¹ Yaawä Cajiichaana Wanaadi cönadeuwöi, Moisés wwä, cönä'döaacä: ² "Soto cädäijato wecoccatoojo anotoichädaawä, edääje waanontänä na'de. Töwö ene'jödö tujunnena Wanaadi wwä töwa'deuwemö wadäädä. ³ Sacerdote neja'ca'de campamento acanno, ñäädä soto ene töwe'jöe yeichö ene, yää chäjö jocono chäädäichö. ⁴ Yä'jeje sacerdote deea necamma'de, ñäädä yecoccajä wwä, aacä tadinñamo nossajemjöncomo ajäi'chojo, maduudaimä que tauda döaajä mmaja, jacuudimmötö seweichato mmaja, hisopo mmaja. ⁵ Yaawä töwö sacerdote tooni tadiinñemö naminñä'caja'de, ashichato tuuna ejodhe, yää tuuna ewöötö, nono amode'naajä ejoodhe. ⁶ Sacerdote najäiya'de yaawä tadinñemö nudooto, madudaimä que tauda döaajä mmaja, jacuudimmötö seweichato mmaja, hisopo mmaja, tamedäädä mädäcomo töwö newaaca'de, tadiinñemö nudooto jadä, tadiinñemö aquiiyö a'ca, ñäädä cönamiñäcaichö tuuna ashichato ejoodhe. ⁷ Yä'jeje sacerdote yää tuuna nencushinma'de acä amojato tödödö'cäcwa'cä, sacerdote necamma'de yaawä töwecocca yeichö ñäädä soto cädäijato. Yaawä sacerdote ta'dinñemö nudooto nunmichade jödoodo awä. ⁸ Soto wecoccanääje naadö, tameedä töwoomö nichoccajä'a'de yaawä, töde'caiche tuju'jadö nöca'dede, tuuna aca ne'jiya'dede, mädääje töwecocca töwö yechojoona. Campamento aca ne'a'de töwö soto, yaawä mädä tödö'jeje, yääje yeichaame aacä amoojato anooto, tömmaichaca'da na'de. ⁹ Aacä amoojato anooto wejadätä'jeje, töwö töde'caiche tuju'jadö töcaadö tujunnena, tätamu'jätö mmaja töcaadö tujunne naadea, tämöösa'jotö mmaja. Tameedä tuju'jadö chäwwä töcaadö tujunnena, tameedä töwoomö choccajäätödö mmaja tujunne naadea, tuuna aca ye'jöyö mmaja; yaawääne töwecocca töwö ye'chojoona. ¹⁰ Aacä amoojato anooto weja'dätä'jeje töwö najäiya'de aacä oweeja nacoomo'cä dhanwacomoodea nossajemjöncomo, tooni oweja nedö'cä wodi tooni weduto nossajemjönö, tooni amoojatooto de'wä toni oneeja'jödö'cäcwacä harina täjeto chatöque oimajä mmaja, dhadöödö täje'da tu'emööje mmaja, tooni canncudu chatö yei'jödö mmaja yaawä. ¹¹ Tamedäädä mädäcomo dö'tä, sacerdote nanömja'de ñäädä soto töcoccaamö, Cajiichaana Wanaadi dö'tä, yää Wanaadi weichojo nata'tajo. ¹² Sacerdote najäiyade tooni oweeja nnedö'cä dhanwa täjemjönööje utuudu wetä conemjönö encwanno'jotoojoje, chaatö cancudu acaano jadä; täjemjönööje nu'a'de töwö tameedä Cajiichaana Wanaadi wwä tamäädöque e'winñancädä. ¹³ Töwö naminñäca'de oweeja nedö'cä dhanwa, aminñäcatoojo döaajä dö'tä täjemjönö Wanaadi wwä u'tojo de'wä conemjönö encwanno'jotoojoje, täjemjönö Wanaadi wwä tödha'cwa tödöötojo de'wä, Wanaadi weichojo'dodoi aca töweiye cönä'ja'dö aca, sacerdote weichojojeene täjemjönö u'ajä yeiyajä yää cone'nadi encwanno'jotoojoje tönaadä cönä'ja'todö, aashichaatoje