¹ Ru̧hua̧ Ezequías ichinödo cuyäru isojänä i̧huȩyu̧tä̧ji̧ jä̧ji̧ ä̧ju̧cu̧, ja̧u̧nu̧ o'come ö̧'ca̧ta̧hua̧ta̧ serocu icuinö , chutä a̧mo̧nä̧ attocuinö siliciottö, ja̧'hua̧nö̧ jȩpö̧ doächinö u̧ru̧hua̧ Ö̧Ä̧NÄ̧HUA̧ ojusodenä. ² Ja̧u̧ hueö icuinö Eliaquimrö̧, isode tta̧cua̧ra̧ pä'ö hua̧rö̧, ja̧'hua̧ta̧nö̧ cuyäru isojä huȩyu̧cuä̧ i̧sa̧rö̧'i̧nä̧ ja̧'hua̧ta̧nö̧ sacerdotes ucuo ttä̧mu̧'i̧nä̧, o'cato'inä silicio attöcuinä̧ttö̧, Isaías Amoz, i̧tti̧ jjna̧'a̧ Dios pä̧'ö̧ huȩnȩ jiäumä ³ Jahuätö jittähuäcu: Ezequías pä'inö: 'Pi̧yȩ mo̧ro̧mä̧ ta̧'ja̧huä̧rö̧nä̧, ro̧ȩcuä̧nä̧, ja̧'hua̧ta̧nö̧ surojötä jä̧u̧jä̧, ji̧'qui̧chä̧cua̧ uhuäpächa pä'ö jo̧mȩnö̧ jä̧i̧nö̧'anö, ja̧hua̧nö̧ ja̧'a̧nä̧ ja̧ju̧mä̧ kujuru jui'aju ki̧tti̧rö̧ cuhuabecua pä'ömä. ⁴ Cu̧ru̧hua̧ CUÄ̧NÄ̧HUA̧ Dios ä̧ju̧cu̧ttu̧mä̧ Asiriattö ru̧hua̧ pä'iönä hueäcu i̧huȩnȩ, u̧ru̧hua̧ hueäcu Dios 'cuäopönä a̧'cua̧rö̧ kö̧rö̧ ö'aroda pä'ö, ja̧'hua̧nö̧ ja̧'a̧ttö̧ ucu CUÄ̧NÄ̧HUA̧ Dios ä̧ju̧cuä̧ji̧ rö̧ȩpö̧nö̧ pä̧cua̧. Jitämä Dioscutä jäecu ucuocí jinä ko̧cui̧pä̧jä̧tö̧mä̧ penȩtä̧ kä̧tö̧ pä'ö. ⁵ Ja̧'hua̧nö̧ ja̧'a̧ttö̧ ru̧hua̧ Ezequías umuhuäyotö ichinätö̧ Isaías topö, ja̧u̧ Isaías pä̧i̧nä̧u̧: ''Cu̧ru̧hua̧tu̧cu̧ru̧ pänö pähuätucuajá: ⁶ Ja̧u̧ TTÖ̧Ä̧NÄ̧HUA̧ pä'ö: ''Ucu cuä̧ju̧cuä̧ji̧ttö̧mä̧ yecuäcuähuämä cu̧ju̧nä̧rä̧, ru̧hua̧ Asiria umuhuäyotö ra̧huä̧rö̧nö̧ huottömä. ⁷ Ä̧ju̧cui̧, TTÖTÄ, cuȩdä̧cua̧sä̧ a̧'cua̧ ru̧hua̧rö̧ ja̧u̧nä̧ ö̧ja̧ pä'ö, ja̧'hua̧nö̧ ja̧'a̧ttö̧ ja̧u̧mä̧ ä̧ju̧cuä̧cua̧ huȩyu̧cui̧nö̧mä̧ a̧mo̧nä̧ i̧rȩjä̧ra̧'a̧ttä̧ ppa̧huä̧chä̧cua̧. TTÖTÄ jȩchä̧cua̧sä̧ amonä i̧rȩjä̧ttö̧ curächunä 'cui'opö tticuarö pä'ö. ⁸ Ja̧'hua̧nö̧ ja̧'a̧ ttu̧ru̧hua̧ päiönä