¹ Cajiichaana Wanaadi cöna'deuwöi Moisés wwä, mädä cönä'jaacä aacä Aarón nacoomo wä'jajo'jejeiñe, tönwanno Wanaadi wadäädä cöneejoto, cönä'jajoicho yaawä. ² Cajiichaana Wanaadi cönä'döaacä Moisés wwä: "Adhaacono Aarón wwä adha'deucä, eejö'da neiñojo'de tumjummadö woije sadä nossaje'da weichojo taca cortina öncadheedä, yää sacrificio tödöötojo a'duto emjaataawä naadö. Yääje'da tödööa'jäcä chäwwä, nääma'de yaawä, öwö yäätä weijäcä ca'dutuuje yää sacrificio tödöötoojoo a'dutu de'wä. ³ Edääje Aarón womoomödö tujunne na yää nossaje'da weichojo taca. Töwö yoomomöödö tujunne na toro dha'me yää täje'da tu'emö conemjönö tönnö'jödö ejeematoojoje, tooni carnero yaawä täje'da tu'emö tödha'cwaamöje. ⁴ Yeewontädö tujunne na dea yää lino tödöajä yoomö nossajemjönööque, töwoije dea ewaacadö tujunne na töwoomö o'näno lino tödöajä, faja lino tödöajä awä töwö yeewontaajä yeichö tujunne na, iju'jä womö lino döaajä awä mmaja. Tuna que yeeconcadö tujunne na yaawä, töwenwontädö wetä töwoomö awä. ⁵ Töwö dea adäädö tujunne aacä chivo soto neneejödööcomo acanno täje'da tu'emööje conemjönö tönnö'jödö ejeematoojoje, tooni mmaja oveeja nedö'cä täje'da tu'emö tödha'cwaamöje. ⁶ Yä'jeje, Aarón toro dha'me iichädö tujunne na tä'je'da tu'emööje conemjönö tönnö'jödö ejeematoojoje, yää na'de chääjäcaichädäätoje, yäjimmä'tädö jäcäichädootoje mmaja. ⁷ Yaawä töwö aacä chivo adäädö tujunne na, Cajiichaana Wanaadi emjataawä tödöödö wetä, yää Wanaadi weichojo nata'tojo. ⁸ Yä'jeje, sorteaaje tödöödö tujunne na Aarón wwä aacä odocajaato, tooni yeichö wetä CAJIICHAANA WANAADI wonooje, yeichacoono'quene cone'nadi adääneije. ⁹ Aarón wwä adäädö tujunne na ñäädä odocajaato CAJIICHANA WANAADI wonooje cöneeja'caichö sorteaje tödöödawä, emaadö wetä chäwwä täje'da conemjönö tödö'jödö ejeematoojoje. ¹⁰ Ñäädä'quene odocajaato cone'nadi adääneije cöneeja'caichö sorteaje tödöödawä, eneejödö tujunne na nudäädä CAJIICHAANA WANAADI je'taca, cone'nadi adäädö wetä chäwwä ñäädä odoocajaato jata'jemjönö aca ennojadööque. ¹¹ Yä'jeje, Aarón wwä adäädö tujunne na toro, täje'da tu'emööje conemjönö tönnö'jödö ejeematoojoje. Töwö mädä tödöödö tujunne na chäwwä töjääcäichädä, töwäjimmä'tädö jäcäichädä mmaja, yääje yeijäcä toro emaadö tujunnena chäwwä täje'da tu'emööje conemjönö tönnö'jödö ejeematoojoje. ¹² Aarón yää ya'cwa'toojo ewöötö eseecadö tujunne na yää wa'to cadanchudu dhaca naadö, caadono ijoodö tamooco'taca yeiyancadä, eneejöiye yaawä tödöajä cortina aca tödöödö'jo. ¹³ Yäätä töwö tödöödö tujunne na ta'nato de'wä caadono ijoodö Wanaadi emjataawä, caadono ijoodö que aijodö wetä yää