^{1 2 3} 1Iti dayta a rabii, nagsangit iti napigsa dagiti amin a tattao. 2Inuyaw dagiti amin a tattao ti Israel da Moises ken Aaron. Kinuna dagiti tattao kadakuada, "Nataykami la koman idiay daga iti Egipto, wenno iti daytoy a let-ang! 3Apay nga impannakami ni Yahweh iti daytoy a daga a matay babaen iti kampilan? Agbalin a biktima dagiti assawa ken dagiti annakmi. Saan kadi a nasaysayaat nga agsublikami idiay Egipto?" ^{4 5} 4Kinunada iti tunggal maysa, "Mangpilitayo iti sabali a pangulo, ket agsublitayo idiay Egipto." 5Ket nagpaklebda Moises ken Aaron iti sangoanan dagiti amin a gimong dagiti tattao ti Israel. ^{6 7 8} 6Ni Josue nga anak a lalaki ni Nun ken ni Caleb nga anak a lalaki ni Jefone, a dadduma kadagiti naibaon a mangsukimat iti daga, ket rinay-abda dagiti badoda. 7Nagsaoda kadagiti amin a tattao ti Israel. Kinunada, "Ti daga a napananmi ken sinukimatmi ket nasayaat unay. 8No maay-ayo ni Yahweh kadatayo, ipannatayo ngarud iti daytoy a daga ket itedna daytoy kadatayo. Ti daga nga agay-ayus iti gatas ken diro. ^{9 10} 9Ngem saankayo nga agsukir kenni Yahweh, ken saankayo nga agbuteng kadagiti tattao iti daga, gapu ta kasla da taraon nga ibusentayo. Maikkatto kadakuada ti salaknibda, gapu ta adda kadatayo ni Yahweh. Saankayo nga agbuteng kadakuada." 10Ngem binutbuteng ida dagiti amin a tattao a batoenda ida agingga a matayda. Ket nagparang ti dayag ni Yahweh idiay tolda ti gimong kadagiti amin a tattao ti Israel. ^{11 12} 11Kinuna ni Yahweh kenni Moises, "Kasano pay kabayag ti panangumsi dagitoy a tattao kaniak? Kasano pay kabayag ti saanda a panagtalek kaniak, iti laksid dagiti amin nga inaramidko kadakuada a pagilasinan iti pannakabalinko? 12Darupek ida babaen kadagiti didigra, ikkatek dagiti tawidda, ket manipud iti pulim mangaramidak iti maysa a nasion a dakdakkel ken nabilbileg ngem isuda." ^{13 14} 13Kinuna ni Moises kenni Yahweh, "No aramidem daytoy, ket mangeg dagiti Egipcio ti maipanggep iti daytoy, gapu ta insalakanmo dagitoy a tattao manipud kadakuada babaen iti pannakabalinmo. 14Ibagadanto kadagiti agnanaed iti daytoy a daga. Nangngegda a sika, O Yahweh, ket adda kadagitoy a tattao, gapu ta nakitadaka iti rupan-rupa. Agtalinaed ti ulepmo iti ngatoen dagiti tattaomi. Umun-unaka ngem isuda babaen iti adigi nga ulep iti aldaw ken iti adigi nga apuy iti rabii. ^{15 16} 15Ita no patayem dagitoy a tattao a kas maysa a tao, ket kunaen to dagiti nasion a nakangngeg iti daytoy, 16'Gapu ta saan a maipan ni Yahweh dagitoy a tattao iti daga nga inkarina nga itedna kadakuada, pinatayna ida idiay let-ang.' ^{17 18 19} 17Ita, agpakpakaasiak kenka, ipakitam ti naindaklan a pannakabalinmo. Ta kinunam, 18"Saan a nalaka nga agunget ni Yahweh ken aglaplapusanan ti kinapudno iti ayatna. Pakawanenna ken ikkatenna dagiti pagbasolan dagiti nagbasol inton iyegna ti dusa ti basol dagiti kapuonanda kadagiti kaputotanda, iti maikatlo ken maika-uppat a henerasion.' 