u̧'inä kä̧cua̧'a̧ caballostö̧rö̧'inä, mulastö̧rö̧'inä, camellostö̧rö̧'inä ja̧'hua̧ta̧'a̧nö̧ bö̧rö̧ba̧tö̧nä̧'inä ja̧'hua̧ta̧'a̧nö̧ isotömä yotucu pönä ju̧huȩnȩ ä'ö kä̧cuä̧huo̧mȩttö̧mä̧ ja̧'hua̧ta̧'a̧nö̧ usurä ttemähuäjitä̧ usurä ttȩmä̧huä̧cuo̧tö̧. ¹⁶ Ja̧u̧nu̧ o'ca'amä jahuätö ttö̧ja̧ttö̧ Jerusalénra̧'a̧cu̧ ichö tturohuähuomenä ka̧cui̧pä̧tö̧mä̧, a̧'ȩ jö̧ta̧'a̧nö̧ ru̧hua̧rö̧ ucuo tettähua pä'ö tti̧'chä̧cuo̧tö̧, TÖ̧Ä̧NÄ̧HUA̧ o'cajuiyönä ju̧ru̧hua̧rö̧ odehuiyä ppo̧ö̧ pä'cäri jȩtta̧ pä'ö. ¹⁷ Ja̧'hua̧nö̧ ja̧'a̧ 'cuäopäcua'a ja̧huä̧jä̧nä̧ ka̧cuä̧tö̧ o'catoi'önättö̧ ya̧tȩ ru̧hua̧rö̧ ucuo teähua pä'ö, Jerusalénra̧'a̧cu̧ 'chahuächoca'a jö̧ttö̧mä̧ TÖ̧Ä̧NÄ̧HUA̧ o'ca juiyönä ju̧ru̧hua̧mä̧, ja̧u̧nu̧ o'ca'amä jahuätörömä ajiya ichönämä jȩpo̧cö̧ jä̧cua̧. ¹⁸ Ja̧'hua̧nö̧ ja̧'a̧ Egipto ttö̧ja̧ 'chattächoca'a jö̧ttö̧mä̧, ja̧'hua̧nö̧ ja̧'a̧ jahuätömä ajiyamä ȩmo̧co̧tö̧ ttäcuotö. TÖ̧Ä̧NÄ̧HUA̧TTÖ̧ usurä emä̧cuä̧huä̧tä̧ usurä ttȩmä̧u̧nä̧ jȩä̧cua̧'a̧ 'cha'achocotörömä, ja̧'hua̧ta̧'a̧nö̧ odehuiyä ppo̧ö̧ pä'cäri cättädi'oca'a jö̧ttö̧mä̧. ¹⁹ Pi̧yȩ jä̧cua̧'a̧ Egipto ttö̧ja̧rö̧ ro̧ȩcuä̧cuȩ ja̧'hua̧ta̧'a̧nö̧ yotucunä ttö̧ja̧rö̧ roepäcuemä, odehuiyä ppo̧ö̧ pä'cäri jȩtto̧mȩ 'cha'achocotörömä. ²⁰ Ja̧'hua̧nö̧ ja̧'a̧nä̧ ja̧u̧nu̧ mo̧ro̧mä̧, caballotö̧nä̧ rö̧jö̧ campani̧yu̧mä̧ päö'anö ja̧'a̧: "TÖ̧Ä̧NÄ̧HUA̧ jähuä jö̧nä̧tö̧ 'cä̧'ȩpö̧ ku̧ni̧" ja̧'hua̧ta̧'a̧nö̧ TÖ̧Ä̧NÄ̧HUA̧ ö̧jo̧dettö tucäcuähuomemä ku icu iyähuome ä'cattömä ro̧ö̧ jä̧cua̧'a̧. ²¹ Ja̧'hua̧nö̧ ja̧'a̧ Jerusalénttö̧'inä, Judáttö'inä sä̧rä̧bä̧ ji̧bä̧cu̧nä̧mä̧ TÖ̧Ä̧NÄ̧HUA̧ o'cajuiyönä ju̧ru̧hua̧ jähuä jö̧nä̧tä̧ 'cä̧'ȩpö̧ ku̧nä̧huä̧cuȩ, ja̧'hua̧ta̧'a̧nö̧ ya̧cu̧nä̧ i̧sa̧rö̧ ku icu ichömä ja̧u̧nä̧tä̧ u̧cuä̧cua̧ juhua'atäcu ja̧u̧nä̧tä̧ dahuähuäcua'a. Ja̧u̧nu̧ mo̧ro̧ jare iyähuä ttö̧ja̧mä̧ juhua'a yabonömä ko̧co̧tö̧ ttäcuotö TÖ̧Ä̧NÄ̧HUA̧ o'cajuiyönä ju̧ru̧hua̧ ojusodenämä.