¹ TTÖ̧Ä̧NÄ̧HUA̧MÄ̧ Pi̧yȩ huȩnȩ pä'ö Israél ttö̧ja̧rö̧mä̧, TTÖ̧Ä̧NÄ̧HUA̧ pä'ö, mo̧ro̧ji̧yä̧'i̧nä̧ aditinö ja̧'hua̧ta̧'a̧nö̧ pi̧jä̧'i̧nä̧ bo'copö rötinö, ja̧u̧tä̧ ja̧'a̧ pi̧jä̧ ttö̧ja̧ tta̧'cua̧ru̧hua̧nä̧ a̧di̧tä̧rö̧ kö̧mä̧: ² "Topí, Jerusalénmä TTÖTÄ i̧so̧'ta̧ 'cua̧rö̧nä̧ pärotö chicuometä̧ päi'a'a, ja'huätucu ttörohuähua pä'ötömä ttä̧'ä̧mä̧chö̧tä̧ ttörohuäu juiyäcua'anö. Ja̧'hua̧nö̧tä̧ 'cuäo päcua'a Judáttö'inä Jerusalén ötahuiyä ttottepa pä'ö ttamucuädomenämä. ³ Ja̧u̧nu̧ mo̧ro̧mä̧, TTÖTÄ jȩchä̧cua̧sä̧ Jerusalénmä inähua röähuä jä̧'i̧nö̧'a̧nö̧ ttö̧ja̧'i̧nä̧ ttupporädö juiyönä. Ja'huätöttö ya̧tȩ juähuä inähuä cäepa pä'ö jȩö̧ttö̧mä̧ chutä amonätö rö̧'ä̧nä̧ u̧su̧rä̧huä̧cua̧, ja̧'hua̧ta̧'a̧nä̧ pi̧jä̧cu̧nä̧ ko̧cuä̧tö̧mä̧ ttöjö'cö juiyönä tottäcuotö ja̧u̧ ötahuiyä. ⁴ Ji̧yȩnö̧ mo̧ro̧ jä̧cuä̧mä̧, pa̧'a̧nö̧ pä'ö TÖ̧Ä̧NÄ̧HUA̧MÄ̧; TTÖTÄ ya̧do̧pä̧cua̧sä̧ ttä̧ji̧mu̧ ca̧hua̧yu̧tu̧ru̧'i̧nä̧ yettecunä ja̧'hua̧nö̧ jo̧mȩnä̧ ttusuri'ächäcuotö, TTÖTÄ to̧pö̧rö̧ tta̧dä̧rä̧cua̧sä̧ Juda ojusodemä ja̧'hua̧ta̧'a̧nö̧ abo'iyotö ttäjimu ca̧hua̧yu̧tu̧ru̧'i̧nä̧ ä̧to̧dö̧ chi̧cuä̧cua̧sä̧. ⁵ Ja̧'hua̧nö̧ ja̧'a̧ topötä Judánä ko̧cuä̧tö̧ ruhuotömä pättäcuotä ttamiso'qui jacuänätä: "Jerusalén ötahuiyänä ko̧cuä̧tö̧ ja̧'a̧ ujutu tujurumä o'catoi'önä TÖ̧Ä̧NÄ̧HUA̧ ju̧ru̧hua̧nä̧tä̧, DIOSTÄ ja̧'a̧ttö̧". ⁶ Ja̧u̧nu̧ moró̧, ttömä jȩchä̧cua̧sä̧ judá ttö̧ja̧ tturuhuotörömä̧ ucurä dau isodä 'cä̧tȩ jo̧mȩ cuoa'a jä̧'i̧nö̧'a̧nö̧ ja̧'hua̧ta̧'a̧nö̧ u̧huä̧ju̧ ca̧ca̧tö̧ ttu̧tome 'cätȩ tejähuare du'unä cuoa'a jä̧'i̧nö̧'a̧nö̧, o'cato'inä ttippeyänä ttu̧huo̧jua̧'a̧nä̧ ja̧'hua̧ta̧'a̧nö̧ ttieruhua'anä kä̧tu̧rö̧'i̧nä̧ kuhuö icuäcua'a. Jerusalenmä pä'äji ta'anö ttu̧ji̧nometä̧ tti̧jä̧cuo̧tö̧. ⁷ TÖ̧Ä̧NÄHUA̧ ä̧cuo̧mȩnä̧mä̧ ppä̧dä̧cua̧ judá ahuaruhuärötä, David minä ahuaruhuä 'cotö ja̧'a̧ttö̧ ja̧'hua̧ta̧'a̧nö̧ Jerusalén ötahuiyänä ucuotönö kä̧tö̧rö̧mä̧ Judarötä ucuo tettähua'acu. ⁸ Ja̧u̧nu̧ moró̧, TÖ̧Ä̧NÄHUA̧MÄ̧ Jerusalén ötahuiyänä kä̧tö̧rö̧ tta̧huä̧rä̧cua̧, Ja̧'hua̧ta̧'a̧nö̧ ja̧u̧nu̧tä̧ moró̧ juiyu pätö'inä ttujuruhuächäcuotö David minä ji̧nö̧ta̧'a̧nö̧, David ojusodemä Diostä ja̧'a̧nä̧, jahuätö ttä'canä TÖ̧Ä̧NÄHUA̧ huȩä̧hua̧ isoppahua̧ i̧'cha̧'a̧ttö̧. ⁹ Ja̧u̧nu̧ä̧ moró̧ kä̧mä̧dö̧ ttö siecuänä chö̧jö̧mä̧cua̧sä̧ Jerusalén ötahuiyä ttö̧ja̧rö̧ suronä jȩpö̧ ichätö o'catoi'önä̧rö̧. ¹⁰ Chiyä̧cua̧sä̧ re a̧'cua̧ru̧hua̧rö̧ ja̧'hua̧ta̧'a̧nö̧ tta̧'cua̧ huȩnä̧rä̧tö̧rö̧ David ahuaröhuä o'cotörö'inä Jerusalén ttö̧ja̧rö̧'i̧nä̧. Jahuätörö 'cuäopä'chomenä ttörö ttu̧'ȩ pä̧rä̧chi̧ä̧ö̧, ja̧'hua̧nö̧ ja̧'a̧ttö̧ tti̧tti̧rö̧ re ttemähua̧a̧ jä̧i̧nö̧'a̧nö̧ tta̧'cua̧ tta̧ttȩcuä̧cuo̧tö̧; juo̧rö̧ jahuätö ri̧ȩnä̧ re ttemähuä̧cuo̧tö̧, jahuätö ä̧cuo̧mȩnä̧ tti̧tti̧ 'curöjoächaa ri̧ȩnä̧ ttajahuaa jä̧i̧nö̧'a̧nö̧. ¹¹ Juo̧nö̧ moró̧, re tti̧jä̧cuo̧tö̧ Jerusalén ötahuiyätö'inä Hadad Rimón 'curöjoächomenä Meguido pämäroppättö. ¹² Ji̧nä̧ yotöte huotö punä, jȩttä̧cuo̧tö̧ re jähuä juȩnȩ rȩjȩmä̧: David ahuaruhuärö̧'i̧nä̧ 'quȩȩpu̧ icuähuäcuaa ja̧'hua̧ta̧'a̧nö̧ tti̧rȩcua̧mu̧rö̧'i̧nä̧ u̧mä̧tö̧ttö̧ 'quȩȩpu̧ icuähuäcuaa. Natán ahuaruhuä tti̧rȩcua̧mu̧rö̧'i̧nä̧ 'quȩȩpu̧ icuähuäcuaa u̧mä̧tö̧ttö̧mä̧. ¹³ Leví ahuaruhuä tti̧rȩcua̧mu̧rö̧'i̧nä̧ 'quȩȩpu̧ icuähuäcuaa u̧mä̧tö̧ttö̧mä̧. Simeín ttö̧ja̧ttö̧'i̧nä̧ tti̧rȩcua̧mu̧rö̧mä̧ 'quȩȩpu̧ icuähuäcuaa u̧mä̧tö̧ttö̧mä̧. ¹⁴ Korotö ka̧cui̧pä̧tö̧mä̧ jahuätö'inä tti̧rȩcua̧mu̧rö̧ 'quȩȩpu̧ icuähuäcuotö umätö̧ttö̧mä̧.