¹ TÖ̧Ä̧NÄ̧HUA̧RÖ̧ ajiya jä'epätucui ajiya ichocö mo̧ro̧, Ja̧u̧ TÖ̧Ä̧NÄ̧HUA̧TÄ̧ ja̧'a̧ kä̧rö̧'co̧huö̧nä̧'inä jȩpö̧mä̧, Ja̧u̧tä̧ ja̧'a̧ o'catoj'önä̧rö̧ ajiya iyepönä jȩpö̧mä̧ ja̧'hua̧ta̧'a̧nö̧ dauhuiyä de'a ka̧cu̧nä̧'inä. ² Ja̧'hua̧ta̧'a̧nö̧ ttö̧ä̧nä̧hua̧ o̧'ca̧mä̧ yaparetä ucuocu 'cuä̧o̧pä̧cuȩ topätörö i̧jȩcuä̧chö̧mä̧ yaparetä ja̧'a̧; jahuätö ttu̧'cua̧ti̧mä̧ yaparetä ji̧ä̧huä̧ö̧ ja̧'hua̧ta̧'a̧nö̧ a̧'cua̧ttö̧ juottiyatö jittäumä juiya'a, ja̧'hua̧nö̧ ja̧'a̧ttö̧ ovejastö̧ ttire'tehuächa'a jä̧'i̧nö̧'a̧nö̧ juhua'atä tta̧'a̧rö̧ to'ätö usurä ttȩma̧hua̧'a̧ jä̧'i̧nö̧'a̧nö̧. ³ Chö̧'ä̧i̧nä̧ ovejastö tturuhuotörö cuo'ö ka̧'a̧; jahuätömä cabrastö̧ umätö ja̧'a̧, ttö̧ja̧ tturuhuotö Ttö ro̧dȩpä̧cuä̧u̧. ¡TÖ̧Ä̧NÄ̧HUA̧ o'cajuiyö ju̧ru̧hua̧mä̧ pä̧cuä̧yu̧nö̧ ka̧cuä̧tö̧rö̧ adiu jȩpö̧ tta̧huä̧rä̧cua̧, Judá ahuaruhuärö, ja̧'hua̧ta̧'a̧nö̧ jahuätörömä jȩä̧cua̧ aji caballotö̧ curä rohuähuätörö̧mä. ⁴ Jahuätöttömä ttahuaruä o'cotö ruhuo ttucuo ku̧nä̧rä̧tö̧ttö̧'i̧nä̧ tichäcuotö; Jahuätöttömä tichäcuotö ruhuo kada'ca 'chu'ä̧rä̧tö̧'i̧nä̧; Jahuätöttömä tichäcuotö su̧ro̧do̧u̧ tturuhuotö'inä ttichäcuotö; Ja'huätömä päcuotö ruhuotö pojähui'ötä ttichäcuotö. ⁵ Jahuätöttömä ttörohuähuomettö'inä ujuruhuätö ttäcuotö, Jahuätö jä̧cua̧'a̧ ttabo'iyotörö rohuäu iso juottäpäcuotömä, TÖ̧Ä̧NÄ̧HUA̧ ju̧ru̧hua̧ ja'huätucu ö̧ja̧'a̧ttö̧, jahuätö jä̧cua̧'a̧ dä'ättuttepäcuotömä ttabo'iyotö cahuayunä rohuähuätörö'inä. ⁶ TTÖTÄ yȩchä̧cua̧sä̧ Juda ahuaruhuättö ttujuru'unä ja̧'hua̧ta̧'a̧nö̧ ppä̧dä̧dä̧cua̧sä̧ José ahuaruhuärö'inä; TTÖTÄ ppa̧dä̧dä̧cuo̧tö̧ jahuätömä ja̧'hua̧ta̧'a̧nö̧ rȩrö̧jö̧nä̧ to̧'chä̧cua̧sä̧ jahuätörö. Jarochi̧'o̧co̧u̧ 'cua̧rö̧nä̧ jä̧cua̧'a̧ ja'huätörö rȩrö̧jö̧nä̧ tocha'attö, TTÖTÄ ja̧'a̧ttö̧ TÖ̧Ä̧NÄ̧HUA̧ DIOSMA, TTÖTÄ chä̧dä̧tä̧cua̧sä̧ ja'huätörömä. ⁷ ¡Ja̧'hua̧nö̧ 'cuäopö o'ca'a, curä ru̧hua̧ 'cua̧rö̧nä̧ ö̧jä̧cua̧ Efraínmä, ja̧'hua̧ta̧'a̧nö̧ eseuytä ttö̧jä̧cuo̧tö̧ vino isoya au ttesehua'a 'cua̧rö̧nä̧; i̧tti̧mö̧'i̧nä̧ ja̧'hua̧nö̧ ja̧'a̧ topö ttesehuäcuotö! ¡Ttamiso'qui jacuänä ttesehuäcuotö TTÖ jȩchä̧ji̧ topö! ⁸ Ttötä jahuätörö jua̧chä̧cua̧sä̧ ja̧'hua̧ta̧'a̧nö̧ huo̧chä̧cuä̧huö̧, ttötä ppa̧dä̧dä̧cua̧sä̧ jahuätörö ja̧'hua̧nö̧ ja̧'a̧ttö̧ jahuätö ttujuruhuächäcuotö pä'äji ta'anö. ⁹ Ttötä chiyäcuotö jahuätö ttö̧ja̧rö̧mä̧, ja̧'hua̧nö̧ ja̧'a̧ttö̧ jahuätö'inä tti̧tti̧mu̧'i̧nä̧ ppa̧'a̧chö̧ ttö̧jä̧cuo̧tö̧. ¹⁰ Ttötä chi̧yä̧cua̧sä̧ jahuätörö tti̧rȩjä̧ Egipto rȩjȩnä̧ ja̧'hua̧ta̧'a̧nö̧ Asiria rȩjȩnä̧ chö̧ca̧ca̧ctä̧cua̧sä̧ jahuätörömä̧. Ttömä chi'cächä̧cua̧sä̧ jahuätörömä̧ Galaad rȩjȩra̧'a̧cu̧ ja̧'hua̧ta̧'a̧nö̧ Líbanora̧'a̧ jahuätömä̧ ttö̧jo̧mȩ'i̧nä̧ juiyönä juiyo ttirecua'attö. ¹¹ Ttötä 'cuädepäcuotö ajé de'ähuotonä usurä ȩmä̧huä̧tö̧mä̧; ttötä ttodȩpä̧cua̧sä̧ deähuoto ajé ppahuö obimä ja̧'hua̧ta̧'a̧nö̧ täcuoto Nilo aje'inä joädö chicuä̧cua̧sä̧. Asiria suro̧da̧u̧rö̧'i̧nä̧ ucuo tettäumä jȩpö̧ chi̧cuä̧cua̧sä̧ ja̧'hua̧nö̧ ja̧'a̧ttö̧ Egipto ttö̧ja̧mä̧ ruhuo huettö ttujurumä jahuätöttömä töipächäcua'a. ¹² Ttötä chiyä̧cu̧a̧sä̧ jahuätörö ttujuröhuönä ja̧'hua̧nö̧ ja̧'a̧ttö̧ jahuätö tti̧'chä̧cuo̧tö̧ ttö chi̧mi̧nä̧ pä'ö ji'ähuinö TÖ̧Ä̧NÄHUA̧MÄ̧.