¹ TÖ̧Ä̧NÄ̧HUA̧ Dios a̧'cua̧ru̧huä̧mä̧ Ttönä kö̧, isopäi'önä̧tä̧ TÖ̧Ä̧NÄ̧HUA̧MÄ̧ pojopö u̧ju̧ni̧nä̧cu̧sä̧ adihuäjuei huȩnȩ usurä ȩmä̧huä̧tö̧rö̧ jidähuiyarö pä'ö. Ja̧u̧mä̧ hueinä̧cu̧sä̧ ttamiso'qui 'toruhuächina̧'a̧ chutodeta pä'ö, cärenä̧ pȩjä̧tö̧rö̧ rä'epö icuähuä jidähua pä'ö ja̧'hua̧ta̧'a̧nö̧ jitö cärenä̧ pȩjä̧tö̧rö̧ rä'epö chicua pä'ö. ² Ja̧u̧mä̧ hueinä̧cu̧sä̧ TÖ̧Ä̧NÄ̧HUA̧TTÖ̧ ppädäcuähuä a̧'ȩ tö'cö jidähuiyarö pä'ö, tu̧ru̧hua̧ Dios mi̧cuä jȩä̧cuȩ'i̧nä̧ ja̧'hua̧ta̧nö̧ o'catoi'önä ajahuätörö tta̧'cua̧ ttȩmö̧nä̧ jȩcha̧ pä'ö. ³ Ja̧u̧mä̧ hueinä̧cu̧sä̧ jitö sión ötahuiyättö ajahuätörö, ä̧ya̧ri̧sa ttiyajueimä̧ ttönä juäocuäcuähuä o̧ta̧tä̧ chiya pä'ö, tta̧'cua̧ tta̧ttȩcua̧jueimä eseäcuähuä a̧dȩtä̧ chiyatö pä'ö, tta̧'cua̧ru̧hua̧ a̧'cua̧ tta̧'ȩcu̧rö̧ ttiyajueimä ra̧'ö̧ eseäcuähuä i̧sä̧ta̧tä̧, juruhuö adihuomȩnä̧ jȩpä̧tö̧ pättäcua'anö, TÖ̧Ä̧NÄ̧HUA̧ u̧ju̧nö̧mä̧ Ja̧u̧ru̧mä̧ usärutä jä̧cua̧'a̧nö̧. ⁴ Jahuätömä mo̧ täbocu ma̧ä̧chi̧no̧mȩ'i̧nä̧ pä'äjita'anö ttäditäcuotö; mo̧ täbocu päi'önä ttö̧ja̧ toächomemä ppa̧'a̧di̧pö̧ ttaditäcuotö, Ja̧'hua̧ta̧'a̧nö̧ ötahuiyä toe'ächinö'i̧nä̧ ttaditäcuotö, mo̧ täbocutä päi'önä̧ tti̧tti̧mö̧ pinä̧tö̧ recuätö tottepächina'amä. ⁵ Ko̧ro̧jä̧ ttö̧ja̧tö̧ ä̧rä̧mi̧'ö̧ cuä̧ji̧mö̧rö̧ ttucuäjetäcuotö, ko̧ro̧jä̧ttö̧ ichäcuähuiotö tti̧tti̧mä̧ cui'ättanä'i̧nä̧ uva ka̧cuo̧'i̧nä̧ ttaditäcuotö. ⁶ Ucutu TÖ̧Ä̧NÄ̧HUA̧ u̧mö̧huäyotö sacerdotetö̧ pä'ö ottäcuotöjä; jahuätömä ucuturumä ottäcuotö Dios u̧mö̧huäyotö pä'ötä. Ucutumä ttö̧ja̧ ttu̧cuȩ rö̧ä̧ö̧ttö̧ cucuäcuotöjä ja̧'hua̧ta̧'a̧nö̧ jahuätö ruhuotö juottinö̧ttö̧mä̧ jo̧mȩnö̧tä̧ ku̧ju̧nä̧rä̧cuo̧tö̧jä̧. ⁷ Jui'ö ttudäpecuajueimä yabonä̧nö̧ ku̧ju̧nä̧rä̧cua̧jä̧, ja̧'hua̧ta̧'a̧nö̧ ttucuo juittajueimä jitötämä ttesehuäcuotö. Ja̧'hua̧nö̧ ja̧'a̧ttö̧ jahuätömä tti̧rȩjä̧'i̧nä̧ to̧jä̧rȩ jo̧mȩnä̧ ttu̧ju̧nä̧rä̧cuo̧tö̧, 'cuäopönä eseäcuähuämä ucutunä̧tä̧ kä̧cua̧'a̧. ⁸ Ja̧'hua̧nö̧ ja̧'a̧ Ttö, TTÖ̧Ä̧NÄ̧HUA̧MÄ̧ adihuomenä jȩä̧cuä̧huä̧tä̧ eseusä, ja̧'hua̧ta̧'a̧nö̧ Ttömä kö'cocösä nä̧u̧cuä̧rä̧cuä̧huä̧'i̧nä̧, adihuocomenä ttujurucu jȩttö̧'i̧nä̧. Ttömä pädinöta'anö yoräteunä̧tä̧ jȩchä̧cua̧sä̧ juhua'atäcu beipocö esecu todecuäcuähuätä jahuätucumä chesecuä̧cua̧sä̧. ⁹ Tti̧tti̧mö̧mä̧ ttö̧ja̧mä̧ ttu̧huo̧juä̧cuo̧tö̧ ja̧'hua̧ta̧'a̧nö̧ cui̧tti̧mö̧mä̧ ko̧ro̧jä̧ ttö̧ja̧'i̧nä̧ ttu̧huo̧juä̧cuo̧tö̧. O'catoi'önä̧ topinä̧tö̧mä̧, ttu̧huo̧juä̧cuo̧tö̧ jahuätömä TÖ̧Ä̧Nä̧HUA̧ adiunä ppä̧di̧nä̧u̧ pä'ötä. ¹⁰ Ttömä rö̧ä̧nä̧tä̧ TÖ̧Ä̧NÄ̧HUA̧NÄ̧ chesehuä̧cua̧sä̧. chu̧ru̧hua̧ Diosnä̧tä̧ rö̧ä̧nä̧ chȩsȩhä̧cua̧sä̧. Ja̧'hua̧nö̧ ja̧'a̧ ja̧u̧mä̧ ö̧'ca̧ti̧nä̧cu̧sä̧ surojöttö ki̧'i̧cuä̧ 'ca̧tä̧cuä̧huä̧ta̧tä̧, Ja̧u̧mä̧ ö̧'ca̧ti̧nä̧cu̧sä̧ adihuomenä jȩpö̧ 'ca̧tä̧cuä̧huä̧ta̧tä̧, ya̧tȩ tti̧'quȩrȩ i̧ya̧ a̧mö̧nä̧ pa̧ja̧tö̧ unä i̧sä̧ta̧ juä'ocu a̧'cua̧cua̧'a̧ jä̧'i̧nö̧'a̧nö̧ ja̧'hua̧ta̧'a̧nö̧ tti'querä iyaju ka̧mö̧nä̧ pa̧ja̧tö̧ rö̧ä̧nä̧ micuäu jähuättä ka̧'cua̧tä̧cuä̧hua̧'a̧ jä̧'i̧nö̧'a̧nö̧. ¹¹ Ja̧'hua̧nö̧ ja̧'a̧ rȩjȩttö̧ cuähuä ade ba'u rärea'a jä̧'i̧nö̧'a̧nö̧ ja̧'hua̧ta̧'a̧nö̧ ä̧'u̧ huȩju̧ buojuoa'a jä̧'i̧nö̧'a̧nö̧. Ja̧'hua̧nö̧tä̧ TÖ̧Ä̧NÄ̧HUA̧MÄ̧ Dios adihuomenä jȩä̧cuä̧huä̧'i̧nä̧ ra̧huä̧huä̧'i̧nä̧ ttö̧ja̧ o'catoi'önä ttä'ca jo̧mȩttö̧ räreäcua'a.