¹ Aje röotonä̧'i̧nä̧, de'a jui̧yä̧jä̧nä̧'i̧nä̧ cuä̧o̧pä̧cuä̧ ötö'cö jiähuinö huȩnȩ. Ja̧hua̧nö̧ ja̧'a̧ kä̧ru̧'cu̧ppa pä̧i̧cu̧nä̧ ri'äu'icu Neguevra̧'a̧cu̧ttu̧ ichö juatädäcua'a, rȩjȩ juiyo ra̧huȩpi̧jä̧jä̧mä̧ juhuorö rötädipö rȩjȩ de'a jui̧yä̧jä̧nä̧ 'cuäopäcua'a. ² Ji̧yȩtȩ juiyo tta̧'cua̧ tta̧huȩcui̧pö̧ ya̧nä̧ jähuä toäcuähuä tochönä iyähui'inäcu̧sä̧: ya̧tȩ jaroi'äcuähuä i̧sa̧mä̧ jaroi'ä'cha pä'ötä kö̧, jahuata'anö jȩpö̧ icuähuä i̧sa̧mä̧ jȩpö̧ icua pä'ötä kö̧. Ja̧hua̧nö̧ ja̧'a̧ttö̧ ä̧rä̧mi̧'ö̧ rohuähui Elam; jahuata'anö nä̧u̧cui̧'i̧ Media; ttötä 'chu'ädö chu̧ju̧nä̧cua̧sä̧ o'ca juiyönä jahuätö suronä jȩttä̧'i̧ji̧ttö̧ ttödäpecuächi'a pä'ö. ³ Ja̧hua̧nö̧ ja̧'a̧ttö̧ chu'upi'quiyumä rö̧ä̧nä̧ barahuäcusä, ja̧u̧ ubaramä ya̧ju̧tȩ modu ö'caju päji'a pä'ö ubara ttuja'a jä̧'i̧nö̧'a̧nö̧ jö̧nä̧; ttömä cha̧'cua̧ tta̧'ȩcui̧pö̧sä̧ ja̧u̧ chä̧ju̧cuo̧mȩnä̧; jahuata'anö tochomȩnä̧ ye'ecui'ösä. ⁴ Ttömä ye'ecui'ö ttö̧dä̧hui̧pö̧mȩnä̧, cha̧mi̧so'qui'i̧nä̧ borei'a'a. Ttömä mo̧ro̧ttö̧mä̧ ni̧pä̧ro̧mȩ juhua'a chöjö'cönä jä̧'i̧ja̧'a̧mä̧, cha̧'cua̧'i̧nä̧ chȩmö̧ juiyönätä yedecutä i'cächäcusä. ⁵ Jahuätömä mesa isodä'i̧nä̧ jo̧mȩnö̧tä̧ jȩpö̧ ku̧nu̧, jahuata'anö huä̧mȩ ppä̧ȩcuä̧ta̧'i̧nä̧ ppä'epö, jahuata'anö ttu̧cuä̧'i̧nä̧ cuä̧nö̧, tta̧huä̧'i̧nä̧ a̧huä̧rö̧ jȩpä̧tö̧; Ja̧hua̧nö̧ ja̧'a̧nä̧ ä̧rä̧mi̧'ä̧tu̧cui̧ hueähuä ttö̧ja̧, a̧dȩja da'epätucui curä rohuähuö ttocuecuätucuä'ijö obi. ⁶ Ja̧hua̧nö̧ ja̧'a̧ chu̧ru̧hua̧mä̧ ji'äu pa̧'a̧nö̧ päinäcu̧sä̧:''Täi tocu'hua, ja̧u̧ juhua'a 'chö̧tä̧ ja̧'a̧ o'ca juiyönä toö ji̧ä̧huä̧cua̧mä̧. ⁷ Ja̧hua̧nö̧ ja̧'a̧ ja̧u̧mä̧ cahuayu doäcä carucä to̧ä̧cua̧ u̧mä̧tö̧ ta̧ju̧ cahuayunä huä̧tö̧rö̧, murönä huä̧tö̧rö̧'i̧nä̧, ja'huata'anö camellonä huä̧tö̧rö̧'i̧nä̧, ja̧hua̧nö̧ ja̧'a̧ ja̧u̧mä̧ ttu̧huȩcuä̧nä̧ kä̧nö̧ adiunä toö'anö ja̧'a̧.'' ⁸ Ja̧u̧ to̧ä̧rä̧cuä̧huä̧'i̧sa̧mä̧ huopö: ''Chu̧ru̧hua̧, mo̧ro̧ jö̧ a̧'u̧cuä̧ ju'toju kä̧nö̧ to̧ä̧rä̧cuä̧huo̧mȩ chö̧jo̧mȩmä̧, jahuata'anö yodo jö̧ a̧'a̧cuä̧ to̧pä̧rä̧ kö̧sä̧ ju̧huȩnȩmä̧.'' ⁹ Ja̧'hua̧nö̧ ja̧'a̧ täcö ichö ya̧tȩ carucänä̧ pȩ'ä̧dä̧rö̧ huä̧nö̧ cahuayu doäcänä. Ja̧hua̧nö̧ ja̧'a̧ ja̧u̧mä̧ huopö: ''Täcö Babiloniamä mo̧ä̧cha̧'a̧, o'ca juiyönä a̧mo̧nä̧ ttö̧ä̧nä̧huo̧tö̧ tta̧'cua̧jui̧yä̧ a̧'cua̧cu̧nä̧ 'ca̧'ö̧ adicuotö pä'ijätömä rȩjȩ mo̧tto̧mȩnä̧ 'te'chächipäjätö.'' ¹⁰ Chu̧cuä̧ ku̧nä̧huä̧ ppa̧'ȩpö̧'icu rȩjȩ 'qu̧yä̧jä̧ttö̧ isä'cua co'epö icuähuomehue. Curä rohuäcuähuä ttö̧ja̧ ttu̧ru̧hua̧'i̧nä̧ hua̧, Israel ttö̧ja̧ ttö̧ä̧nä̧hua̧ Dios'i̧nä̧ hua̧ttö̧ chä̧ju̧cuä̧ji̧mä̧ ja̧u̧tä̧ ja̧'a̧, ttömä huo̧jua̧sä̧ ucuturu jidähuäjimä. ¹¹ Duma ötahuiyä ötö'cö ji'äu pä'ö icuähuä. Ya̧tȩ Seirttö rötädipö huoäcusä: ''To̧pä̧rä̧cuä̧huä̧'i̧sa̧ ¿tta̧'a̧nö̧ recuotä ja̧'a̧cuä̧ yodomä? To̧pä̧rä̧cuä̧huä̧'i̧sa̧ ¿tta̧'a̧nö̧ recuo juiya'acuä mo̧ro̧ päi'a pä'ömä?'' ¹² Ja̧u̧ to̧pä̧rä̧cuä̧huä̧'i̧sa̧ pä'ö: ''Täcö mo̧ro̧ juhua'a, jahuata'anö ni̧pä̧chö̧'i̧nä̧ ni̧pä̧cha̧'a̧. Jäcuäpa pä'ö jö̧ttö̧mä̧ jä̧'ȩpi̧; ja̧u̧nu̧ o'ca'a pä'äji ta̧'a̧nö̧ ppa̧'ä̧chi̧.'' ¹³ Arabia rȩjȩ ötö'cö ji̧yȩtȩ ji'äu pä'ö icuähuä. Arabia rȩjȩttö̧ de'a jui̧yä̧jä̧nä̧ ucutumä yodo 'cuäcuopäcuotöjä, jahuata'anö dedanitas ttö̧ja̧cu̧ ppä'ächi'ö. ¹⁴ Ajiya 'cächätucui ttahua a̧di̧rö̧jä̧u̧ru̧ cuiyätucua; Tema ötahuiyä ttö̧ja̧, di'ecuächinätörö'i̧nä̧ ttu̧cuä̧ pa̧ iyö kä̧nö̧ ȩmä̧tu̧cui̧tö̧. ¹⁵ Jahuätömä curä'chunä'i̧nä̧, 'po'obiyunä'i̧nä̧ cuä'äu tti̧cuä̧u̧ ye'ecu di'ecuächinätö, jahuata'anö curätä jä̧'cho̧mȩnä̧. ¹⁶ Ja̧hua̧nö̧ ja̧'a̧ tu̧ru̧hua̧ Diosmä pa̧'a̧nö̧ päinäcu̧sä̧: ''Ya'ute du'o ö'comenä, adicuä i̧sa̧ ya'ute du'otä pa̧ja̧tä̧rö̧nö̧ adita pä'ö hue'ö ku̧ju̧nä̧hua̧ ö̧jä̧ji̧ beipome, o'ca juiyönä Cedar öadihuä jä̧'i̧jö̧mä̧ beipächäcua'a. ¹⁷ Cedarnä ka̧cuä̧'i̧jä̧tö̧ttö̧ curä rohuäcuähuä ttö̧ja̧ pä'ijätöttö'i̧nä̧, 'poobönä 'poähuä ttö̧ja̧ pä'ijätöttö'i̧nä̧ a̧'u̧cu̧nä̧tä̧ ttö̧ji̧pä̧cuo̧tö̧,'' ja̧hua̧nö̧tä̧ ucuocu pä'ö ku̧nu̧ tu̧ru̧hua̧ Israel ttö̧ja̧ ttö̧ä̧nä̧hua̧ Diosmä.