yeijäcä. ¹⁴ Sacerdote najäiyade she'casa'cä oweeja nedöcä aquiyö, yää täjemjönöje u'ajä cone'nadi encwanno'jotoojoje, soto töwecoccamö janaadö jotöödö de'wä tödöödö wetä töwwä, dhamäädö dhadaadö umö ämu'demjönö de'wä tödöödö wetä, i'judu dhadaadö umö ämu'demjönö de'wä tödöödö wetä mmaja. ¹⁵ Yaawä sacerdote chaatö cancudu acaano najäiya'de tamäädö dhadaadö ämu'dato de'cäcä accadö wetä töwwä, ¹⁶ tamäädö dhadaadö ämu'demjönö dö'seenoque niijiya'de aceite aca yää ämu'dato tamäädö dhadaadö que tönaajäcchö, tamäädö dhadaadö que nencushiima'de yää chatö acä amojato'cä cwacä Cajiichaana Wanaadi dö'tä. ¹⁷ Yaawä sacerdote chatö acoijä tänwawä nadöque,soto töwecoccamö janadö jotödö dewä nödöade, dhamädö dhadadö umö dewä, ijudu dhadadö umö dewä'mmaja. Oweja nedöcä aquiyö täjemjönöje uajä, conenjönö encwannojotojoje ejodhe, nödöade töwö yää chatö. ¹⁸ Yää chaatö acoijä yäädetö'jödö sacerdote enwawä naadöque, töwö soto töwecoccamö ju'jä de'wä nödöa'de, sacerdote dea täjemjönö nu'a'de soto cone'nadiiyö encwanno'jotoojoje Cajiichaana Wanaadi dö'tä. ¹⁹ Yaawä sacerdote nu'a'de yää täjemjönö u'ajä conemjönö encwanno'jotoojoje, mädääje nencwannä'jäja'de töwö choonenadiiyö, töcocca yeichö wetä yaawä, nossaje yeichö jonno, yää'jeje täjemjönö nu'a'de odoocajaato ya'cwadööque. ²⁰ Yaawä sacerdote deea täjemjönö nu'a'de, odocojaato ya'cwadööque, chääjedöödö ya'cwadööque mmaja, täjemjönö u'tojo de'wä. Wanaadi'wä töwa'deuwemöödea, täjemjönö nu'a'de, soto cone'nadiiyö encwanno'jotoojoje, mädääje töwö töcocca yeichojoona. ²¹ Yaawääne', soto a'cato yeiyajäcä'maane, tameedä täjemjönö u'tojo, ejeematoojo'je'da jenñenma, töwö adääjai ña yaawä, tooni oweeja nedö'cä dhanwa, täjemjönööje tu'emö, töconenadiiyö encwanno'jotoojoje, yää u'meancädä tönnöe cönäjatodö, aaduwaawä onejajödö'cwacä harina aashichaato we'chö chaatö jadä oimaajä, trigo adöödö mmaja, tooni oneeja'jödö'cwacä yää chaatö, ²² aacä macaana jadä aacä jaduuma yanwaichadööcomo'cä jenñenma, töwö ejoodöjai yeichö woije; tooni tadinñemö u'ajä cone'nadi encwanno'jotoojoje na'de, tooni'chene yaawä ya'cwadööque. ²³ Aaduwaawä amoojato anooto wejadätä'jäje töwö Wanaadiwä töwa'deuwemö wadäädä eneejödö tujunnena töwecoccadö wetä, Wanaadi we'chojo nata'tajo Cajiichaana Wanaadi dö'tä. ²⁴ Wanaadi wwä töwa'deuwemö najäiya'de oweeja nedö'cä täje'da tu'emööje, töwö dea najäiya'de tooni onejajödö'cwacä odiiwo catö, töwö nannä'a'de yaawä cajunñadäädä täjenjönööje utuuduje Cajiichaana Wanaadi wadäädä. ²⁵ Oweeja nedö'cä töwö naminñä'ca'de täje'da tu'emööje conemjönö encwanno'jotoojoje, töwö najäiya'de oweeja nedö'cä aquiiyö soto töcoccaamö janaadö jotöödö ämu'demjönö dö'se tödöödö wetä, dhamäädö dhadaadö umö'jödö de'wä