¹ Ttömä jo̧mȩnö̧ ki̧nö̧sä̧ jitö jä'epocotö pinä̧tö̧ ttösattö pä'ömä; Ttömä jo̧mȩnö̧ ki̧nö̧sä̧ jitö usocotö pinä̧tö̧ ttö̧'o̧cui̧'a̧ttö̧ pä'ö. Ttömä pä'inö̧sä̧ ¡Pȩnȩtä̧ kö̧sä̧! ¡Pȩnȩtä̧ kö̧sä̧! yotöte ttö̧ja̧ chi̧mi̧nä̧mä̧ ottococu pinö̧sä̧. ² ¡Ttömä chu̧mö̧ cäepinö̧sä̧ 'cuäopönä̧ tta̧mi̧surinä̧u̧rö̧, adihuomenä cue'ächocö pi̧nö̧rö̧, chutä pi̧yȩ jȩcha̧jä̧ pä'ö a̧mö̧cuäda'acu 'chi̧nö̧rö̧! ³ Jahuätö ttö̧ja̧ cättädi'oca'atä ra̧huä̧rä̧tö̧mä̧, ku icu iyätö ȩ'u̧ ka̧cu̧ ade ka̧cuo̧mȩttö̧, ja̧'hua̧ta̧'a̧nö̧ inciensomä redä'ca 'ca̧tö̧ adicuomettö̧ kuhuinä̧tö̧. ⁴ Juätömä hua'areba 'cä̧tȩ pȩjä̧mö̧, yodomä 'cuäo'önä to̧pä̧rä̧tö̧, ja̧'hua̧nö̧ to̧pä̧rö̧ cuchi idepä o'coyacu cuätö ttu̧sä̧rä̧bä̧mä̧ su̧rä̧jä̧bä̧nä̧. ⁵ Juätömä pä'ätö: Tö'ipächi, chu̧jo̧mȩ tö'cönä̧nö̧mä̧ cuichi'ä, Ttömä ucuttö'inä abonä̧nö̧ surojumä jui̧'a̧sä̧. Pi̧yȩmä̧ chi̧ji̧yu̧nä̧ räopoppa jä̧'i̧nö̧'a̧nö̧ ja̧'a̧, ocurä 'cuäopönä mo̧ro̧ cuoarä jä̧'i̧nö̧'a̧nö̧. ⁶ Topittö, Ttö chä'ca jo̧mȩttö̧mä̧ huȩyu̧tu̧ rutähua'a: Ttömä 'coruchi'ötä chö̧jä̧cua̧sä̧, ja̧'hua̧nö̧ jo̧mȩnä̧ mi̧cuä jȩchä̧cua̧sä̧; chöjohuiyä hua'adäcuätämä ko̧cö̧sä̧, ⁷ surojö jȩttö̧nä̧mä̧ ja̧'hua̧ta̧'a̧nö̧ ttä̧'o̧tö̧ suronä̧ jȩtti̧nö̧cu̧tä̧, Pä'ötó TÖ̧Ä̧NÄ̧HUA̧MÄ̧. Ttömä jȩttö̧ jä̧dȩpä̧cua̧sä̧ a̧mȩu̧nä̧ 'chopöcu mö̧ä̧'quiyöttö kuhuätörö ja̧'hua̧ta̧'a̧nö̧ po̧ri̧yä̧'tä̧ päi'omettö Ttörö ya̧'a̧huȩ'ä̧tö̧rö̧. Ja̧'hua̧nö̧ ja̧'a̧ttö̧ ä̧mä̧cö̧ jähuä ttöhuiänä ca'ecu huȩnä̧u̧ jȩttö̧mä̧ chu̧'a̧tä̧cuo̧tö̧. ⁸ Pi̧yȩ pä'ö TÖ̧Ä̧NÄ̧HUA̧MÄ̧: uva isächa isoya acuomenä, yotutemä pä'ätö: 'cui'opömä cuicuä, ja̧u̧mä̧ adihuomenä ppädö ja̧'a̧, pi̧yȩ ja̧'a̧ chu̧mö̧huäyotörö adihuomenä Ttö jȩchä̧cuȩmä̧: o'catoi'önä̧rö̧mä̧ si'epömä icuocö chä̧cua̧sä̧. ⁹ Ttömä Jacob i̧tti̧mö̧ 'cotörö chi̧'cä̧chä̧cua̧sä̧, ja̧'hua̧ta̧'a̧nö̧ Judá ttö̧ja̧mä̧ Ttö chö̧jä̧'ca mö̧ä̧'anä ttö̧ja̧cuä̧cuo̧tö̧. Ttö pojopö chȩmi̧nä̧u̧mä̧ ja̧huä̧jä̧nä̧ ttö̧ja̧cuä̧cuo̧tö̧ ja̧'hua̧ta̧nö̧ chumöhuäyotömä ju̧huȩnȩtä̧ ttö̧ja̧cuä̧cuo̧tö̧. ¹⁰ Sarónmä isotö ttucuä'cua ro̧mȩtä̧ jö̧nä̧ pärohuächäcua'a, juhua'atäcu