¹ Egipto ötahuiyänä ji̧tȩ 'cuäopinö ji'ähuinö. ¡Topätucui, TÖ̧Ä̧NÄ̧HUA̧MÄ̧ ajiya isoppa juruhuoppanä̧ hu̧änö Egiptora̧'a̧cu̧ ichö̧; tätähuä o'camä Tu̧ru̧hua̧ ö'ä'cattö ttö̧ä̧hua̧'a̧; Egipto ttö̧ja̧ tta̧mi̧so'qui jacuänämä jȩttö̧ juiyönä̧tä̧ päi'äcuotö. ² Ttömä jȩchä̧cua̧sä̧ Egipto ttö̧ja̧rö̧mä̧ tta̧mö̧nä̧ ttahuaruhuä Egipto ttö̧ja̧cu̧ tturohuäunä̧tä̧: ya̧tȩ ö̧jä̧hua̧cu̧tä̧ ö̧ro̧huä̧huä̧cua̧, ja̧'hua̧ta̧'a̧nö̧ ya̧tȩmä̧ ippeyänä ku̧cu̧tä̧ u̧ro̧huä̧huä̧cua̧, ötahuiyä ttö̧ja̧'i̧nä̧ ötähuiyä ttö̧ja̧cu̧ tturohuäunä̧ ja̧'hua̧ta̧'a̧nö̧ ru̧hua̧mä̧ ru̧hua̧cu̧tä̧ urohuäunä̧. ³ Egipto ttö̧ja̧ tta̧'cua̧ru̧hua̧ jacuänättö̧mä̧ ijiyuhuächi̧'ä̧cua̧. Ro̧'ȩpö̧nö̧ jittäumä si'epö chi̧cuä̧cua̧sä̧, jahuätömä tätähuä o'camä ro̧'ȩpö̧ jittähuatö pä'ö'i̧nä̧, hua'inä̧tö̧ tta̧'cua̧ru̧hua̧rö̧'i̧nä̧, mä̧ri̧mö̧rö̧'i̧nä̧, tta̧'cua̧ru̧hua̧nä̧ ucuocuätörö'i̧nä̧ ttusa'anä̧. ⁴ Egipto ttö̧ja̧mä̧ chiyäcuotö ttu̧ru̧hua̧ pä̧i̧cu̧nä̧ hue'ö u̧mö̧nä̧, ja̧u̧ ya̧tȩ ru̧hua̧mä̧ jahuätörömä ujurucu ruhuonä̧ huȩä̧cua̧, pa̧'a̧nö̧tä̧ huäjunä ucuocutó TÖ̧Ä̧NÄ̧HUA̧MÄ̧. ⁵ Aje de'ähuoto'i̧nä̧, ajehuiyä ppo̧ö̧'i̧nä̧ joipächäcua'a juiyometä̧ päi'önätä̧. ⁶ Ajehuiyämä̧ o'cajuiyönä̧tä̧ surojuoächäcua'a ja̧'hua̧ta̧'a̧nö̧ Nilo aje'i̧nä̧ pä̧i̧cu̧nä̧ ma̧ä̧'i̧jo̧mȩttö̧mä̧ juiyuhuächönä̧ joipächäcua'a, nä̧yu̧ o̧na̧'i̧nä̧, aje jacuoto mȩji̧yä̧ o'che'i̧nä̧ jo'ö icuäcua'a. ⁷ Nä̧yu̧ Nilo ajenä ka̧cu̧mä̧, juototä ä'coto ka̧cu̧'i̧nä̧ ja̧'hua̧ta̧'a̧nö̧ o'cajuiyönä aje jacuoto ku̧nä̧huä̧mä̧ jo'ö icuäcua'a, i̧sa̧ppȩtä̧ päi'önä̧ ja̧'hua̧nö̧ jo̧mȩnä̧ ppu'utä i̧cuä̧huä̧cuȩ. ⁸ Po̧i̧ 'choähuä ttö̧ja̧mä̧ ba̧ra̧huä̧u̧ ttajahuäcuotö, o'catoi'önä ttajua'che Nilo ajenä icuätömä ttajuähuäcuotö juhua'atäcu jitö po̧i̧ huo̧ä̧huä̧sa̧ icuätö'i̧nä̧ tta̧'cua̧ tta̧ttȩcuä̧cuo̧tö̧. ⁹ Lino appiyättö sa̧'ȩpö̧ aditätömä ja̧'hua̧ta̧nö̧ ppö̧jä̧ta̧ tȩä̧ta̧ttö̧ pöttätö'i̧nä̧ ja̧'a̧tä̧ra̧'a̧ pätti'äcuotö. ¹⁰ Egiptottö pö̧jä̧ti̧yu̧ rä'epö aditätömä