conemjönö tödö'jödö encwanno'jotoojo a'dutu de'wä. Mädä töwö tödöödö tujunne ääma'da yeichö wetä yaawä. ¹⁴ Yaawä, töwö toro aquiyö shecasa ajä'chöjo, tooni tamädö dhadadöque nencushimaade yää, täjeda tuemö aduutu Wanaadi wwää deecäcä. Töwö encushimadö tujunnena, taquiyatoque, acä amojato cwa'cä, yää täje'eda tuemö aduutu Wanaadi deecäcä. ¹⁵ Yä'jeje, cabra dhanwa aminñäcadö tujunnena chäwwä, täje'da tu'emööje yeichö wetä soto conenadiyö'como encwannojotojoje, dhaquiyö adädö weetä yaawä cortina ncadhedä. Yäätä, toro aquiiyö cönnöichöje mmaja yää muunu tödödö chäwwä tujunnena nadea: Töwö encushimadö tujunnena yää täjeda tuemö aduutu decäcä wanaadi wwä. ¹⁶ Töwö, täjemjönö utudu tujunnena conemjönö ejematojoje , ashichato nonodö dewä töwe'chomjäcä , israelitacomo conenadiyö ejematojoje mmaja, anetada yeichomjäcä mmaja tamedädä chonenadiyöcomo jäcächädä mmaja. Mädä dea töwejummatocomo aca chäwwä tödöödö tujunne nadea, Cajichaana Wanaadi tantawänñe ye'chojo dötä, ñanno conemjönö tödönnamo neneedöje. ¹⁷ Anejja yäätä yeichö tujunne'da na Aarón womoomödaawä cone'nadi encwanno'jojo adäädawä yää aashicha weichojo taca, yeeja'cadö jonaane, yä'cadö jonnane mmaja töcoone'nadiiyö encwano'jojoodö, töwä'jimmä'tädö nödö'jödö mmaja, tameedä soto nödö'jäcoomo mmaja. ¹⁸ Töwö yeeja'cadö tujunne na täje'da u'tojo a'täi dönñano yää Cajiichaana Wanaadi emjataawä naadö, yäätä cone'nadi choccajoodö wetä töjääcäichädä, adäädö tujunne nadea chäwwä toro aquiiyö, she'cä cabra dhanwa weichö aquiiyö mmaja, altar esquinaichädö wadadäädä tödöödö wetä chäwwä. ¹⁹ Töwö ennöichadö tujunne yää munuuque tamäädö dhadaadö she'cä, aacä amoojatooto'cäcwacä choccatoojo je, Wanaadi wonnoje yeichö wetä, amoinche soto israelita nossaja'como jäcäiñe. ²⁰ Yä'ca'jäcä yaawä cone'nadi choccajoodö yää aashicha weichojo tacaano jäcä, we'jumma'toojo ä'sa jäcä mmaja, täje'da u'tojo a'täi jäcä mmaja, adäädö tujunne na chäwwä yaawä cabra dhanwa weichö. ²¹ Aarón a'nädä tamäädö tödöödö tujunne na ñäädä cabra dhanwa weichö ju'jä de'wä, ecammadö wetä yaawä ye'cäcä' töwaajäiyancädä tameedä israelita cone'nadiiyöcoomo. Määdäje töwö nunmicha'de yää conemjönö cabra dhanwa weichö ju'jä jäcä, enno'jadööjemma yaawä amoinche, anejja soto enwawä chäänönge yä'döaajä jata'jemjönö aca adäänei. ²² Mädääje ñäädä cabra dhanwa weichö adäädö tujunne na chäwwä tameedä soto cone'nadiiyöcoomo weichojo soto'jemjönö aca. Yäätä jata'jemjönö aca, ñäädä ädäänei soto nishaaca'de yaawä ñäädä odocajaato täncanoode'da yeichö wetä. ²³ Yä'jeje Aarón wennacaadö tujunne nadea yaawä we'jummatoojo ä'sa taca, u'cadö wetä