¹ Ucu isaju ki̧tti̧mö̧ to'aju ra̧'i̧, ucu ki̧tti̧mö̧rö̧ uhuäbecuocoju pä'ijäjumä; pä̧i̧cu̧nä̧ rä̧mi̧pö̧nä̧ ra̧'i̧ ja̧'hua̧ta̧'a̧nö̧ pä̧i̧cu̧nä̧ huopi, ucu yorö'iso cumadöma o'caju juo'ocopä'ijäjumä. Ja̧'hua̧nö̧ ja̧'a̧ ttuju'cococua ki̧tti̧mö̧tä̧ jä̧cua̧'a̧ yabonänö huotömä isaju kirecuocu kä̧ju̧ ki̧tti̧mö̧mä̧cö̧," Pä'ötó TÖ̧Ä̧NÄ̧HUA̧MÄ̧. ² Cuojusode huä̧mȩ mö̧ȩcuä̧ta̧ rö̧ä̧ta̧ aditi ja̧'hua̧ta̧'a̧nö̧ tto̧ȩcuä̧ta̧mä̧ otonä̧nö̧ setädi, rö̧ä̧nä̧nö̧; appiyä'i̧nä̧ otodi juhua'täcu 'chu̧huä̧rö̧nä̧ ti̧ä̧dä̧cuä̧huä̧ o̧'quȩ'i̧nä̧ koro ku̧ni̧. ³ Ja̧'hua̧nö̧ ja̧'a̧ ucumä cu̧huo̧jua̧'a̧cu̧'i̧nä̧ cuieruhua'acu'i̧nä̧ ri'äu cuicuaja ja̧'hua̧ta̧nö̧ cui̧tti̧mö̧mä̧ ttö̧ja̧rö̧ 'chottipäcuotö ja̧'hua̧nö̧ 'cho'ipö ötahuiyä juiyinomemä pä'äjita'anö ttaditäcuotö. ⁴ Ja̧'hua̧nö̧ ja̧'a̧ttö̧ yecuecuä dä'ä ttu'ocoju cuäcuajujä, cui̧mȩya̧huä̧chi̧'ä̧ ucuo jui'aju pättococua cuäcuajujä; ucumä cunichi'ajá mö̧ä̧yaju ku̧jä̧i̧ dä̧'ä̧ri̧ji̧nö̧mä̧ ja̧'hua̧ta̧'a̧nö̧ cucuo jui'aju jö̧nä̧ tticuipinö'i̧nä̧. ⁵ Isopäi'önä ucuru uhuäbetö ku̧ni̧nö̧tä̧ ja̧'a̧ cuirecuomä; imimä o'cajuiyönä ju̧ru̧hua̧ pättäcu. Israel ttö̧ja̧ ttu̧ru̧hua̧ surojö jui̧'a̧ ucuru rä'epä icu mitömä; Ja̧u̧mä̧ pi̧jä̧ rȩjȩ o'cajuiyönä u̧ru̧hua̧ pä'ö ottäcu. ⁶ Ja̧'hua̧nö̧ ja̧'a̧ TÖ̧Ä̧NÄ̧HUA̧MÄ̧ pä'äjita'anö huoäcuajä̧ jarotti'äcuarö huotta'a jä̧'i̧nö̧'a̧nö̧ ja̧'hua̧ta̧'a̧nö̧ ka̧'cua̧ru̧hua̧nä̧'i̧nä̧ ka̧'cua̧ tta̧'ȩcuä̧ju̧ru̧, mö̧ä̧yajuru ttirecua päi'önä ȩmö̧'cotö jarotti'äcua jö̧nä̧ huajuru," pä'ötó Diosmä. ⁷ A̧'u̧cu̧nä̧tä̧ mo̧ro̧tä̧ chicuipä̧cua̧jä̧, ja̧'hua̧nö̧ ja̧'a̧nä̧ rö̧ä̧nä̧ rȩrä̧jö̧nö̧ topö pä'äjita'anö chȩma̧cua̧jä̧. ⁸ Rö̧ä̧nä̧ chamisurumä chi'änätä̧ daju icuäjisä ucurumä jurunä̧tä̧; ja̧'hua̧nö̧ ja̧'a̧nä̧ cha̧'cua̧ huȩnä̧rö̧ cchesecuinö beipocönä̧mä̧ ucurumä rȩrö̧jö̧nö̧ to̧chä̧cua̧sä̧ pä'ötó TÖ̧Ä̧NÄ̧HUA̧MÄ̧ ucuru rä'epö icuinö̧mä̧. ⁹ Ja̧'hua̧nö̧ ja̧'a̧ pi̧yȩmä̧ ajiya Noe ö̧ji̧nö̧ pä̧nä̧ ichinoya ji̧na̧'a̧nö̧ ja̧'a̧ ttörömä: Huȩnȩtö̧ pä'inö Noé ö̧ji̧nö̧ ichiyamä yorö'isotä pä'äjita'anö̧mä̧ ichocoya jäcuoya pi̧jä̧ rȩjȩnä̧mä̧, ucurumä ro̧'ȩpö̧mä̧ ra̧huä̧ro̧cö̧ chä̧cua̧sä̧ pä'inö̧sä̧. ¹⁰ Mö̧ä̧'ca cacuächi'ö maächö̧ttö̧'i̧nä̧ ja̧'hua̧ta̧'a̧nö̧ po̧ri̧yä̧'tä̧ jö̧ o̧dö̧'i̧nä̧ ttö̧ä̧hua̧ja̧ pä'ö'i̧nä̧ ucuru cädädi'oca'a eseu repedömä ucuttömä 'cä̧i̧pä̧cho̧ca̧'a̧ jä̧cua̧'a̧ ttö chesecuinö̧ huȩnȩ juiyömä pä'äjita'anö ppa̧huä̧chi̧'ä̧cua'a, pä'ötó TÖ̧Ä̧NÄ̧HUA̧MÄ̧, ucuru re kö̧mä̧. ¹¹ Ka̧'cua̧ tta̧'ȩcuä̧ju̧mä̧, usurä ȩma̧huä̧ju̧mä̧ pȩnȩ jubötä ja̧'a̧cua̧ja̧ pä'ocoju, topittö, Ttömä cu̧ma̧nä̧mä̧ turquesattö aditö chu̧nä̧cua̧sä̧ ja̧'hua̧nö̧ rö̧nö̧ kada'ca 'chu̧huä̧ro̧mȩmä̧ safirottö chu̧tä̧cua̧sä̧. ¹² Ju'tojunä̧mä̧ rubiésttö chaditäcua̧sä̧ ja̧'hua̧ta̧'a̧nö̧ äpatiyämä ido'qui säruhuo'quittö juhua'atäcu ttoecuäbä huä̧mȩnä̧mä̧ inä rö̧ä̧nä̧ micuäu juäittö. ¹³ Ja̧u̧nu̧ o'ca'a cui̧tti̧mö̧mä̧ TÖ̧Ä̧NÄ̧HUA̧TTö̧ huo̧juȩtö̧ icuähuotötä huotö ja̧'hua̧ta̧'a̧nö̧ cui̧tti̧mö̧ huȩnȩ juiyömä̧ ttö̧ja̧cu̧mä̧ ji̧yȩtȩtä̧ jä̧cua̧'a̧. ¹⁴ Adihuomȩnä̧ jȩä̧cuä̧huä̧mä̧ Ttötä jä̧cua̧'a̧ ucuru ppa̧'a̧di̧pö̧ chi̧yä̧cua̧mä̧. Täcö ucuru cuä'ö tticua pä'ö ru̧ttä̧rö̧mä̧ juiyäcua'a, ja̧hua̧nö̧ jo̧mȩnä̧ ye'ecuocö cuä̧cua̧jä̧ ja̧'hua̧ta̧'a̧nö̧ ucurumä ki'opö icuähuoca'a jä̧cua̧'a̧. ¹⁵ Topittö, ya̧tȩ huȩnȩ käbe'öttömä, Ttö jähuämä jo̧ka̧'a̧ jä̧cua̧'a̧tó; ya̧tȩ huȩnȩ räepöttömä̧ kä'i icunä̧tä̧ ma̧ȩmä̧cua̧. ¹⁶ Topittö, cuoräuttö aditörö uhuäbe'inö̧sä̧, Chu ya̧tȩ ä̧ya̧ri̧sanä ppu'umä̧ curä rohuäcuä aditähuä jö̧nä̧tä̧ hua̧, ja̧'hua̧ta̧'a̧nö̧ Ttömä si'epö i̧cuä̧cua̧rö̧'i̧nä̧ uhuäbe'ö ku̧ni̧nö̧sä̧. ¹⁷ Curä rohuäcuähuänä ucuru kä'ö tticua pä'ö ja̧'a̧nä̧ jo̧ca̧'a̧ jä̧cua̧'a̧; ja̧'hua̧ta̧nö̧ ucuru ja̧u̧ jȩpä̧ji̧ pä'ö huȩnȩtö̧mä̧ toe'ächa pä'ötä ku̧nä̧huä̧cua̧. Pi̧yȩ ja̧'a̧ TÖ̧Ä̧NÄ̧HUA̧ u̧mö̧huä̧ya̧rö̧ umö̧ jähuä i̧yä̧huä̧cuȩmä̧, ja̧'hua̧ta̧'a̧nö̧ Ttöttö huȩnȩ juiyönä räecuämä-- Pa̧'a̧nö̧tä̧ pä'ötó TÖ̧Ä̧NÄ̧HUA̧MÄ̧."