tödöödö wetä, i'judu dhadaadö umö'jödö ämu'demjönö dö'se tödöödö wetä mmaja. ²⁶ Yä'jeje sacerdote tamäädö de'wä ämu'dato dö'se nacca'de chaatö she'caasa'cä, ²⁷ nencushiima'de yaawä töwö tooni tamäädö dhadaadö ämu'demjönö dö'seenoque aacä amojato'cwacä Wanaadi dö'tä yää chaatö tamäädö ämu'dato dö'sennoque , tamäädö ämu'demjönö dö'senno tönaajäichö que. ²⁸ Yaawä sacerdote soto töweecoccaamö janaadö ämu'demjönö jotöödö de'wä nödöa'de chaatö tamäädö de'wä tönajäichö que, dhamäädö dhadaadö umö'jödö ämu'demjönö de'wä nödöa'de, i'judu dhadaadö umö'jödö ämu'demjönö dö'se tödöödö wetä mmaja, tameedä täjemjönö tuntu'jödö taquiiyatooque dö'tä nödöa'de. ²⁹ Töwödea naccade yää chatö acoijä tamädö dewä tönajä'chöque soto töweco'camö jujä dewä chonenadiyö encwanno'jojodö wetä yawä wanaadi'wä. ³⁰ Wanaadi wwä töwa'deuwemö dea täje'da nu'a'de aacä jaduuma yanwaichadööcomo'cä, soto töwecoccaamö nejodödö woije, ³¹ tooni täje'da nu'a'de conemjönö joojato encwanno'jotoojoje tooni'chene nu'a'de täje'da u'ajä tödha'cwaamöje, dhadöödö ene'ajä jaadä yää täje'da u'ajä. Yä'jeje sacerdote conemjönö necwanno'joja'de töwecoccaamö jäcä Cajiichaana Wanaadi wwä. ³² Edää yää wanontänä ñäädä cädäijato töweewomaato chäädäichöje naadö iji'jä jäcä wätä'se'tätoojo, ñäädä täjemjönööje tu'emööje Wanaadi wwä ejoodöjai'cha naadö töweco'ccatoojo". quee cönä'döaacä Cajiichaana Wanaadi. ³³ Cajiichaana Wanaadi cöna'deuwöi chea Moisés wwä Aaron wwä mmaja, cönädöacä: ³⁴ ''Canaán ñano nonoodö ca äwäädöa'jäcäiñe yää onoonodööcomooje wu'nedö aca, cädäi äjuunucoomo chäädä'ñänei ejannä'ca'jäcä öwwä ämmaichomooca onoonodööcomooje wu'nedö aca anaamädööcomo, ³⁵ yaawä ñäädä yää mmaa edhaajä yeejödö tujunne na sacerdote wwä ecamma. Edäje yädödö tujunne'na: 'Cädäi soto ji'jä chädä'ñänei ye'saca töwä'döe nöchö'ta'. Quee yä'dödö. ³⁶ Yä'jeje sacerdote naanonta'de yeeja'caadöcomo wetä chäwänñe, yää ä'sa acanno cädäi soto ji'jä chädä'ñänei eneedö tö'wä owajo, yää ä'sa acancomo cädäichadöcomo quenñe. Yä'jeje sacerdote womomödö tujunnena yää ä'sa aca. ³⁷ Töwö jää'judu enmencadö tujunnena cädäi soto ji'jä chäädäi'ñänei töweiye ye'chö eneedö wetä, jää'judu de'cäcä sheene yeichö enmencadö wetä, seweiche yeichö enmencadö wetä jenñenma. ³⁸ Cädäi soto ji'jä chädä'ñänei'je yeichö yää maa edanta'jäcä chäwwä, yää ä'sa a'dudu chäwwä tujunne na aacä amoojato anoototo'cäcwa'cä. ³⁹ Aacä amoojato anoototo ai sacerdote nennaca'de yää cädäi soto junu chädäi'ñänei töweejange yechö eene jääjudu jäcä inmaichomo jäcä. ⁴⁰ Töwwä edanta'jäcä soto junu chäädäiñänei töweiye yeichö, sacerdote naanonta'de tä'ju jääjuduje tödöajä u'cadö yää cädäi jano emaadö wetä yaawä jata tö'cäi nossajaato töja'tojooca. ⁴¹ Mädääje