¹⁶ Ja̧'hua̧nö̧ ja̧'a̧ Ttömä pojopö ȩmi̧nö̧sä̧ ja̧'hua̧ta̧nö̧ pode isodemä̧ chi̧mi̧ 'cä̧'ȩpö̧ ku̧ni̧nö̧sä̧ 'cuäopönä̧ mo̧ro̧tä̧ huä̧cua̧'a̧nö̧. Chi'äriyä'i̧nä̧, chamiso'qui'i̧nä̧ mo̧ro̧ji̧nö̧'a̧cuä̧ ju̧huȩnȩtä̧ kä̧cua̧'a̧. ¹⁷ Ucu cutö'cömä, ttö huedö cucuotöttömä, cuä'o David ucuotinöta'anö, Ttö huedinömä o'cajuiyönä ucuotönö ja̧'hua̧ta̧nö̧ Ttö huedö huȩnȩ'i̧nä̧ jȩ'cua̧ pä'ö huedinö adiu jȩpö̧ cu̧ju̧nö̧ttö̧mä̧, ¹⁸ ja̧u̧nu̧ o'ca'a, Ttömä ucu huecu ruhuomä jo̧mȩnö̧ jȩpö̧ chu̧ju̧nä̧cua̧sä̧, cuä'o Davidcu todecu chucuocuinöta'anö, ja̧u̧rö̧mä̧ pä'inösä: Ucu cui̧tti̧ttö̧ ya̧tȩ jäyä'i̧nä̧ päi'ö juiyönä Israel ttö̧ja̧rö̧mä̧ ruhuode huȩä̧cua̧. ¹⁹ Ja̧'hua̧nö̧ ja̧'a̧nä̧ ucu 'cä̧cui̧pä̧chö̧ttö̧mä̧ ja̧'hua̧ta̧nö̧ ttö huedinö'i̧nä̧, Ttöttö hueähuä huȩnȩ'i̧nä̧ ucuru chiyinö jaro'cui'ipö, korotö ttö̧ä̧nä̧huo̧tö̧rö̧tä̧ ucuo te'äu ja̧rȩyu̧ päcui'öttömä̧, ²⁰ Ttö chi̧rȩjä̧ttö̧mä̧ kada'canä que'opö chicuätöjä, jahuätörö chiyinäjättö̧mä̧. Pode chiminä 'cä̧'ȩpö̧ chu̧ju̧ni̧no̧demä, Ttöttömä oto do'opö chicuäcuode ja̧'hua̧nö̧ jȩpö̧ ji̧yȩtȩ pähuä huȩnȩ pä'ö pitö ttö̧ja̧rö̧mä̧ chierusehuäcuotö. ²¹ Pode isodemä rö̧ä̧nä̧ ucuo kode ja̧'a̧nä̧ o'catoi'önä ju̧huȩnȩnä̧ 'cuä'opätömä juodemä tocu ja̧'hua̧nö̧ ja̧'a̧ttö̧ pä'ö jacuänä̧tä̧ ttucuocuäcuotö. Jahuätömä jättepäcuotö: ¿Tta̧'a̧nö̧ pä'ö TÖ̧Ä̧NÄ̧HUA̧MÄ̧ pi̧jä̧ rȩjȩ'i̧nä̧ pode isode'i̧nä̧ ja̧'hua̧nö̧ jȩa̧'a̧ttö̧? ²² Korotömä ttädätäcuotö: juhua'amä TÖ̧Ä̧NÄ̧HUA̧ Diosrö jarotii'inomettö, ttä̧do̧tö̧ mi̧nä̧rö̧ Egipto rȩjȩttö̧ rä'epö icu i'cächinö̧rö̧, ja̧'hua̧ta̧nö̧ jahuätömä korotö ttö̧ä̧nä̧huo̧tö̧rö̧ ucuo te'äu ja̧rȩyu̧ pätti'inomettö. Pi̧yȩ ja̧'a̧ jȩchä̧cua̧sä̧ päinöta'anö TÖ̧Ä̧NÄ̧HUA̧ surojö jahuätörö i'cächäjimä."