^{1 2} 1Nagsao ni Moises kadagiti panguloen dagiti tribu dagiti tattao ti Israel. Kinunana, "Daytoy ti imbilin ni Yahweh. 2No agsapata ti siasinoman kenni Yahweh, wenno agkari nga aramidenna ti maysa a banag, masapul a saanna a labsingen ti saona. Masapul a salimetmetanna ti karina nga aramidenna amin a rumuar iti ngiwatna. ^{3 4} 3No agsapata ti maysa a balasang nga agnanaed iti balay ti amana ken agkari kenni Yahweh ken ikarina nga aramidenna ti maysa a banag, 4no mangngeg ti amana ti insapata ken ti inkarina, ken no saan a waswasen ti amana ti insapatana, ket ingkapilitan nga aramidenna dagiti amin nga insapatana, ken ti tunggal inkarina ket masapul nga agtalinaed. ⁵ 5Ngem no iparit ti amana apaman a mangngegna maipanggep iti daytoy, saan a maipapilit nga agtalinaed dagiti inkarina wenno insapatana; pakawanento isuna ni Yahweh agsipud ta inparit ti amana a matungpal ti karina. ^{6 7} 6 No makiasawa isuna ti maysa a lalaki kalpasanna a nagsapata wenno nagkari a saanna a napuotan wenno inggagara, 7ket no mangngeg ti asawana maipanggep iti daytoy ngem awan ti makunana, ket dagiti sapatana ket agtalinaed, ken dagiti inkarina nga aramidenna ket masapol nga aramidenna. ⁸ 8Ngem no lapdan isuna ti asawana iti aldaw a mangngeganna ti maipapan iti daytoy, ket waswasenna ti insapatana, ti inkarina a saanna nga inamiris ti maipanggep iti daytoy, key wayawayaanto isuna ni Yahweh. ^{9 10 11} 9Ngem no maipapan met iti babai a balo wenno babai a nakisina iti asawana, ingkapilitan a tungpalenna amin ti inkarina. 10Ken no agsapata ti maysa a babai iti pamilia ti asawana—no agkari isuna nga addaan iti panagsapata, 11ket mangngeg ti asawana ti maipanggep iti daytoy ngem awan ti ibagana kenkuana--no saan a waswasen ti lalaki ti insapatana, ingkapilitan ngarud a tungpalenna dagiti amin nga insapatana, ken ti tunggal inkarina. ¹² 12Ngem no waswasen ti asawana dagitoy iti aldaw a mangngeganna ti maipanggep kadagitoy, ket aniaman a rimmuar iti ngiwatna maipanggep kadagiti sapatana wenno karina ket saanen nga ingkapilitan a tungpalenna. Winaswas dagitoy ti asawana ket wayawayaanto isuna ni Yahweh. ^{13 14} 13Tunggal isapata wenno ikari ti maysa a babai ket mabalin a pasingkedan wenno waswasen ti asawana. 14Ngem no awan ti ibaga ti lalaki kenkuana iti inaldaw, pasingkedanna ngarud dagiti amin nga insapatana wenno inkarina. Pinasingkedanna dagitoy gapu ta awan pulos ti imbagana kenkuana iti tiempo a nangngeganna dagitoy. ^{15 16} 15Ket no padasen ti lalaki a waswasen dagiti insapata ti asawana iti nabayagen a tiempo kalpasan a nangngeganna daytoy, ket isuna ti agsagaba kadagiti basol ti asawana." 16Dagitoy dagiti alagaden nga imbilin ni Yahweh kenni Moises nga iwaragawagna—dagiti alagaden para iti nagbaetan ti lalaki ken ti asawana ken ti nagbaetan ti ama ken ti anakna a babai no adda isuna iti kinaagtutubona iti pamilia ti amana.