Acorttö pämäroppä päi'ome chä̧ji̧mö̧mä̧ ttujuru ȩmö̧ ttö̧'ä̧mä̧cuo̧tö̧, Chi̧tti̧mö̧ Ttörö usätumä. ¹¹ Ja̧'hua̧nö̧ ja̧'a̧nä̧ ucutu TÖ̧Ä̧NÄ̧HUA̧RÖ̧ jaropi'inä̧tö̧mä̧, Chö̧jä̧'ca surojö juiyä'ca unichi'inä̧tö̧mä̧, cu̧ä̧nä̧hua̧tu̧cu̧ adiu ppä'ädörö mesa isodä ku̧nö̧ jo̧mȩnö̧ jȩpö̧ ku̧ni̧nä̧tö̧mä̧ ja̧'hua̧ta̧'a̧nö̧ vino'i̧nä̧ huihuatö o̧'ta̧hui̧yä̧nä̧ suhuädäcuäunä cu̧ä̧nä̧hua̧tu̧cu̧ Tti̧rȩbȩhuä̧cuo̧mȩ pä'ö micua̧rö̧ a̧mö̧cuädinä̧tö̧rö̧. ¹² Ttömä curä'chunä̧nä̧tä̧ pätetö chu̧ju̧nä̧cuo̧tö̧, ja̧'hua̧ta̧'a̧nö̧ cuihue'quiyönä cu̧jä̧mä̧dä̧cuo̧tö̧jä̧ ku icu iyähuome, juhua'amä huo̧chä̧ö̧mä̧ cuädätätucuoca'a ji̧na̧'a̧ttö̧; chucuocuomenä'i̧nä̧ cuä̧ju̧cuä̧tu̧cuo̧ca̧'a̧ ji̧na̧'a̧ttö̧. Ja̧'hua̧nö̧ ja̧'a̧nä̧ ucutumä Ttö to̧chä̧ro̧mȩttö̧mä̧ suronätä̧ jȩpi̧nä̧tö̧jä̧ ja̧'hua̧ta̧'a̧nö̧ Ttö chesehuocötä pojopö ȩmi̧nä̧tö̧jä̧." ¹³ PIi̧yȩ ja̧' TÖ̧Ä̧NÄ̧HUA̧ Dios päömä: "Topi, chumöhuäyotömä ttucuäcuotö, ja̧'hua̧nö̧ ttucua'anä̧ ucutumä ppäi ttucuäcuotöjä; topittö chumöhuäyotömä ttahuäcuotö, ja̧'hua̧nö̧ ttahua'anä ucutumä a̧di̧rö̧jä̧cuä̧u̧jä̧; topittö chumöhuäyotömä ttesehuäcuähua'anä̧, ucutumä dä'ä ttucuätucunätä̧ jȩchä̧cuä̧u̧jä̧. ¹⁴ Topittö, chumöhuäyotömä ttamiso'quinä̧ eseäcuäu huotta'anä̧, ucutumä cua̧mi̧so'quitucu ba̧ra̧huä̧u̧ cuajäcuähuäcuotöjä̧ ja̧'hua̧ta̧nö̧ cua̧'cua̧ru̧tu̧cu̧nä̧ ppo̧u̧cu̧ pä̧i̧'ä̧u̧ cua̧'cua̧tta̧cuȩcuä̧cuo̧tö̧jä̧. ¹⁵ Ucutumä cui̧mi̧tu̧cu̧mä̧ surojö̧nä̧tä̧ ja̧tö̧jä̧ pä'ö ku̧nä̧huo̧tö̧ pättäcuotö pojopö Ttö chȩmi̧nä̧u̧mä̧; Ttö TÖ̧Ä̧NAÄ̧HUA̧ Diosmä, cuä'ö chicuäcuotö; Ttö chumöhuäyotö tti̧mi̧mä̧ koromrnä̧ odäcuotö. ¹⁶ Ya̧tȩ pi̧jä̧ rȩjȩttö̧ adiunä̧tä̧ ja̧'a̧cua̧já̧ pä'örömä Ttöttömä adiunä ja̧rö̧ pä'ötä pä̧dä̧cua̧, isopäi'önä Diosmä. Ya̧tȩ pi̧jä̧ rȩjȩttö̧ ji̧yȩtȩ i̧mi̧nä̧ huȩnȩtö̧ pä'ömä Ttö chi̧mi̧nä̧tä̧ huȩnȩtö̧ pä̧cua̧, isopäi'önä Diosnä̧tä̧, juhua'amä ä'cojinä̧nö̧ 'cuäopinö̧mä̧ isopäi'önä̧tä̧ tochäromettö̧mä̧ pi̧yȩmä̧ i̧jȩcuä̧chä̧cua̧'a̧. ¹⁷ Ja̧'hua̧nö̧ ja̧'a̧ topätucui, Ttömä täcu jareö mo̧ro̧jä̧'i̧nä̧, jareö rȩjȩ'i̧nä̧ chuhuäbe'a pä'ö tu'cöhuächia'a; 