hueö kö̧ ppa̧'a̧chö̧ po̧cui̧pi̧nö̧ Asiria ru̧hua̧ örohuahua'a Libnacu̧, ja̧'hua̧nö̧ ja̧'a̧nä̧'i̧nä̧ ja̧u̧mä̧ ä̧ju̧cui̧nö̧ ru̧hua̧mä̧ tä'cö i̧cuä̧ji̧ oto Laquittömä. ⁹ Ja̧'hua̧nö̧ ja̧'a̧ Senaquerib ä̧ju̧cui̧nö̧ Tirhacamä, Etiopiattö'inä ja̧'hua̧ta̧nö̧ Egiptottö'inä ttu̧ru̧hua̧ hua̧, ja̧u̧mä̧ umuhuäyotörö hueinö ja̧u̧cu̧ curä ttörohuäcua pä'ö, ja̧'hua̧nö̧ ja̧'a̧ttö̧ huȩnȩ ȩcuä̧ isotorö hueinö pä'äjita'anö huȩnȩ ȩpö̧ tti̧'cha̧ pä'ö Ezequiasrö: '' ¹⁰ Päcuätucuaja Ezequiasrö, Judá ru̧hua̧: 'Ucu cuä̧nö̧hua̧ Dios cua̧'cua̧ cuä̧nä̧rö̧cu̧ iyaparehua'anämä cuiyähuo,pa'anö pä'ö:' ''Jerusalénmä Asiria ru̧hua̧ huea'anämä iyähui̧yä̧cua̧.'' ¹¹ Topi, ucumä ä̧ju̧cui̧nö̧jä̧ Asiria ruhuotö jȩtti̧nö̧mä̧ o'cajuiyönä ja̧'huä̧jä̧ rȩjȩnä̧mä̧, siepö icuinättö̧ ki̧'i̧pö̧ juiyönä̧tä̧. Ja̧'hua̧nö̧ jo̧mȩnä̧mä̧, ¿ucumä ppä̧ttä̧dä̧cua̧jä̧ tä̧ji̧? ¹² ¿pi̧jä̧ ttö̧ja̧ tti̧ä̧nä̧huo̧tö̧ ppättädinä̧u̧ta̧ji̧, ttö chäottö chä̧do̧ttö̧ minä tti̧rȩji̧yä̧ siepö ttihuinömä: Gozán, Harán, Resef'inämä, ja̧'hua̧ta̧nö̧ Edén ttö̧ja̧rö̧ Telasar ko̧cuä̧tö̧rö̧'i̧nä̧? ¹³ Tene ö̧jä̧ttö̧ Hamat ru̧hua̧mä̧, Arfad ru̧hua̧mä̧, Sefarvaim ötahuiyä ru̧hua̧mä̧, Hena'i̧nä̧ ja̧'hua̧ta̧nö̧ Iva'i̧nämä?'' ¹⁴ Ezequiasmä rȩbȩcui̧nä̧cu̧ pätetö huȩyu̧tu̧ hueäcuojä huȩnȩ ȩcuä̧ isotö ȩpö̧ ttiyäcu ucuocuinö. ja̧'hua̧ta̧nö̧ ja̧u̧mä̧ 'cha'achächinö Ö̧Ä̧NÄ̧HUA̧ ojusoderä'acu ja̧'hua̧ta̧nö̧ JA̧U̧ ä'cattö teädinö. ¹⁵ Ezequíasmä Ö̧Ä̧NÄ̧HUA̧CU̧ ¹⁶ ucuocuinö:''TTÖ̧Ä̧NÄ̧HUA̧ juiyo ju̧ru̧hua̧, Israel TTÖ̧Ä̧NÄ̧HUA̧ Dios, ucutä ja̧'a̧ querubín ttu̧ȩmȩnä̧ kö̧mä̧, ucu ka̧tä̧cua̧tä̧ ja̧'a̧ Diosmä pi̧jä̧ rȩjȩnä̧ ruhuo hueätö ttu̧ȩmȩnä̧ hua̧mä̧. ucu ja̧'a̧ mo̧ro̧jö̧'i̧nä̧ rȩjȩ'i̧nä̧ uhuäbe'inömä. ¹⁷ Cu ja̧rȩyu̧ pä'iö ä̧ju̧cui̧ TTÖ̧Ä̧NÄ̧HUA̧ , cuiäriyä'inä baepi,TTÖ̧Ä̧NÄ̧HUA̧ ja̧'hua̧ta̧nö̧ topö ä̧ju̧cui̧ Senaquerib i̧huȩnȩ, ja̧u̧tä̧ ja̧'a̧ Dios huao'cörö ya̧tta̧cuä̧'cha̧ pä'ö hueinömä. ¹⁸ Isopäiönä ja̧'a̧, TTÖ̧Ä̧NÄ̧HUA̧ , Asiria ruhuotömä siepö tticuina̧'a̧mä̧ ttö̧ja̧ o'catoinärömä ja̧'hua̧ta̧nö̧ tti̧rȩji̧yä̧'i̧nä̧mä̧. ¹⁹ Jahuätö tti̧ä̧nä̧huo̧tö̧rö̧ ocurä jahuä icuinä̧tö̧, ja̧'hua̧nö̧ ja̧'a̧nä̧ jahuätömä tti̧ä̧nä̧huo̧tö̧mä̧'cö̧ ji̧na̧'a̧, ttö̧ja̧ ttu̧mu̧nä̧ adihuätä ji̧na̧'a̧, dau soda ttötä ja̧'hua̧ta̧nö̧ ido'quittötä. Ja̧'hua̧nö̧ ja̧'a̧ttö̧ Asirios ttö̧ja̧mä̧ siepö tti̧cui̧na̧u̧. ²⁰ Ja̧'hua̧nö̧ ja̧'a̧ttö̧ jitämä TTU̧RU̧HUA̧ TTÖ̧Ä̧NÄ̧HUA̧ Diostä cujuruttö tö̧ji̧pö̧nä̧ ppä'äditö, pi̧jä̧ttö̧ ruhuo hueätö o'catoinä ttu̧huo̧juä̧cua̧'a̧nö̧ UCU ya̧tȩtä̧ ja̧'a̧ pä'ö TTÖ̧Ä̧NÄ̧HUA̧MÄ̧''. ²¹ Ja̧'hua̧nö̧ jo̧mȩnä̧ Isaíamä, Amoz i̧tti̧mä̧ ji̧yȩtȩ huȩnȩ hueinö Ezequíarö, pä'inö: ''Ja̧u̧ TÖ̧Ä̧NÄ̧HUA̧ Israel ttö̧ja̧ TTÖ̧Ä̧NÄ̧HUA̧ Dios pä'ö: 'Tocu pä'ö TTÖRÖ jäcuepä Senaquerib, öttö'cö Asiria ru̧hua̧, ²² pi̧yȩ ja̧'a̧ TI̧Ä̧NÄ̧HUA̧ ucuocuinömä ja̧u̧ ötö'cömä: Sion ittiju uborö jerupaju köjö'cococujä ja̧'hua̧nö̧ ja̧'a̧nä̧'inä ya̧ja̧cuä̧'chä̧cu̧jä̧; Jerusalén ittijumä ucu cu̧ja̧'a̧cu̧ kusäyu rijäcuäcujä. ²³ ¿Dirö ja̧'a̧ttö̧ jarodö cuo'cua'amä? ¿Dicu döähuä'chö pä̧i̧cu̧nä̧ huo'cuä ja̧'hua̧ta̧nö̧ ucu cuiäriyänämä to̧pö̧jä̧ ttötä ja̧'a̧ mi̧cuä̧cua̧mä̧ pä'ö? Israel surojöttö 'kȩ'ȩcuo̧tö̧rö̧mä̧ cuabo'iyotö 'cua̧rö̧nä̧ jȩpö̧jä̧. ²⁴ Ja̧'hua̧nö̧ ja̧'a̧nä̧ ucu cu̧mu̧cuä̧ya̧ TÖ̧Ä̧NÄ̧HUA̧RÖ̧ jarodö pä'ä'chö: ' ttö chöcaruquiyänä 'chi̧nö̧sä̧ muä'quiyu juttära'a