5 ¹ Jəkakiy slimiɗ beslék, kúm məsi zlilihay! Tuwam, nəʼicam vur víyáhay məsa soko aŋgə kúm. ² zlili kumhay a ziʼam le, tiler a zuma zana kumhiy le. ³ ziy viya a ja slaliya atə dala kumhiy le. Ziy viya taŋ nana asa gi seydí aŋgə kúm, asa zuma ise vú kum kaɓa avu. Kə cikilaka zlili kum i hən ŋgə dəbahay. ⁴ kə wúrkaká məgər ŋgə məzliy məŋgumaka kúm guva kumhiy ta. Cənaka tuwiy taŋ! Ani ná, Tuwiy ŋgə məŋguma guva kumhay a duk le há ahur slimiɗ ŋgə Buyməsemuŋ məsi Gədaŋ-Tubiya. ⁵ Siifa kum ahur duniya kə zumaka le ahur wuya, kə gám goɗ kúm məwuɗám le, kə zlumburaka vú kumhiy le kaɓa ginuwhay vur hən ŋge slí ay. ⁶ Ke gakáŋ sariya le ŋgra bru jeŋŋa, kə kəɗaka le vagay. Naŋ, a slí huma avə kúm ta. ⁷ Sukum ɗuhay, ɓəsam ɓi há pas da Buy miya a mó le. Puraka mbru məhúv məra ɓəs ɓí so; ara kutuka yi ŋgə goɗ ŋgi guva naŋ zlé avə yam mupo tumbuŋ atə yam ŋgə dəba ndok. ⁸ kúm ko ná, ɓəsam ɓi aya, tumam mevel tám, vur Buy miya asa so gwe . ⁹ Sukúm ɗuhay, kənja ŋguzam mi awuzla kúm ta, vur ɓa Bimulvúŋ anja gakúm sariya ta. Ani, məgí sariya naŋ deŋ a miviŋ ndok. ¹⁰ Sukúm ɗuhay, supaka si sar ŋgə ɓəsa ɓi ŋgə mijiviɗhiy məɓám tə slimiɗ ŋgə Bimulvúŋ, ɓəsaka víyáhiy kaɓa ŋgə taŋ. ¹¹ Ani, ira ɓam, məzliy məɓusam nanahiy ná, Bimulvúŋ a ga táŋ sik le. Kə cənaká ɓí ŋgə ɓəsa ɓi ŋgə Jop məfún gədaŋ ná le, yo goɗ Bimulvúŋ məvulaŋ di adəba naŋm ko ná, kə sənaka le. Asə Bimulvúŋ a pur ircece a ɓus ta, a gi mézleŋ haɗiy. ¹² 12 Amá, məfún naŋ so ná sukúm ɗuhay, kənja hudumam ta, kó tə birŋgiŋ ŋgə múŋ data kó tə ruway. Kə hudumam kó tə goɗ ta. Anja haʼaw kúm a tri haʼaw, aʼa kúm ko ná, a tri aʼa ya; vur ɓa kə ndəɗam i sariya ŋgə Bimulvúŋ ta. ¹³ Mbru məra si víyá ada awuzla kúm ko? Anja a dər dibiɗ. Mbru məra mumul ada awuzla kúm ko? Anja zli dimis ŋgə gí sise. ¹⁴ Mɓru məsi jiji ada awuzla kúm ko? Anja zulo məzliy ŋgə mbuŋ zlama ŋgə mətəɓihay. A soko, a hərkaka Bimulvúŋ vur naŋ, a puyakáŋ mal tə slimiɗ ŋgə Buy miya. ¹⁵ Dəra dibiɗ tə təɓi ná, a ləha məsi jiji nana. Bimulvúŋ a mbulaŋ, da a gí muŋgraŋhiy le ada ko ná, Bimulvúŋ a bunaŋ taŋ vra. ¹⁶ Vur naŋ so ná, njikaka muŋgraŋ kumhay awuzla kúm, dəram dibiɗ awuzla kúm ma, ɓa kə mbulam. Dəra dibiɗ ŋgə mbru jeŋŋa ná, naŋ tə gədaŋ haɗiy. ¹⁷ Eli ko ná, naŋ i mbru ká miya. A hurdum ŋgə hərka Bimulvúŋ ɓa yam anja pó ta. Goɗ ŋgə vi maakər tə wurzlak yam á pow ta. ¹⁸ á dər dibiɗ ma ná, múŋ á pulow yam, goɗhiy a gam a ruwiy muŋ. ¹⁹ Sukúm ɗuhay! Da mbru kúm pal a ŋgizli le vri jiviɗ ŋgə jiire ná, anja mbru kúm pal a moodi muŋ. ²⁰ Sənaka sən sən : da mbru a moodi məsi muŋgraŋ le vri jiviɗ ŋgə zəzi ná, a ləha tə ləh vri muc, yo a sirtaŋ muŋgraŋhiy haɗiy ma.