¹ ¡Jatí ucuhue, si'epö icuähuä i̧sa̧ cua'anä si'epö icuähuocö pä'ijö! ¡Jatí ucuhue iyä'chäcuä i̧sa̧, iyö icuähuocö pä'ijöjä! Si'epö cuicuocö pä̧nä̧ si'epö i̧cuö̧huä̧cua̧jä̧. Iyö cuicuocö pä̧nȩ iyö i̧cuä̧huä̧cua̧jä̧. ² TÖ̧Ä̧NÄ̧HUA̧, rȩrö̧jö̧nä̧ topitö ujuturumä, ucurutä tta̧'ä̧rä̧tö̧jä̧; mo̧ro̧ juoöta'anö töjo jö̧nä̧ hua̧jä̧, huȩnȩ jo̧mȩnä̧ ja̧u̧ huȩnȩttö̧mä̧ ucunä̧tä̧ ki̧'ä̧tö̧jä̧. ³ Cui̧huȩnȩ rä̧mi̧pa̧'a̧ ä̧ju̧cu̧ ttö̧ja̧mä̧ dö'ecuächätö; ucu cuä̧rä̧mi̧'o̧mȩnä̧mä̧, ttö̧ja̧mä̧ pperecuächätö. ⁴ Rohuäu 'chocuipäjimä̧ ca̧ca̧tö̧ rutähuäcua'a mä̧rä̧cä̧yu̧rö̧ ttöta'a jä̧'i̧nö̧'a̧nö̧, mä̧rä̧cä̧yu̧ tötta'a jä̧'i̧na̧'a̧nö̧, ttö̧ja̧'i̧nä̧ mä̧rä̧cä̧yu̧ tötta'a jä̧'i̧nö̧'a̧nö̧ töttäcuotö. ⁵ TÖ̧Ä̧NÄ̧HUA̧MÄ̧ ucuo te'äu cä̧'ȩcua̧ ja̧'a̧. Ja̧u̧mä̧ ju'tojutä kö̧. Ja̧u̧mä̧ huȩä̧cua̧ adihuomenä ja̧'hua̧ta̧'a̧nö̧ jueönä jo̧mȩnä̧. ⁶ Cu̧ju̧'i̧nä̧ huȩnȩ juiyönä cu̧ju̧nä̧ jȩä̧cua̧jä̧, ra̧huä̧pi̧jö̧ttö̧ ki̧'ä̧cuä̧huä̧'i̧nä̧ rö̧ä̧nä̧ kö̧nä̧, huo̧juä̧huä̧ huȩnȩ'i̧nä̧ ja̧'hua̧ta̧'a̧nö̧ ttu̧huo̧jui̧'ö̧'i̧nä̧; TÖ̧Ä̧NÄ̧HUA̧RÖ̧ yecuäcuähuämä ucurumä rö̧ä̧nä̧ micuäu jä̧'i̧ja̧'a̧nö̧ jö̧. ⁷ Topittö, u̧mö̧huäyotö huȩnȩ ȩcuä̧ ttö̧ja̧mä̧ mä̧ni̧yä̧ttö̧mä̧ ajacuähuätö; todecu ppä'ädätömä huȩnȩ juiyönä kä̧cuä̧huä̧ tta̧'ä̧rö̧tä̧ rö̧ä̧nä̧ ajahuätö. ⁸ Mänämä to̧ö̧mä̧tä̧ ja̧'a̧, cue'ächätö'i̧nä̧ ja̧huä̧mä̧nä̧mä̧ 'cho̧co̧tö̧. Ttötodecuinö̧mä̧ 'toruhuächina'a, tottinö̧ ji'ähuätörö'i̧nä̧ kö'cocotö ja̧'hua̧ta̧'a̧nö̧ ttö̧ja̧rö̧'i̧nä̧ ucuotäcuähuämä juiya'a. ⁹ Rȩjȩmä̧ ajau joipächa'a; líbanomä dä'ättu'u joächächa'a; Sarónmä de'a jui̧yä̧jä̧ jä̧'i̧ja̧'a̧nö̧tä̧ juoächa'a; ja̧'hua̧ta̧'a̧nö̧ Basán'i̧nä̧, Carmelo'i̧nä̧ ojiyämä yȩ'ä̧u̧ icua'a. ¹⁰ Ja̧'hua̧nö̧ ja̧'a̧ TÖ̧Ä̧NÄ̧HUA̧MÄ̧ pä'ö: Ttömä chä̧mä̧ri̧'ä̧cua̧sä̧. Ja̧'hua̧nö̧ jo̧mȩnä̧ äräbe'ö ku̧nä̧huä̧cua̧sä̧; ja̧'hua̧nö̧ ja̧'a̧ttö̧ ucuo tȩ'ä̧cuä̧hua̧ jö̧nä̧ chö̧jä̧cua̧sä̧. ¹¹ Ucumä isä'cuatä̧ mucha juo̧cuä̧cua̧jä̧ ja̧'hua̧nö̧ jo̧mȩnä̧ isä'cuatä o'ca juo̧cuä̧cua̧jä̧, ucu cuamiyuppatäjä̧cua̧'a̧ ocurä jö̧nä̧ ku i̧cuä̧cuȩmä̧. ¹² Ttö̧ja̧mä̧ cuo'ö tticuäcuotö ä̧ya̧ri̧satä pätti'önä, isade so̧a̧de 'cui'opö icu ku tticua'a jä̧'i̧na̧'a̧nö̧. ¹³ Ucu oto kö̧mä̧, Ttö jȩchä̧'i̧jö̧ ä̧ju̧cui̧; ja̧'hua̧ta̧'a̧nö̧ ucu tö'cö kö̧mä̧ chujuru'i̧nä̧ huo̧juä̧chi̧'i̧." ¹⁴ Sión ttö̧ja̧ surojötä jȩpä̧tö̧mä̧ ye'ecuätö; yecuäcuähuä 'chuhuädi'ina̧'a̧ suropätörömä̧. ¿Ditättö̧ ujututtö ocurä rö̧ä̧nä̧ cuoaränä ö̧jä̧mä̧da̧'a̧nö̧ hua̧mä̧? ¿Dijä̧ttö̧ ujututtö ocurä beipocaränä ö̧jö̧'a̧nö̧ hua̧mä̧? ¹⁵ Jueönä̧ a̧mö̧cuädömä ja̧'hua̧ta̧'a̧nö̧ ucuo kö̧nä̧ ucuocumä, suronä jȩpö̧ aditähuättö yabonä̧nö̧ ȩmä̧ji̧ttö̧, ȩma̧ pä'ocömä, pärätänä mitö ttesecuäcu'i̧nä̧ esecuocömä̧, suronä pä'ö'i̧nä̧ a̧mö̧cuädocömä ja̧'hua̧ta̧'a̧nö̧ surojö'i̧nä̧ topocömä ¹⁶ ja̧u̧mä̧ ju'toju jo̧mȩ ojusode a̧di̧tä̧cua̧, ja̧u̧rö̧ tto̧'ȩpä̧rö̧ tta̧huä̧rö̧mä̧ inähuiyätä jä̧cua̧'a̧; u̧cuä̧'i̧nä̧, a̧huȩ ajiya'i̧nä̧ 'cuäopönä̧tä̧ kä̧cua̧'a̧. ¹⁷ Cui'äriyämä ru̧hua̧ öadihuä toäcua'anö̧; juätömä rȩjȩ kä̧huȩä̧jä̧ tottäcuotö. ¹⁸ Cuamiso'quimä yecuecunä̧ ji̧nö̧ a̧mö̧cuädi'äcua'a; ¿Tȩnȩ ö̧jä̧ huȩyu̧cuä̧ ttö̧ja̧sa̧mä̧; ja̧u̧mä̧ to ö̧ja̧'a̧ttö̧, to̧pä̧rö̧ pä̧cuä̧huä̧ o'ca pa̧ja̧ti̧nö̧mä̧? ¹⁹ Ucumä ttö̧ja̧ tti̧rȩbȩhuä̧cuo̧mȩ a̧mö̧cuädätörömä topocö cuä̧cua̧jä̧, ttö̧ja̧ koromenä ucuocuätörömä, ucu'i̧nä̧ cu̧huo̧jui̧pö̧ juiyönä. ²⁰ Sión ttö̧ja̧rö̧ topi, ttidepiyu pä'cäri jȩto̧mȩ; ucu cui'äriyämä Jerusalén ötahuiyänä toäcua'a odehuiyä huȩnȩ juiyönä hua̧'a̧ jä̧'i̧nö̧'a̧nö̧, isode pporädö icuähuocode jä̧'i̧nö̧'a̧nö̧, ti̧'chu̧ ku̧nä̧huä̧ o̧'quȩ 'cho'ö icuähuoca'a jä̧cua̧'a̧, yorö'iso appiyä'i̧nä̧ 'toruhuächoca'a jä̧cua̧'a̧. ²¹ Ja̧'hua̧nö̧ ja̧'a̧nä̧ TÖ̧Ä̧NÄ̧HUA̧ ucuo i̧sa̧mä̧ ujututäcu ö̧jä̧cua̧, yȩnȩtȩ aje'i̧nä̧ cähueächia'a pö̧o̧mȩ. Yorö'iso curä huoi'ca juä'äu'i̧nä̧ 'cuättopö juiyönä ja̧'hua̧ta̧'a̧nö̧ rö̧ä̧ huoi'ca'i̧nä̧ 'cho̧ca̧'a̧ jä̧cua̧'a̧. ²² Ja̧'hua̧nö̧ ja̧'a̧ TÖ̧Ä̧NÄ̧HUA̧MÄ̧ röji pä'ö icuähuä i̧sa̧ ja̧'a̧, TÖ̧Ä̧NÄ̧HUA̧MÄ̧ adihuomenä jȩä̧cuä̧huä̧ iyähuä i̧sa̧ ja̧'a̧, TÖ̧Ä̧NÄ̧HUA̧MÄ̧ tu̧ru̧hua̧ ru̧hua̧ ja̧'a̧; Ja̧u̧tä̧ ja̧'a̧ ra̧huä̧pi̧jo̧mȩttö̧ tö̧ji̧pö̧nä̧ ppä̧dä̧cua̧'i̧nä̧. ²³ Ucu cuiäre ä̧nu̧chu̧mä̧ ejächi'äja'a; i̧sä̧ta̧ 'chuä̧rä̧'ca ko̧mȩmä̧ 'chu'ädi'ömä ttu̧ju̧ juiyönä ttäcuotö; jahuätömä i̧sä̧ta̧'i̧nä̧ ttisetädö juiyönä̧ ttäcuotö; 'chottipäji 'cä̧chu̧ tticuomenä 'chottipäjimä ppi̧sä̧ppi̧sä̧ kä̧tö̧'i̧nä̧ ttȩmi̧pi̧yä̧cuo̧tö̧. ²⁴ Juȩnȩ ka̧cuä̧tö̧mä̧ pä'ocotö ttäcuotö: "Na'achö̧sä̧ pä'ömä;" juȩnȩ ka̧cuä̧tö̧mä̧ suronä jȩttä̧ji̧mä̧ jȩpö̧ icuähuäcuotö.