töwwä yää töwoomö lino tödööajä que cöneewontäichö töwoomomöödö owaajo aashichaato weichojo taca, yäätä tödöödö tujunne na yää wewontotoojo. ²⁴ Töwö yeecoccadö tujunne na tunaaque yää aashichaato weichojo taca, töweichojo töwoomö awä mmaja yeewontädö wetä yaawä; töwö yeeja'cadö tujunne na yaawä utuudu wetä chäwwä tönnödö täje'da tu'emö ya'cwaajä, täje'da tu'emö ya'cwaajä soto nödöödöcoomo mmaja, mädääje tödöödö wetä töcoone'nadiiyö jäcäichädä, soto cone'nadiiyöcoomo jäcäichädäiñe mmaja. ²⁵ Töwö täje'da u'tojo a'täi de'wä ya'cwadö tujunne na täje'da tu'emö chaatö conemjönö jäcäichädääto. ²⁶ Ñäädä soto jata'jemjönö aca cabra dhanwa weichö ädäänei'jödö, töwoomö choccadö tujunne na, täjö choccadö mmaja tunaaque; yä'jeje, töwö ennacaajai ña yaawä tä'saca. ²⁷ Ñäädä toro tä'je'da tu'emööje cönnejäätodö, cabra dhanwa weichö cönnejootodö mmajaa, munu cone'nadi ejeematoojo je Aarón cönnejäädö mmaja, adäädö tujunne na amoinche ä'sa jäcä. Yäätä ya'cwatääcä'de iji'jäcoomo, shuunu mmaja, iweetöcoomo mmaja. ²⁸ Ñäädä soto mädä'como ya'cwaneijödö, töwoomö choccadö tujunne na, täjö choccadö mmaja tunaaque; yä'jeje, töwö ennacaajai ña yaawä tä'saca. ²⁹ Yeichöje mädä na'de äwäätä'se'totocomooje aacä amoojato nuunä yä'dödö waadäi, yää nuunä amoojadooto anooto awä, änwanno ämjummadööcomo woije meichäiche, etaadawa'cajoojai'cha mmaja, eetä yennuaajä, ye'ajä mmaja ajaadäiñe naadö. ³⁰ Mädä na'de edääje yeijäcä, yää anooto awä Aarón ocoone'nadiiyöcoomo nencwannä'jaja'de, töcocca aweichöcoomo wetä conemjönö jonno, nossaje'da aweichöcoomo wetä yaawä Cajiichaana Wanaadi emjataawä. ³¹ Wäädetatoojo anooto tönoiñe tödöemööje na'de mädä äwwäiñe, änwanno ämjummadööcomo woije meichäiche, etaadawa'cajoojai'cha mmaja. Mädä na'de äwäätä'se'totoocomooje yeichöje adhantawäiñe. ³² Wanaadi wwä töwa'deuwaamo edhaajätoncomo, ñäädä chäädhajätoncomooje töweiyemööje ecammaajä naadö, tumö önwacaanoje töweiyemööje ecammajä jeiñemma, ñäädäne tödöjai ña cone'nadi encwanno'jojotojo tödööjoneije, ewontäjai mmaja nadea wewontotoojo lino tödöajä awä, wewontotoojo aashichaato je yeijäcä. ³³ Töwö dea tödööjai ña cone'nadi encwanno'jätoojo aashichaato weichojo jäcä; Töwö dea tödööjai ña cone'nadi encwanno'jätoojo we'jummatoojo ä'sa jäcä, täje'da u'tojo a'täi jäcä mmaja, Töwö dea tödööjai ña cone'nadi encwanno'jätoojo Wanaadi wwä töwa'deuwaamo jäcäiñe mmaja, tameedä soto jäcäiñe mmaja. ³⁴ Mädä na'de äwäätä'se'tätoojoje, cone'nadi encwannojojoodö soto cone'nadiiyöcoomo, tooniye wedu waadäi" quee cönä'döaacä Wanaadi. Mädä cönä'döi Cajiichaana Wanaadi necamma'jödö nönge Moisés wwä.