¹ ''Utabeteki, kutegwa ayibo utakabetekwi. ² Kambo kokubeteka ko beteka, ayibo uyobetekwa, echipimo chopimya, ayibo chiyokupima. ³ Kambo nzi nolanga kakwaa kali mulinso lyo muzyalwa nyoko, kono toyeyi tanda lili mulinso lyako? ⁴ Inga wamba buti ku muzyalwa nyoko, 'Andiku gwisye kakwaa kali muli linso lyako,' kakuli tanda lili mulinso lyako? ⁵ Yebo osikupaupa! Sanguna kugwisya tanda mulinso lyako, pawo uyobona kabotu kugwisya kakwaa kali mulinso lyo muzyalwa nyoko. ⁶ Utapi echo cisalala ku babwa, ape tamwelede kusowa nsasiko zyenu kunembo lye ngulube. Kambo inga zyalya tokwa buyo, okukusandukila ponya kuku yawola muzipanzi. ⁷ ''Kumbila, pawo uyopegwa. Yandola, ape uyojana. Konkota, pawo uyojulilwa. ⁸ Kuli woonse ukumbila, ulatambula; uli woonse uyandola, ulajana; oku muntu ukonkota, uyo julilwa. ⁹ Na nguni wenu, kuti mwana akwe mwalumi wakumbila cinkwa, ulamupa bbwe? ¹⁰ Na kuti wakumbila nswi, ulamupa nzoka? ¹¹ Ino, kuti nywebo nobantu babi mulizi kupa zipo zibotu kubana benu, ino chilainda buti kuli Tata oku julu kupa zintu zibotu kuli abo bamukumbila? ¹² Kokuti anu, kufumbwa zintu zimuyanda kuti bantu bamuchitile, mwelede kubachitila zizyo anywibo, kambo oyu ngo mulawo aba sinsimi. ¹³ ''Njila mukalyango kamanikide. Kambo mulyango uli kwankwamukide, E nzila nimpati itola ku kunyonyoka, pawo mbanji bantu bainda muli njiyo. ¹⁴ Pele mulyango ulisyanikide e nzila niyumu itola ku buumi, pawo mbache baijana. ¹⁵ ''Amuchenjele aba sinsimi bobubeji, abo baza kuli nywebo muzibiya zye mbelele kakuli mukasimpe mbanyama bomusaka. ¹⁶ Mumichelo yabo muyo baziba. Ino bantu ninga bajana misansa kuzwa kuciteyo chobumvwa na nkuyu kuzwa ku mutube-tube? ¹⁷ Munzila njonya, musamu mubotu uzyala michelo mibotu, pele musamu mubi awe uzyala michelo mibi. ¹⁸ Musamu mubotu taukonzi kuzyala muchelo mubi, nokuba musamu mubi nukonzya kuzyala muchelo mubotu. ¹⁹ Kufumbwa musamu utazyali muchelo mubotu ula temwa okusowelwa mu mulilo. ²⁰ Pele ino, muyobaziba kwindila mumichelo yabo. ²¹ Tainsi bonse bamba kuli mebo kuti, 'Mwami, Mwami,' bayonjila mubwami boku julu, kono buyo abo bacita luyando lwa Tata uli ku julu. ²² Bantu banji bayoti kuli mebo mubuzuba buya, 'Mwami, Mwami, takwe nitwaka sinsima muzina lyako, muzina lyako twakatanda madaimona, ape muzina lyako twakacita milimo mipati?' ²³ Ponya cha ntangalala ndiyobambila, 'Takwe nindamwizi! Amuzwe kuli mebo, nywebo noba simucita zibi!' ²⁴ ''Ino, woonse umvwa majwi angu okwa chilila uyoba mbuli muntu musongo uyaka ng'anda yakwe atala E bbwe. ²⁵ Imvula yakaza, chilobe chakasika, E guwo lyaka bbubbula okuyuma ng'anda ilya, kono takwe niyakawa ansi, kambo yayakilidwe a bbwe. ²⁶ Pele kuli oyo umvwa majwi angu kata chilili uyoba anga mwalumi mufuba wakayaka ng'anda yakwe musese. ²⁷ Imvula yakawa, chilobe cakasika, E guwo lyaka bbubbula okuyuma ng'anda, pawo yakawa, ponya mamanino ayo ali mabi.'' ²⁸ Chakasika ciindi Jesu nakamana kwambola majwi aya, mbunga yabantu yaka komokwa kukwisya kwakwe, ²⁹ kambo wali kubaisya mbuli umwi wajesi nguzu, kwiinda balembi babo.