¹ Jitämä ra̧dä̧cua̧sä̧ rö̧ä̧nä̧ redepäcuru, chutä i'ätta uva pättanä huä̧nȩtö̧. Ttö repedäcumä möä'ca kada'ca rȩjȩ ppuruhuome ku̧nä̧ri̧nö̧ ö'ätta uva pättamä. ² Ja̧u̧mä̧ rȩjȩ 'cuä'epö, i̧nä̧'o'qui'i̧nä̧ ȩmö̧ icuinö. Adihuä juäi uvattö ku̧ni̧nö̧. Jahuata'anö ö'ätta kä'co päte'ö ju'toju isä'ca sa'u ärädö ku̧ni̧nö̧ to̧ö̧rä̧cua'a pä'ö, ja̧'hua̧ta̧'a̧nö̧ uva ocha 'cuȩ'cuä̧huä̧cuo̧ca̧'i̧nä̧ aditinö, ja̧u̧nu̧ o'comenä uva sa̧dö̧ huȩji̧ya̧rö̧ pä'ö tta̧'ä̧ri̧nö̧, ja̧'hua̧nö̧ ja̧'a̧nä̧ uva reötä huȩji̧nä̧yä̧cu̧. ³ Ja̧'hua̧nö̧ ja̧'a̧ttö̧ jitämä ucutu Jerusalén ttö̧ja̧, jahuata'anö Judáttö umätö̧, ttö chötö'cö'inä chi'ätta ötö'cö'inä ucututä pä'ätucuittö, ttöcö, chi'ättacö jäyä jö̧mä̧. ⁴ ¿chi'ätta uva pättanämä däje jȩchö̧'a̧nö̧ jö̧ ka̧'a̧nä̧ jȩchö̧ juiyönä jä̧cu̧sä̧ttö̧ ttömä? Ttömä uva adihuä juäi u̧huä̧ju̧tä̧ tta̧dä̧ra̧'a̧nä̧, ¿Tta̧'a̧nö̧ pä'ö cuä̧cuä̧huä̧nä̧ rȩö̧tä̧ räopa'attö? ⁵ Jitämä ttötä ji̧dä̧huä̧cua̧sä̧ chi'ättanä jȩchä̧cuä̧mä̧: jäyänä ttoecuämä pperetö chicuäcua̧sä̧, ju'toju isä'ca'inä kä'ö chi̧cuä̧cua̧sä̧, i̧sa̧ppä̧ päi'önä mo̧ä̧mö̧nä̧. ⁶ Huä̧i̧nä̧tä̧ toe'ächa'anä to̧chä̧cua̧sä̧, 'cui'ö'inä 'cuidö jui̧yä̧cua̧sä̧ aditö'inä chu̧ju̧ni̧yä̧cua̧sä̧. ja̧'hua̧nö̧ ja̧'a̧ttö̧ huä̧i̧nä̧ isä'cua so̧ä̧'cua̧tä ba'ö kä̧cua̧'a̧. Ttömä ju'tojuttumä ajiya'i̧nä̧ ichö juiyönä huȩdä̧cua̧sä̧ juhuättanä̧mä̧. ⁷ Mo̧ro̧ji̧yä̧ttö̧ su̧ro̧da̧u̧ ttu̧ru̧hua̧ Dios i'ättiyu jö̧nä̧ huotömä Israel ttö̧ja̧ ja̧'a̧, Judáttö u̧mä̧tö̧mä̧ i'ätta ji̧nä̧ isocu adihuätta jö̧nä̧ huotö ja̧'a̧; isopäi'önä ja̧u̧mä̧ tta̧'a̧ri̧nö̧ chutä hueähuätä jȩtti̧ya̧rö̧ pä'ö, ja̧hua̧nö̧ ja̧'a̧nä̧ suronätä̧ ttö̧ja̧rö̧ cuä'äu icu jȩpi̧nä̧tö̧; ja̧'hua̧nö̧ jȩttä̧u̧ pä̧i̧cu̧nä̧ ppa̧ttä̧da̧ttö̧ pä'ö huotta'a rämipina'a. ⁸ ¡Jati jitöhue ttoju odehuiyä isariyä'inä 'cho'ipä'chätöhue ji̧yȩtȩ'i̧nä̧ ki̧'i̧pä̧'chö̧ juiyönätä̧ cui̧rȩjä̧nä̧tä̧ cu̧ji̧pä̧'chä̧tu̧cu̧nä̧ jȩpä̧tu̧hue! ⁹ Mo̧ro̧ji̧yä̧ttö̧ su̧ro̧da̧u̧ ttu̧ru̧hua̧mä̧ päinä̧cu̧sä̧: rö̧ä̧nä̧ odehuiyämä icuicuä odetä kä̧cua̧'a̧, ja̧'hua̧ta̧'a̧nö̧ odehuiyä bäreu'inä ttö̧ja̧ toötä kä̧cua̧'a̧. ¹⁰ Jahuata'anö huäba'acuä hectarea uva pättattömä, jibate jo̧mȩtä̧ räopäcua'a, jahuata'anö to̧mu̧rȩ jähuä ku̧nä̧huä̧ otettömä jitete jo̧mȩtä̧ räopäcua'a. ¹¹ ¡Jati jitöhue yo̧ä̧sa̧ ja̧'a̧nä̧ porächö uva isoya tä̧ttä̧ma̧ pä'ötä a̧mo̧cuädätöhue, juhua'a jö̧ ta̧'a̧nö̧ ni̧pä̧ro̧mȩ juhua'a päi'önä vino isoya juruhuächa'anä tta̧'a̧rä̧tö̧hue. ¹² Jahuätömä pä'cäri jȩpä̧'chö̧tä̧, jahuata'anö 'porähuobönä 'po̧rä̧rö̧tä̧, mä̧rä̧ni̧yu̧nä̧ ppö̧ppö̧pö̧tä̧ vino isoya a̧huä̧rö̧tä̧ ka̧cuä̧tö̧, a̧'u̧cu̧nä̧'i̧nä̧ tta̧mo̧cuädoca'atä ttu̧ru̧hua̧ Dios jitörötä aditinö̧rö̧mä̧. ¹³ Ja̧'hua̧nö̧ ja̧'a̧ttö̧, ttö chu̧mu̧huäyotömä korotö pä̧i̧cu̧nä̧ huȩttä̧rä̧u̧tä̧ ttö̧jö̧nä̧ ju'huächätö a̧mo̧cuädäcuöhuä juiyönä ttö̧ja̧'a̧ttö̧; ja̧'hua̧ta̧'a̧nö̧ tturuhuotö ucuo ttö̧ja̧mä̧ ppäi ttu'huätö, ja̧'hua̧ta̧'a̧nö̧ ttu̧mu̧huäyotö recuätömä ttahua pä'ö'i̧nä̧ jui'ätö. ¹⁴ Ja̧'hua̧nö̧ ja̧'a̧ttö̧ ocurä dubora ämä rahuädi'a pä'ömä juiyo cähue'ächi'a'a; ja̧'hua̧ta̧'a̧nö̧ ucuo ttö̧ja̧ huocotörö'i̧nä̧, ucuo ttö̧ja̧rö̧'i̧nä̧, suronä jȩä̧cuä̧huä̧ tttö̧ja̧rö̧'i̧nä̧, jahuätöcutä eseu ka̧cuä̧'i̧jä̧tö̧mä̧ ocurä duborara̧'a̧tä̧ jui'ädö icuähuotö pätti'äcuotö. ¹⁵ Ttö̧ja̧rö̧mä̧ pä̧i̧cu̧nä̧ huettäcuotö