deea töwö nicho'caja'de tameedä jääjudu, cho'cannamo'jödö dea yää cho'cajödö nöja'aato'de yaawä tameedä no'sajato, jata tö'cäi, no'sajato töjatojooca. ⁴² Chäwwäiñe amuucudu tujunne na yaawä, aneejja täjucomo, awade'como'jödö wei'jödö dö'tä ajoijojootödö wetä töwwäiñe, mädäje mmaja jääjudu amäädö tujunne nadea, chäwwäiñe, anejja nono aashichaato que. ⁴³ Yääje yeichaame, yää maa aca cädäi waajänta'jäcä mmaja yaawä, yätä täju ashichacomo tödööjätö'jödö dö'tä, jääjudu tödöeenö jäcä yaajänta'jäcä jeiñenma, ⁴⁴ sacerdote nomonga'de yaawä maa taca cädäi soto ji'jä chäädäiñänei töweejan'ge yeichö ene. Töweejange edanta'jäcä, cädäi äjichö'täjöönöje necamma'de töwö, nossaje ä'sa weichö mmaja necanma'dede. ⁴⁵ Yääje yeijäcä, yää maa ema'jodö tujunne na. Tameedä jääjuduuje tödöajä, tä'jucomo mmaja, tauda'como jenñenma, töjaajodö tujunne na jaata töcäi, no'sajato tö'jatojo aca. ⁴⁶ Mädääje mmaja ñäädä, ä'sa nossajaato aca nomom'gaadö, ta'duque yeichame, töweecodoiña yeichojo na cho'mamjai yä'dödö joonane. ⁴⁷ Töwoomöcoomo choccajäätödö tujunne na, ñäädä, yää ä'saca nönö'caadö wwä, mädääje mmaja ñäädä yää maa aca nääwashinchaadö, töwoomöcoomo choccajäätödö tujunne na dea. ⁴⁸ Ta'duque ä'sa yei'jeje yää maa aca sacerdote womonga'jäcä, yää cädäi soto junu chäädäiñänei töwejan'ge yeichö ene, cädäi je'da yeichö edanta'jäcä yaawä chaaca, nossaje'da yää ä'sa töwö necanma'de. ⁴⁹ Mädääje mmaja yaawä, sacerdote nichocca'de yää maa, acä tadinñemööque, madudaimä tauda amodenajäque mmaja, jacudinmötö seweichatoque jeiñema, hisopo que mmaja. ⁵⁰ Aasichaato tuna e'joodhe naminñä'ca'de tooni tadinñemö. ⁵¹ Mädä tödö'jeje, tadinñemö aquiiyö tuuna que tönoimadö aca newaaca'de yaawä, tauda madudaimä döajä, hisoopo, jacudinmötö seweichato, toni tadinñemö nudooto, mädääque jeene aacä amoojato tödö'jödö nencushima'de yaawä yää maa. ⁵² Töwö nichocca'de yää maa, tadinñemö aquiiyö que, tuna aashichaato que mmaja, tadiiñemö nudooto que mmaja, tauda madudaimä döaajäque mmaja, hisoopo que mmaja, jacudinmötö seweichatoque mmaja. ⁵³ Yääje yeichame, jata tö'cäi, jödoodo awä töwä'dödö'jo, nennoja'de tadiiñemö nudooto. Mädääje töwö conemjönö nencwannä'jaja'de, töcocca yeichö necanma'dede yää ä'sa. ⁵⁴ Edä yää cädäi soto junu chädäi'ñäneije yeichawä äwätä'se'toto'como, anejja mädä cädäi ejoodöjooneije naadö e'se'totoojo mmaja, tishi'ato'je weiñä mmaja, ⁵⁵ anejja cädäi mmaja, maa chädä'ñäjaicho owoomöcoomo chädäi'ñäjaicho mmaja. ⁵⁶ Töwaawojä'e weiñä ese'totoojo mmaja, tucunnujä'e weiñä e'se'totojo mmaja, töwäätudeejä'atoje weiñä jeiñenma, ⁵⁷ ecanmatoojoje yeichö wetä yaawä, cädäi äjichö'täjöönö je yeichö töwääjächö'tooto je yeichö jeiñemma, nossajje yeichö ecammatoojo mmaja yaawä.