¹ Jehova wakambila Mozesi, wati, ² ''Layilila bantu bakwa Izilayeli kuti bakamwetele mafuta anchobeni akwumwa kuzwa ku Olivu kuti akabelesegwe kuchimunisyo, uchitila kuti mumuni uyinkilile anembo kumunika. ³ Aanze kwamulembo wechisitilizyo chachipulo chachizuminano, mung'anda yamuswangano, Aaloni uyelede kwimikila aanembo, kuzwa mansiku kuyosika kuseni, uyelede kukkala kaamunikide chimunisyo kunembo lya Jehova. Eechi chilaba chalyoonse kulunyungu lwabantu bako. ⁴ Mupayizi mupati uyelede kumunika zimunisyo kunembo lya Jehova, zimunisyo zili achimangiilo chawo changolida yakasimpe. ⁵ Muyelede kubweza busu bunante buziyidwe chakuzukila mpawo mujike zinkwa zilikkumi azibili anjiyo. Kuyelede kuba zyekkumi zyobile chimwi achimwi. ⁶ Kowabamba kuminchali ibili, zili musanu achimwi mumundando umwi , ajulu atebuli lyengolida yanchobeni kunembo lya Jehova. ⁷ Mwelede kubika tununkilizyo mumbali amindando yazinkwa kukwimikilila chipo. Tununkilizyo ootu tunotentelwa Jehova. ⁸ Muzuba lyoonse litegwa Sabata mupayizi mupati uyelede kubamba chinkwa kunembo lya Jehova kwimikilila bantu bakwa Izilayeli, mukutondezya chizuminano chitamani. ⁹ Chipo eechi chinoli cha Aaloni abana bakwe bechalumi, mpawo bayolyida kubusena busalala, nkambo nchaabilo chizwa kuchipo kuli Jehova chakachitwa amulilo.'' ¹⁰ Lino chakachitika mwana mulombe wamwanakazi mu Izilayeli, uula wisi wakali waku Ijiputi, wakaya akkati kabantu ba Izilayeli. Oyu mwana mulombe wamwanakazi mu Izilayeli mumusasa. ¹¹ Mwana mulombe wamwanakazi mu Izilayeli wakambula bubi azina lya Jehova alimwi wakamutuka Leza, aboobo bantu bakamutola kuli Mozesi. Banyina bakwe bakali kutegwa Selomiti, mwana wamwanakazi wa Dibbili, kuzwa kumukowa wa Dani. ¹² Bakamubamba muntolongo kusikila Jehova lwakwe wakwamba kuyanda kwakwe kulimbabo. ¹³ Mpawo Jehova wakambula Mozesi, wati, ¹⁴ ''Mubweze mwalumi wakatuka Leza mumugwisye aanze lyamusasa. Bonse aabo bakamumvwa bayelede kubika maboko aabo amutwe wakwe, mpawo choonse chibunga cheelede kumutulula. ¹⁵ Uyelede kuyopandulula kubantu ba Izilayeli ukatedi, ''Kufumbwa uyotukila Leza wakwe uyelede kubweza zibi zyakwe. ¹⁶ Ooyo uwambula bubi ezina lya Jehova uyelede kuti nchobeni wajayigwa. Yonseni mbungano iyelede kumutulula kitaleki, tazikwe kuti mwenzu tazwi muchisi kana kuti mwanamuzyale wamu Izilayeli. Kuti umwi wambula bubi ezina lya Jehova, uyelede kuti ajayigwe. ¹⁷ Ikuti umwi muntu wawuma muntunyina chakumujaya, uyelede kujiigwa. ¹⁸ Kuti naba umwi wawuma munyama wamuntu, chakumujaya ulelede kumubbadala, buumi kubuumi. ¹⁹ Kuti naba umwi wachisya simayakilane wakwe kuti chichitwe kulinguwe mbuli mbachita simayakilane wakwe. ²⁰ Kufuyuka kukufuyuka, linso kulinso, lino kulino. Mbuli mbwakamuchisa muntunyina, aboobo uyelede kuchitilwa alakwe mbuli mbwamuchitila. ²¹ Kufumbwa ujaya chinyama chamuntu uyelede kuchibbadela, mpawo kufumbwa wajaya muntu uyelede kujayigwa. ²² Mwelede kuba amulawu ukozyenie yaboonse beenzu amwana muzyale wamu Izilayeli, nkambo ndime Jehova Leza wenu.'' ²³ Aboobo Mozesi wakambila bantu bakwa Izilayeli, alimwi bantu bakagusya mwalumi aanze kumusasa, ooyo wakatukila Jehova. Bakamutulula amabwe. Bantu bakwa Izilayili bakabweza malayilile a Jehova baatola kuli Mozesi.