pä'iönä, Líbanottö'i̧nä̧ ju'toju jo̧mȩ jubö. Ttö chö̧'co̧rä̧hua̧sä̧ cedro dauhuiyä bäreu ju'toju jö̧ oimä, ja̧'hua̧ta̧nö̧ juorötä ciprés dauhuiyä chö'ojä̧cua̧sä̧, ttömä dodächäcua̧sä̧ ja̧u̧ ö̧jo̧mȩ abonä̧nö̧ juttärä'a pä'inä, dauhuiyä u̧huä̧ju̧ rö̧ä̧ö̧nä̧ ko̧cuo̧mȩ'i̧nä̧. ²⁵ Ttömä rȩjȩ reju'inä sai a̧hui̧nö̧sä ajiya; ttötä räepinösä̧ o'cajuiyönä Egipto ajehuiyämä chö̧jä̧pö̧ dea'a ttötä. ²⁶ ¿Ä̧ju̧cuo̧'cö̧ pi̧nö̧jä̧ tä̧ji̧ TÖTÄ jina̧'a̧ täbo'cötä pä'iönä pä'ö jȩpö̧ a̧di̧tö̧ ku̧ni̧nömä̧? Jitämä TÖMÄ 'cuä'opa'anä ja̧'a̧tä̧ topösä. Ucumä pȩnȩtä̧ kö̧jä̧ jarodö juruhuätöjä pö'ätö ttötahuiyä hui̧ä̧dö̧ siepö cuicuapä'ö . ²⁷ Umuhuäyotö, ttujuru juiätömä, siepö ihuäcuotö ja̧'hua̧ta̧nö̧ dä'ä ttuecuotö huotö. Jahuätömä dea isaränä dauhuiyä jä̧i̧nö̧'anö̧ huotö, dede'cua ppuruhuä'cua jä̧i̧nö̧tä̧ isode huä̧mȩ bahuä'cua jä̧i̧nö̧'anötä huotö, kä̧cua̧ räopa'acuttu ichoppa ppu'ötä i̧cuä̧'u̧. ²⁸ Ja̧'a̧hua̧nö̧ ja̧'a̧nä̧ TTÖMÄ huo̧jua̧sä̧ pö̧jä̧ pä'ömä, 'chö̧jä̧ pä'ö'inä, rä'opöjä pä'ö'inä ja̧'hua̧ta̧'a̧nö̧ ttörö'inä cuamisurunä topöjä. ²⁹ Ja̧'hua̧nö̧ ttörö cuamisurunä tocu'umä, tta̧'a̧nö̧ ja̧'a̧ttö̧ cuju'cocö rä̧mi̧pa̧'a̧jä̧ttö̧ TTÖ chä̧ju̧cuo̧mȩnä̧mä̧, ja̧'hua̧nö̧ ja̧'a̧ttö̧ a̧juä̧so̧bu̧ äcuädö cgö̧nä̧cua̧jä̧ cui̧ji̧yu̧nä̧, ja̧'hua̧ta̧'a̧nö̧ cuänä'inä 'chu'ädö chu̧ju̧nä̧cua̧jä̧; ja̧'hua̧nö̧ jȩpö̧tä̧ ttötä ppa̧'ä̧dö̧ chi̧cuä̧cua̧jä̧ cuichina'acutä cui̧chö̧nä̧." ³⁰ Ja̧'hua̧nö̧ jo̧mȩnä̧ jiäcuähuä jä̧cua̧'a̧ ucuru: pi̧yȩ a̧'ȩmä̧ de'attö pöttächötä cu̧cuä̧cua̧jä̧, todäre a̧'ȩ päi'omenämä juorö bautä cu̧cuä̧cua̧jä̧. Ja̧'a̧hu̧nä̧ ja̧'a̧nä̧ huäbodäcuä a̧'ȩ päi'omenä cuähuä ku̧nu̧ u̧huä̧ju̧ tto̧cuä̧cua̧jä̧, uva adiyä'inä u̧huä̧ju̧ cucuätucua pä'ö. ³¹ Juda ahuaruhuä o'cotö ko̧cui̧pä̧jä̧tö̧mä̧, pä'äjita'anä ihuehui appiyättö pöttächi'ö u̧huä̧ju̧ huȩjä̧cua̧'a̧. ³² Jerusalenttö'inä ko̧cui̧pi̧nä̧tö̧ röttäcuotö; Ja̧'hua̧ta̧'a̧nö̧ Monte Sionttö̧'i̧nä̧ ko̧cui̧pi̧nä̧tö̧ ttichäcuotö. Su̧ro̧do̧u̧'i̧nä̧ TTU̧RU̧HUA̧ TTÖ̧Ä̧NÄ̧HUA̧MÄ̧ ä'cuoyäunu repea'attö ja̧'hua̧nö̧tä̧ jȩpö̧." ³³ Jua'a yabocumä, TU̧RU̧HUA̧ TÖ̧Ä̧NÄ̧HUA̧ pi̧yȩ pä'ö Asiria ru̧hua̧ ötö'cömä: "Ja̧u̧mä̧ pi̧yȩ ötahuyänämä doächö jui̧yä̧cua̧, u̧ppo̧ri̧'inä ppo'ö jui̧yä̧cua̧. Ttoecuäbicu'inä ttoecumä ichö jui̧yä̧cua̧ ja̧'hua̧ta̧nö̧ ttoecuä'ca'inä ttaditiyäcuotö. ³⁴ Ichinö'anötä̧ ppa̧huä̧chä̧cua̧ ja̧u̧mä̧; jua̧u̧mä̧ pi̧yȩ ötahuiyänämä doächiyä̧cua̧ pi̧yȩ ja̧'a̧ TU̧RU̧HUA̧ TÖ̧Ä̧NÄ̧HUA̧ pä'ömä. ³⁵ Ja̧'hua̧nö̧ ja̧'a̧ttö̧ TTÖTÄ ppä'ädö tta̧dä̧rä̧cua̧sä̧ pi̧yȩ ötahuiyämä, TTÖTÄ chöadihuä i̧jȩcuä̧cha̧ pä'ö ja̧'hua̧ta̧'a̧nö̧ Chu̧mu̧huä̧ya̧ David-rö adihua pä'ö." ³⁶ Ja̧'hua̧nö̧ jo̧mȩnä̧ TÖ̧Ä̧NÄ̧HUA̧ huȩ'ä̧hua̧ isoppa hua̧ ángel rä'opö rohuähuinä asirio ttö̧ja̧ ttö̧jo̧cuo̧mȩ, cuä'äu icuinö 185mil su̧ro̧do̧u̧ jo̧mȩnä̧. Ko̧cui̧pä̧tö̧ mo̧ro̧ päi'a'a porächö tottomenä, recuätö cuä'ö icuähuotötä pȩji̧nä̧tö̧. ³⁷ Ja̧'hua̧nö̧ jo̧mȩnä̧ Asiria ru̧hua̧ Senaquerib, Israel jaropi'ö, idepiyura̧'a̧cu̧ 'chi̧nö̧ ja̧'hua̧nö̧tä̧ ki̧nö̧ Ninivenä. ³⁸ Ja̧'hua̧nö̧ jä̧ji̧ o'ca'a, ö̧ä̧nä̧hua̧ dios Nisroc-rö ucuocu ö'omettö, chutä i̧tti̧mö̧, Adramelee ja̧'hua̧ta̧'a̧nö̧ Sarazaer-cu, ichi'ö curä'chunö cuä'ö tticuinäcu̧. Ja̧hua̧nö̧ jȩpä̧ji̧'co̧tö̧ dö'ecuächinätö Ararat rȩjȩra̧'a̧cu̧. Ja̧'hua̧nö̧ jo̧mȩnä̧ Esar Hadón, chutä i̧tti̧tä̧, ruhuo hue'inä huea'ijö o'come.