tti̧mȩya̧huä̧chi̧'ä̧cuo̧tö̧; o'catoi'önä pärätänä ttimitä̧u̧ aditätömä tta̧mö̧nä̧ pa̧ja̧tö̧tä̧ tta̧'cua̧ tta̧ttȩcuä̧cuo̧tö̧. ¹¹ Zoattö ucuo ttö̧ja̧mä̧ i̧so̧dí̧ tta̧mö̧cuädö jui'ätö, Faraón hue'ähuotö ro̧'ȩpä̧rö̧ ji'ähuätö huo̧juä̧tö̧mä̧ a̧mö̧cuädocotö jö̧nä̧tä̧ juoächinä̧tö̧. ¿Tocu päcuäcua'attö̧ Faraónrö̧mä̧: Ttömä̧ huo̧juä̧huä̧ ttö̧ja̧sa̧ i̧tti̧sä̧, mo̧ täbocu ruhuotö pinä̧tö̧ tti̧tti̧sä̧ jö̧nä̧? ¹² ¿Tó ttö̧jä̧ttö̧ cu̧mö̧huä̧yotö huo̧juȩcu̧nä̧ huotömä? Jittähuacu pä'i ja̧'hua̧ta̧'a̧nö̧ jittähuacujä̧ TÖ̧Ä̧NÄ̧HUA̧ o'cajuiyönä ju̧ru̧hua̧ Egipto ttö̧ja̧rö̧ jȩä̧cuȩ a̧mö̧cuädö u̧ju̧ni̧nö̧mä̧. ¹³ Zoánttö ruhuotömä huo̧juo̧co̧tö̧ jö̧nä̧tä̧ juo'ächinä̧tö̧, Menfisttö ruhuotömä̧ ttuyaparehuinäu, jahuätömä Egipto ttö̧ja̧mä̧ ttire'tehuächunä̧tä̧ jȩpi̧nä̧tö̧, ji̧nä̧so ttahuaruhuä 'cotöttö ä̧cuo̧mȩnä̧ isotö pinä̧tö̧ttö̧mä̧. ¹⁴ TÖ̧Ä̧NÄ̧HUA̧MÄ̧ tta̧'cua̧ru̧hua̧nä̧mä̧ ttieruhuächi'önä̧tä̧ jerötö icuinä̧u̧ ja̧'hua̧nö̧ jo̧mȩnä̧ Egipto ttö̧ja̧mä̧ su̧rä̧jä̧mä̧nä̧tä̧ o'ipinä̧tö̧ Egipto ttö̧ja̧rö̧mä̧ jȩttö̧mä̧ suronä̧tä̧ räopönä̧, ttä̧'ä̧mä̧ idehuanä borea'a jä̧'i̧nö̧'a̧nö̧tä̧. ¹⁵ Ji̧yȩtȩ'i̧nä̧ juiya'a Egipto ttö̧ja̧ jȩttö̧'a̧nö̧ jö̧mä̧, tturuhuotö jö̧ttö̧'i̧nä̧, tto'ca'anä ichätö jö̧ttö̧'i̧nä̧, ruhuotö jö̧ttö̧'i̧nä̧, usurä isotö jö̧ttö̧'i̧nä̧. ¹⁶ Ji̧yȩnö̧ mo̧ro̧mä̧, Egipto ttö̧ja̧mä̧ nä̧tö̧ 'cua̧rö̧nä̧tä̧ ttäcuotö. Jahuätömä ttö̧ttä̧huä̧cuo̧tö̧ ja̧'hua̧ta̧nö̧ yettecuäcuotö TÖ̧Ä̧NÄ̧HUA̧ o'cajuiyönä ju̧ru̧hua̧ ö̧mö̧ cä'epa'attö jahuätö ttu̧huä̧mȩ jo̧mȩ. ¹⁷ Judá ttö̧ja̧mä̧ Egipto ttö̧ja̧ yettecuä̧u̧ jö̧nä̧tä̧ juo'ächinä̧tö̧. Ja̧u̧ tö'cö ya̧tȩ a̧mö̧cuädomenämä, jahuätömä yettecuäcuotö, TÖ̧Ä̧NÄ̧HUA̧ ja̧hua̧nö̧ ja̧ pä'ö a̧mö̧cuädö u̧ju̧ni̧na̧'a̧ttö̧, Ja̧u̧tä̧ ja̧'a̧ jahuätörö to'ija̧'a̧cu̧ jȩa̧ pä'ö a̧mö̧vuädömä. ¹⁸ Ji̧yȩnö̧ mo̧ro̧mä̧ ji̧mö̧te jähuä ötahuiyä jo̧mȩnö̧ jä̧cua̧'a̧ Egipto rȩjȩttö̧ Canaán ttö̧ja̧ tti̧huȩnȩ ucuocuätömä ja̧'hua̧ta̧nö̧ TÖ̧Ä̧NÄ̧HUA̧ o'cajuiyönä ju̧ru̧hua̧mä̧ päcuinö̧'a̧cuä̧tä̧ ti̧'chä̧cuo̧tö̧jä̧ pättäcuotö. Ja̧u̧ ötahuiyättö ji̧yȩtȩ ötahuiyämä kä̧hua̧ ötahuiyä pä'ö ottäcuotö. ¹⁹ Ji̧yȩnö̧ mo̧ro̧ TÖ̧Ä̧NÄ̧HUA̧RÖ̧ i̧sa̧rö̧ ku icu iyähuome kä̧cua̧'a̧ Egipto rȩjȩ kä'co päte'ö päi'ome ja̧'hua̧ta̧nö̧ inä o'qui kä̧cua̧'a̧ ko̧ro̧jä̧cu̧ beipome TÖ̧Ä̧NÄ̧HUA̧RÖ̧ i̧jȩcuä̧ jö̧nä̧tä̧. ²⁰ Pi̧yȩmä̧ i̧jȩcuä̧ jö̧nä̧tä̧ ja̧'hua̧ta̧nö̧ TÖ̧Ä̧NÄ̧HUA̧ o'cajuiyönä ju̧ru̧hua̧ ötö'cö jiäcuähuä jö̧nä̧tä̧ Egipto rȩjȩttö̧mä̧. Jahuätö TÖ̧Ä̧NÄ̧HUA̧RÖ̧ ajau huottomenä ttaboiyotö suronä jȩttä̧u̧, Ja̧u̧mä̧ ppädäcuähuä ttö̧ja̧sa̧rö̧ huȩä̧cua̧ ja̧'hua̧ta̧nö̧ rohuäu ppä'ädörö juhua'atäcu ja̧u̧tä̧ jä̧cua̧ jahuätörö rä'epö i̧cuä̧cua̧mä̧. ²¹ Ja̧u̧ TÖ̧Ä̧NÄ̧HUA̧MÄ̧ Egiptottö ttu̧huo̧juä̧cua̧ ja̧'hua̧nö̧ jo̧mȩnä̧ Egipto ttö̧ja̧mä̧ ttu̧huo̧juä̧cuo̧tö̧ TÖ̧Ä̧NÄ̧HUA̧RÖ̧MÄ̧ ji̧yȩnö̧ mo̧ro̧tä̧. Jahuätömä isotörö ku icu iyö ucuo tettähuäcuotö ja̧'hua̧ta̧nö̧ mipponä̧ iyähuä'i̧nä̧ iyö juhua'atäcu TÖ̧Ä̧NÄ̧HUA̧RÖ̧MÄ̧ huecumä jȩchä̧cua̧sä̧ pä'ö, pättäjimä jȩttä̧cuo̧tö̧. ²² TÖ̧Ä̧NÄ̧HUA̧MÄ̧ Egipto ttö̧ja̧rö̧ tta̧'cua̧ tta̧huȩpä̧cua̧, tta̧'cua̧ tta̧'ȩpö̧mä̧ aditö icuäcuotö. Jahuätömä TÖ̧Ä̧NÄ̧HUA̧CU̧ ppa̧ttä̧chä̧cuo̧tö̧; Ja̧u̧cu̧ ttucuocu ä̧ju̧cu̧mä̧ aditö icuäcuotö. ²³ Ji̧yȩnö̧ mo̧ro̧mä̧ mä̧nä̧ Egipto ka̧mä̧dö̧nä̧ Asiria jubö rä̧cua̧'a̧ ja̧'hua̧ta̧'a̧nö̧ Asiria ttö̧ja̧mä̧ Egiptora̧'a̧cu̧ ttichäcuotö ja̧'hua̧ta̧'a̧nö̧ Egipto ttö̧ja̧'i̧nä̧ Asiria rȩjȩra̧'a̧cu̧ ja̧'hua̧nö̧ jo̧mȩnä̧ Egipto ttö̧ja̧mä̧ Asiria ttö̧ja̧rö̧ ucuo tettähuäcuotö. ²⁴ Ji̧yȩnö̧ mo̧ro̧, Israel ttö̧ja̧mä̧ Egipto ttö̧ja̧cu̧'i̧nä̧, Asiria ttö̧ja̧cu̧'i̧nä̧ ttesecuomenä huämetucuä jö̧nä̧ pätti'äcuotö, ja̧huä̧nä̧ rȩjȩttö̧mä̧ adihuäjueitä ttȩmä̧cuo̧tö̧; ²⁵ TÖ̧Ä̧NÄ̧HUA̧ o'cajuiyönä ju̧ru̧hua̧mä̧ adiutä ppä̧dä̧cua̧ ja̧'hua̧nö̧ ppä'ädömä pä̧cua̧: Egipto ttö̧ja̧mä̧ adiutä ppä'ädäcuähuotö, chumöhuäyotö jo̧mȩttö̧; Asiria ttö̧ja̧mä̧ chu̧mö̧ jö̧nä̧ huotö; juhua'atäcu Israel ttöö̧ja̧mä̧ chi̧yä̧cuȩ pädinö'a̧nö̧ huotö.