'cuäopinö̧mä̧ a̧mö̧cuädäcuähuoca'a jä̧cua̧'a̧ ja̧'hua̧nö̧ jo̧ca̧'a̧ttö̧'i̧nä̧ ttamöcuädönä̧mä̧ rȩbȩhui̧po̧ca̧'a̧ jä̧cua̧'a̧. ¹⁸ Ja̧'hua̧nö̧ ja̧'a̧nä̧ ucutumä eseutä cu̧jä̧cuo̧tö̧jä̧ 'cuäopönä̧tä̧ Ttö chu̧huä̧bȩ'ä̧jä̧nä̧ kä̧nö̧mä̧. Topittö, Ttömä Jerusalén uhuäbe'ö ku̧nö̧sä̧ eseäcuähuä jö̧nä̧ ja̧'hua̧ta̧nö̧ i̧tti̧mö̧mä̧ eseutä ka̧cuä̧tö̧. ¹⁹ Ttömä Jerusalén ötahuiyämä chȩsȩhuä̧cua̧sä̧ ja̧'hua̧ta̧'a̧nö̧ chumöhuäyotörö chȩsȩhuä̧cua̧sä̧; ajahuäcuähuä'i̧nä̧, ba̧ra̧huä̧u̧ tta̧'cua̧ tta̧huȩcuä̧cuä̧huä̧'i̧nä̧ juorömä ä̧ju̧cuä̧cuä̧huo̧ca̧'a̧ jä̧cua̧'a̧. ²⁰ Yorö'iso ppo̧'ä̧tö̧ juorömä a̧'u̧cu̧nä̧tä̧ mo̧ro̧tä̧mä̧ ko̧co̧tö̧ ttäcuotö; ja̧'hua̧ta̧'a̧nö̧ bö̧o̧sa̧'i̧nä̧ ä'canä̧ji̧ mo̧ro̧mä̧ 'corujuo'ächocö jä̧cua̧. Ciennö a̧'ȩ jo̧mȩnä̧ 'corujuo'ächömä mö̧ä̧ya̧ jö̧nä̧ to̧ttä̧cua̧. Ya̧tȩ cienö̧ a̧'ȩ jo̧mȩnä̧ rȩbȩhui̧po̧cö̧mä̧ surojönä̧tä̧ hua̧ pä̧ttä̧cua̧. ²¹ Jahuätömä ttoju odehuiyä aditi'i'cotö ttö̧ja̧cuä̧cuo̧tö̧ ja̧'hua̧ta̧nö̧ uva'i̧nä̧ ku̧ni̧po'cotö u̧huä̧ju̧mä̧ ttucuäcuotö. ²² Yorö'isö isodemä yabonömä aditocotö ttäcuotö korotö ttö̧jä̧cui̧ya̧tö̧ pä'ömä; jahuätömä ku̧no̧co̧tö̧ ttäcuotö korotö ttucuiyatö pä'ömä; ja̧'hua̧nö̧ ja̧'a̧ dauhuiyä u̧mo̧ro̧ jä̧'i̧ja̧'a̧nö̧ jä̧cua̧'a̧, chu̧mö̧huäyotö ttu̧mo̧ro̧ mo̧ro̧mä̧. Ttö pojopö chȩmi̧nä̧u̧mä̧ ttu̧mö̧nä̧ ttaditäjimä recuo mo̧ro̧ kä̧cua̧'a̧. ²³ Jahuätömä micuähuocömä aditocotö ttäcuotö, tti̧mȩya̧huä̧chö̧nä̧ jȩtta̧tö̧ pä'ömä tti̧tti̧mö̧rö̧mä̧ uhuäbecuocotö ttäcuotö. Ja̧'hua̧nö̧ ja̧'a̧ jahuätömä jitö TÖ̧Ä̧NÄ̧HUA̧ adiunä̧tä̧ ja̧tö̧jä̧ pä̧i̧nä̧u̧ tti̧tti̧mö̧ ja̧'a̧, ja̧'hua̧ta̧nö̧ juätötä tti̧tti̧mö̧'i̧nä̧ ²⁴ Juätö huottäcua'a ä'canä̧, Ttömä chä̧dä̧tä̧cua̧sä̧; ja̧'hua̧ta̧nö̧ ji̧nä̧ ttucuocua'anä, Ttömä chä̧ju̧cuä̧cua̧sä̧. ²⁵ Tä̧mö̧ ä̧hui̧ri̧tö̧'i̧nä̧ ovejastu̧cu̧ ttö̧ja̧cuä̧cuo̧tö̧, ja̧'hua̧ta̧nö̧ mö̧ yahui'i̧nä̧ päcäyä jä̧'i̧ja̧'a̧nö̧ isä'cuatä u̧cuä̧cua̧; ja̧'hua̧nö̧ i̧sa̧ppȩmä̧ ä̧ca̧tä̧ ja̧'a̧ u̧cuä̧cua̧mä̧. Juätömä surojuo'epö'i̧nä̧, si'epö'i̧nä̧ icuocotö ttäcuotö chu̧jo̧mȩ mö̧ä̧'ca o'cajuiyönä̧mä̧," pä'ötó TÖ̧Ä̧NÄ̧HUA̧MÄ̧.