1 ¹ I ya Zak, gawla ŋgə Bimulvúŋ atə ŋgə Buy Yesu Kristu. Irá jakúm haŋ, kúm súkúy ŋgə israyelhiy kurú ŋgaŋ ciw məsi məwuzləraŋ hərəŋhay ahur duniya. ̈̈ ² Sukúm ɗuhay, da kəra cuham tahur təkənhiy wal wal ná, mumulam haɗiy. ³ Vur kə sənaka le, wa təɓi kum aná, asa yi ɓəsa ɓí. ⁴ Amá, anja ɓəsa ɓí kum a bugo vú tə babaraŋ ɓla, ɓa kə tram məzliy təkeʼlehay, mənjina aslef, anja goɗ məkəc avə kúm anita. ⁵ Da sənjuliŋ a kəcaŋ le ŋgra mbru kúm pal ná, anja hərka Bimulvúŋ muvul goɗ tə mevel pal, mənjina mbəɗá hərəŋ avaŋ, asa vulaŋ di. ⁶ Amá, anja a hərkaŋ tə təɓi, mənjina wulək ciw cew. Vur mbru məra wulək ciw ciw ná, a bi vú atə dəɓel ŋgə yam aŋgə bulay məsi himiɗ məra wusaŋ atə məra zuɓaŋ paɗ paɗ aná. ⁷ Sukúy ŋgə mbru ká hana ná, anja wulək asa lum goɗ avə Bimulvúŋ ta. ⁸ Vur wulək naŋ məcəcaŋ déŋ pal ta; təɓi naŋ ko məcəcaŋ aŋgə jiviɗ pal ta ma. ⁹ Sukumóŋ vú məsi Bimulvúŋ məzuɓa le a muŋ ná, anja mumul. ¹⁰ Sukumóŋ vú məsi zlili ko ná, da Bimulvúŋ a pó di sar le a ruwiy ná, anja mumul aya. Vur asa cuh kaɓa mufuyuk ŋgə kukos. ¹¹ Da pas a jəɗo le, á ji le ná, kukos a muʼul, mufuyuk naŋhiy ko a pam, kukó naŋ tubiya a zəzi. Məsi zlili ko ná, asa zəzi kəna ya ahur slra naŋhay. ¹² Mbru məɓəs ɓí le ahur təkən ná, naŋ ahur mumul; vur adəba wí vú nana ná, asa lum manda ŋgə siifa məsi Bimulvúŋ məɓi asa vulatáŋ di ŋgra məzliy məra wuɗakahay. ¹³ Da təkən a lumá mbru le ná, anja ɓi ,,Bimulvúŋ a təkəniy le,, ta. Vur mbru a təkəna Bimulvúŋ tatiy ɓa ŋgə gí goɗ mézleŋta ta, naŋ tə hərəŋ naŋ a təkən mbru ta. ¹⁴ Amá, təkən asa ja mbru ná, síy da wuɗ ŋgə ise vú naŋ a ɗəɗá le ɗagay, a ja le. ¹⁵ Adəba naŋ ná, da wúɗ ŋgə ise vú nana, a gəl le ná, a yi muŋgraŋ. ¹⁶ Da muŋgraŋ ko a gəl le ná, a yi muc. Awulawa ɗuhay, kənja gakaŋ gələr ŋgra hərəŋ kuḿhiy ta. ¹⁷ Vúl mézleŋ atə vúl tikeʼle tubiya a so vra muŋ, a so vravə Bimulvúŋ məndəra goɗ məra puslɗamhiy ŋgə múŋ. Naŋ, a mbəɗi ta, musuɗuk ŋgə mbəɗi ko a gi a cakiy naŋ ta ma. ¹⁸ A vula miya siifa tə wúɗ naŋ, tə miŋgiɓi naŋ məsi kaslsla ná, ɓa i cəfam i liŋ cəfi məsi tumbuŋ, mbak goɗ məndəraŋhiy tubiya. ¹⁹ Awulawa ɗuhay, sənakaŋ! Anja mbru bám a juw vú ŋgə jəka slimiɗ, amá anja wus vú ŋgə ɓí ta ɓla, yo a gi mevel kutúm ta ma. ²⁰ Vur da mbru a gí mevel le ná, a gi wuɗ ŋgə Bimulvúŋ ta. ²¹ Vurnaŋ so ná, kərəham vravə ɓi ŋgə dile atə goɗ mézleŋtahiy tubiya. Miŋgiɓi məsi Bimulvúŋ məzləgáŋ ahur mevel kúm aná, təɓaka tə həna ay, vur miŋgiɓi nana, naŋ tə gədaŋ ŋgə ləhakúm. ²² Kə gakaŋ gələr ŋgra hərəŋ kúmhiy cummá muŋ ta. Anja kə cənaka miŋgiɓi ŋgə Bimulvúŋ tə cən ndok ta, amá gaka goɗ naŋ məra ɓakúm ma. ²³ Vur mbru bám, məra cəna miŋgiɓi ŋgə Bimulvúŋ, amá a ga goɗ məsi naŋ məra ɓi ta ná, a bí vú atə mbru məra pura rí naŋ ahur ɗoro, ²⁴ adəba naŋ məpurá rí naŋ le ná, a bi , da naŋ mbri mbrike ná, a piyik di hərəŋ ndok. ²⁵ Amá da mbru ara wunjəla Ɓimuɗuvaŋ ŋgə Bimulvuŋ məsi tikeʼle, məsi məpəsik məzliy ná, yo da ara jaŋ ahur mevel, a piyík di hərəŋ ta ma, amá ara ga goɗ naŋ məɓi le ná, mbru nana a lum sək ahur goɗ naŋ məra gahiy tubiya. ²⁶ Da mbru ara wulək kaɓa naŋ mbru ŋgə zuzuk, amá a kə alesl avə miŋgiɓi naŋ ta ná, zuzuk naŋ a trí le i goɗ ŋgataraŋ, yo a gáŋ slər le ŋgra hərəŋ naŋ. ²⁷ Goɗ məbuga zuzuk məsi kaslsla atə jeŋŋa ambuŋ Bimulvúŋ cine miya ná i hana: kə alesl tə mutúwáhay atə ŋgos wudigahay ahur gər taŋhay paɗ jəgəna hərəŋ naŋ ɓa goɗ ŋgə duniyahay a gaŋ dili ta.