ja̧rȩyu̧nu̧ pätti'önä, ja̧'hua̧ta̧'a̧nö̧ pi̧jä̧ ttö̧ja̧mä̧ dä'ä ttuttäcuotö; adiunä jȩpä̧ttö̧jä̧ pä'ätömä dä'ä ttu'ecuotö ttäcuotö. ¹⁶ O'cajuiyönä ju̧ru̧hua̧mä̧ päöta'anö jȩa̧'a̧ topö ucuo tȩttä̧huä̧cua̧, Surojö jui̧'ä̧ Diosmä i̧jȩpä̧cua̧ iso jö̧nä̧ jȩö̧ttä̧. ¹⁷ Ja̧'hua̧nö̧ jo̧mȩnä̧tä̧ ttä̧ji̧mu̧ o̧huȩjä̧tö̧mä̧ ttä̧mo̧nä̧ ttucuä'cua ttucuäcuotö, ötahuiyä ji̧nä̧mȩ bahuä'cuatä, koromettö̧ ichö ttucuäcuotö juoromä. ¹⁸ Jitö suronä jȩpö̧ kä̧tö̧ hué isappanä iso juottepoca'anä jȩpä̧tö̧ ha̧'hua̧ta̧'nö̧ suronä jȩä̧cuä̧huä̧nä̧ kä̧tö̧ carucä amäca'a doa'a jä̧'i̧nö̧'a̧nö̧. ¹⁹ Jitö pa̧'a̧nö̧ pä'ätöhué: "Diostä urunä jȩa̧'a̧nä̧ ja̧'a̧tä̧ topätucui, o'capäi'önä jȩa̧'a̧, tta̧'a̧nö 'cuäopapä'ö totätucua; ja̧'hua̧nö̧tä̧ ja̧'a̧tä̧ topätucui Israqelttö surojö jui̧'ä̧ pocu icha'anä, ujutu'inä totarö." ²⁰ ¡Jitö surojö'inä adihua'a pä'ätöhu'e hué, jä̧'hua̧ta̧'a̧nö̧ adiu'inä surojö pä'ätö; yo̧ö̧ta̧ i̧jȩpä̧tö̧ tȩa̧u̧ jä̧'i̧nö̧'a̧nö̧, ja̧'hua̧ta̧nö̧ tȩa̧u̧tä̧ yo̧ö̧ jä̧'i̧nö̧'a̧nö̧; reu'inä sa̧dö̧ pä'ätö hué, ja̧'hua̧ta̧'a̧nö̧ sa̧dö̧'i̧nä̧ re'ö pä'ätö! ²¹ ¡Jitö toputä huo̧juä̧tö̧jä̧ pä'ätö hué, ja̧hua̧ta̧'a̧nö̧ tta̧mo̧nä̧ ttamucuädötä juo̧ju̧nä̧ huotöjä pä'ätöhué! ²² ¡Jitö a̧'ti̧poya ttahuomenätä̧ juo̧juä̧tö̧jä̧ pä'ätö hué, ja̧'hui̧a̧ta̧'a̧nö̧ rö̧ä̧nä̧ a̧'tö̧nä̧ huihuatö huo̧juä̧tö̧jä̧ pä'ätö; ²³ Jitö suronä jȩpä̧tö̧rö̧ mitö rä'epö icuätö hué, ja̧'hua̧ta̧'a̧nö̧ suronä jȩpo̧co̧tö̧rö̧'i̧nä̧ kärenä rötätö! ²⁴ Ja̧'hua̧nö̧ ja̧'a̧ttö̧ ocuräma ku'icua'a resabä isä'cua, ja̧'hua̧nö̧ ja̧'a̧ttö̧ isäcua joä'cuanämä ocurä rä̧ma̧'a̧, ja̧'hua̧nö̧ jo̧mȩnä̧mä̧ ihuehui appiya'inä hua'ö icuäcua'a. Pi̧yȩmä̧ 