¹ A̧'cua̧tta̧ȩcu̧nö̧ ucuocuinö profeta Habacuc: ² TÖ̧Ä̧NÄHUA̧, ä̧ju̧cuä̧ji̧sä̧ ucú jȩ'cu̧, ja̧'hua̧nö̧ ja̧'a̧ttö̧ juiyo yȩȩcua̧sä̧. TÖ̧Ä̧NÄHUA̧, cui̧yä̧cua̧jä̧ ji̧yȩnö̧ moró̧ ttu̧huo̧jui̧ä̧chi̧a̧ peö jȩ'cuä̧cuȩi̧ juo̧nö̧ pä̧nä̧ ttö̧huo̧jui̧ä̧chi̧ö̧nä̧, ja̧'hua̧nö̧ ja̧'a̧nä̧ ucumä rȩrö̧jö̧ toäcuähuä i̧sä̧jä̧ ji̧yȩnö̧ pä̧nä̧ cuami surächia'inä. ³ DIOS Temánttö̧ ichöjä ja̧'hua̧ta̧'a̧nö̧ surojö jui̧a̧mä̧, Parán inähuättö ichöjä (selah). Cuadihuämä kȩdȩpa̧'a̧ moro̧ji̧yä̧ttö̧'inä ja̧'hua̧ta̧'a̧nö̧ pi̧jä̧'i̧nä̧ o'cajuiyönä pa̧ja̧cuä̧cha̧'a̧ cuadihuättömä. ⁴ Ujurö i̧jȩpi̧nö̧ ö̧mu̧ttö̧ räepönä cuupä örohuahua jä̧i̧nö̧'a̧nö̧ ja̧'hua̧nö̧ ja̧'a̧nä̧ ö̧jo̧mȩ o'cajuiyönä tȩa̧hui̧na̧a̧. ⁵ Juruhuö märiyeimä ä'cajome ka̧cui̧nö̧ ja̧'hua̧ta̧'a̧nö̧ ri̧ȩnä̧ ttösuräumä i̧jä̧pu̧ abonättö̧ räopinö. ⁶ Ä̧rä̧mi̧ö̧ pa̧ja̧ti̧nö̧ rȩjȩ́; ja̧'hua̧nö̧ ja̧'a̧nä̧ o'cajuiyönä ttö̧ja̧cuo̧mȩ o̧dö̧nä̧mä yeinätö̧ toomenä. Ji̧nä̧́ mö̧ä̧'quiyu'inä sa̧tä̧chi̧'i̧nö̧ ja̧'hua̧nö̧ ja̧'a̧nä̧ u̧tȩtȩ jö̧ o'camä ja̧rȩyu̧ pä'iö ucuo teähuinö. Cuäpunätä̧ kö̧ ö̧mä̧nä̧ ja̧'a̧ pä'ö. ⁷ Topinösä̧ Cusán ttö̧ja̧cuo̧mȩttö̧ tta̧'cua̧ tta̧ttȩcua̧a̧ ja̧'hua̧ta̧'a̧nö̧ Madián rȩjȩ́ ttö̧ja̧cuo̧mȩttö̧ tti̧ȩpa̧a̧. ⁸ ¿Ajenätä̧ rä̧huä̧ri̧nö̧ TÖ̧Ä̧NÄHUA̧? ¿ajé'i̧nä̧ deähuotonä'inä kö'cocö pinö, cuäji̧mu̧ ca̧hua̧yu̧tö̧nä̧ cui̧'cho̧mȩnä̧ cujurucu cuäre caruquiyänä pänö̧? ⁹ Amucuädö cäepäjiyä cu'cupobu 'po'ä o̧ri̧cu̧ a̧tto̧cuä̧ juiyönä. Quȩ'chi̧cui̧nö̧jä̧ ajehuiyä'i̧nä̧ rȩjȩttö̧mä̧. ¹⁰ Barahuächi'inaa̧ muä̧'quiyu'inä ucuru topu. juo̧u̧ o'cadä̧jä̧ 'cuäo'önä ajé suädina'a̧ttö̧; Ajé deähuoto kä'co päteöttö ju'tojucu räoinaa̧ ppau obimä̧. ¹¹ Ucuttö däcuä'chu 'cua̧rö̧nä̧ räopinaa̧ cuupä örohuaa 'cua̧rö̧nä̧ kȩdȩpu̧nä̧ ja̧'hua̧nö̧ ja̧'a̧ttö̧ moró̧ ka̧hua̧'i̧nä̧ yodó ka̧hua̧'i̧nä̧ ttö̧ro̧mȩtä̧ rȩji̧nä̧tö̧. ¹² Rȩjȩttö̧mä̧ surojötä jȩpu̧ kä̧tö̧ ja̧'hua̧nö̧ ja̧'a̧ttö̧ ra̧huä̧ri̧pu̧ ttö̧ja̧cuo̧mȩ o̧dö̧nä̧ttö̧ pojopu kȩȩpu̧ cu̧ju̧ni̧nä̧u̧. ¹³ Rä'opinöjä̧ ucú cuahuäruhuä daepu cuitihuo̧ä̧u̧tä̧ ti̧ji̧pa̧ pe'ö. Surojö kada'ca 'chu̧huä̧ro̧mȩttö̧ ttu̧ttȩpä̧ri̧a̧ pe'ö cuäö icuinöjä̧ isodettö suronä hueätörö. ¹⁴ Ucuttö rohuähuö ichinätö̧jä̧ cu̧'cu̧pa̧ri̧nä̧ 'poäu icui̧nä̧ttö̧jä̧ tipperäcuöchönä, suronä jȩpi̧nä̧tö̧jä̧ cuä'ö icú 'choipinätöjä tidäjuächomettö̧'i̧nä̧. ¹⁵ Ajé deähuoto pa̧ja̧cuä̧chö̧nä̧ cueächä'ijiä cuäji̧mu̧ ca̧hua̧yu̧tu̧nä̧ ¹⁶ Chäju̧cuo̧mȩnä̧ ucuocua chä̧yȩ ttö̧'i̧nä̧ yeinösä̧. Chihue'quiyu jacuänä cuäächi'inösä̧ ja̧'hua̧nö̧ päiomenä chidepä o'cajuiyönä jiyupächi'inösä̧. Ja̧'hua̧nö̧ ja̧'a̧nä̧ ji̧nä̧́, tta̧dä̧rä̧cua̧sä̧ jä̧rö̧chi̧ö̧ tta̧'cua̧ tta̧ttȩcu̧ moro̧bu ttö̧ja̧rö̧ suronä jȩtto̧mȩttö̧. ¹⁷ Ttö̧cuȩ ttöjunome'inä adinä iyocaa ji̧nä̧́ higuera'inä ȩu̧co̧ca̧a̧ uva'inä huo̧ca̧a̧ ja̧'hua̧ta̧'a̧nö̧ olivo ttaditö'inä adinä a̧dȩmä̧ iyocaa; ja̧'hua̧ta̧'a̧nö̧ pa̧a̧nö̧ jȩä̧cua̧ o̧huȩja̧tö̧'i̧nä̧ korotöttö isotöttömä i̧mi̧cu̧nä̧ ttö̧ja̧'a̧nä̧ pä̧cä̧yu̧'i̧nä̧ ttä̧o̧ca̧nä̧mä̧ toäcua'a. ¹⁸ Ttömä úcuo tȩdä̧huä̧cua̧sä̧ TÖ̧Ä̧NÄHUA̧RÖ̧TÄ̧. Ttörö ppäädäjirötä DIOSRÖTÄ chesȩhuä̧cua̧sä̧. ¹⁹ Ttö chujurumä TÖ̧Ä̧NÄHUA̧ DIOSTÄ chi̧jä̧pu̧'i̧nä̧ cuedächönä jȩä̧cua̧sä̧. Juo̧u̧mä̧ yabocutä chi̧'chö̧nä̧ jȩä̧cua̧ chi̧'cho̧mȩ o̧du̧nä̧mä̧ huȩnȩ́ juiyönätä̧.