'cuäopäcua'a jitö O'CAJUIYÖNÄ JU̧RU̧HUA̧ hueinö kö'cocotörö, ja̧'hua̧ta̧'a̧nö̧ jitö Israel ttö̧ja̧ Ttö̧ä̧nä̧hua̧ surojö jui̧'a̧rö̧ kö'cocotörö. ²⁵ Ja̧'hua̧nö̧ ja̧'a̧ttö̧, TÖ̧Ä̧NÄ̧HUA̧MA̧ amisurunä topö umuhuäyotörömä. Umu̧huä̧yo̧tö̧rö̧mä̧ chutä u̧munätä̧ ro̧'ȩpö̧. muö'quiyu'inä ttö̧ä̧hua̧'a̧, ja̧'hua̧ta̧'a̧nö̧ 'coruhuo'ächätömä surähui 'cua̧rö̧nä̧ mänänä pȩjä̧tö̧. Ja̧'hua̧nö̧ 'cuäopa'anä'inä, ö̧'ä̧i̧mä̧ pȩjä̧mo̧co̧cu̧, yabocutä u̧mu̧ cä'epö ro̧'ȩpö̧. ²⁶ Ja̧u̧mä̧ pö̧jä̧ta̧ cä̧ȩpä̧cua̧ pi̧ji̧ ttö̧ja̧ oto ko̧cuä̧tö̧ totta pä'ö ja̧'hua̧ta̧'nö̧ jua̧ä̧cua̧ tti̧rȩjä̧tö̧ oto ko̧cuä̧tö̧ totta pä'ö. Topätucui, jahuätönä o'capäi'önä ujurunänö ttichi'äcuotö. ²⁷ Ya̧tȩtö̧'i̧nä̧ 'cuä'ächi'ocotö ko̧ro̧nö̧mä̧ ö̧tä̧ri̧jö̧na̧'i̧nä̧ jȩpo̧co̧tö̧ jitötättömä;Ya̧tȩtö̧'i̧nä̧ ä'ö'inä ä'ocotö. Ttäca isaya'inä ejädäcuähuocotö, ttö̧jä̧pö̧ isäya ti̧ä̧dä̧cuä̧huo̧mȩ'i̧nä̧ ejädäcuähuocotö. ²⁸ Ttuppo̧pö'ari'inä jo̧mȩnö̧ sa̧huȩcua̧'a̧ ja̧'hua̧ta̧'a̧nö̧ ttuppopobu'inä jo̧mȩnä̧ po̧'ȩpö̧ ku̧nä̧hua̧'a̧; ca̧hua̧yu̧tu̧ru̧ huä̧nä̧huä̧ otta'inä säru'unä 'ca̧'o̧ ku̧nä̧hua̧'a̧, ja̧'hua̧ta̧'a̧nö̧ caruquiyä ö̧jä̧pö̧ o'ca'inä pä̧i̧cu̧nä̧ rahuähua'a kä̧rö̧'co̧ isoppa döa'a 'cua̧rö̧nä̧. ²⁹ Mö̧yähui huoa'a jä̧'i̧nö̧'a̧nö̧ rä̧mi̧pä̧cua̧'a̧; durutäcuotö mö̧yähui i̧tti̧mö̧ 'cua̧rö̧nä̧. Pä̧i̧cu̧nä̧ huopä 'chuttädäcuotö ttö̧'o̧ya̧rö̧ ja̧'hua̧nö̧ 'chu'ädö ttö̧'o̧ya̧rö̧ oto dottäcuotö, ya̧tȩ'i̧nä̧ pä'ädömä toäcua'a. ³⁰ Ji̧yȩnö̧ mo̧ro̧ päo'omenämä ttu̧cuä̧nä̧ 'tö̧'chä̧u̧ huottäcuotö aje pä̧i̧cu̧nä̧ dö'ö ucuocua'a 'cua̧rö̧nä̧. Ya̧tȩ a̧juä̧jä̧ rȩjȩnä̧ toöttömä; Ajiya isoppa a̧ttä̧chi̧'ä̧cua̧'a̧ yo̧i̧'ö̧nä̧.