19Agpakaasiak kenka a pakawanem ti basol dagitoy a tattao gapu iti naindaklan a kinapudnom iti tulagmo, kas iti kanayon a panangpakawanmo kadagitoy a tattao manipud idi addada pay laeng idiay Egipto agingga ita." ^{20 21 22} 20Kinuna ni Yahweh, "Pinakawanko ida kas iti dinawatmo, 21ngem iti kinapudnona, iti panagbibiagko, ken kas mapunno iti dayagko ti entero a daga, 22amin dagiti tattao a nakakita ti dayagko ken dagiti pagilasinan iti pannakabalin nga inaramidko idiay Egipto ken idiay let-ang—sinuotdak latta dagitoy iti naminsangapulo ken saanda a dimngeg iti timekko. ^{23 24 25} 23Isu nga ibagak a sigurado a saandanto a makita ti daga nga inkarik kadagiti kapuonanda. Awan ti uray maysa kadakuada a nangumsi kaniak ti makakita iti daytoy, 24malaksid kenni Caleb nga adipenko, gapu ta adda sabali nga espirituna ken sipupuso nga sursurotennak. Ipankonto isuna iti daga a napanna sinukimat, ket tagikuaento daytoy dagiti kaputotanna. 25(Ita, agnanaed dagiti Amalekita ken Canaaneo idiay tanap.) Agsublikayo ken mapankayto inton bigat idiay let-ang babaen iti dalan nga agturong iti baybay dagiti Runo.” ^{26 27} 26Nagsao ni Yahweh kada Moises ken Aaron. Kinunana, 27"Kasano pay kabayag ti panangibturko kadagitoy a nadangkes a tattao a manguy-uyaw kaniak? Nangngegko dagiti panagrekreklamo dagiti tattao ti Israel kaniak. ^{28 29 30} 28Ibagam kadakuada, ‘Iti panagbibiagko—daytoy ti kinuna ni Yahweh—kas insaoyo iti panagdengngegko; aramidek to daytoy kadakayo: 29Mataykayonto iti daytoy a let-ang, aminkayo a nagreklamo maibusor kaniak, dakayo a nabilang iti sensus, ti sibubukel a bilang dagiti amin a tattao manipud iti agtawen iti duapulo ken agpangato. 30Awan duadua a saankayo a makastrek iti daga nga inkarik a pagnaedanyo, malaksid kenni Caleb nga anak a lalaki ni Jefone ken ni Josue nga anak a lalaki ni Nun. ^{31 32 33} 31Ngem ipankonto iti dayta a daga dagiti annakyo a kinunayo nga agbalin a biktima. Mapadasandanto ti daga a linaksidyo! 32No maipapan kadakayo, mataykayonto iti daytoy a let-ang. 33Agalla-allanto dagiti annakyo iti let-ang iti uppat a pulo a tawen. Rumbeng a lak-amenda dagiti supapak dagiti panagsukiryo agingga a patayen ti let-ang dagiti bagbagiyo. ^{34 35} 34Kas iti bilang dagiti aldaw idi sinukimatyo ti daga iti uppat a pulo nga aldaw, kasta met ti masapul a pananglak-amyo kadagiti supapak dagiti basolyo iti uppat a pulo a tawen—maysa a tawen para iti maysa nga aldaw, ken masapul a maammoanyo ti pagbanagan ti agbalin a kabusorko. 35Siak, ni Yahweh, ti nagsao. Awan duadua nga aramidek daytoy kadagiti amin a nadangkes a tattao a nagtitipon a sangsangkamaysa a maibusor kaniak. Maibusdanto nga intaraminti iti daytoy a let-ang, ken ditoydanto a matay.' " ^{36 37 38} 36Isu a dagiti lallaki nga imbaon ni Moises a mangkita iti daga, a nagsubli ken nagbalin a gapu tapno amin a tattao ket agreklamoda maibusor kenni Moises babaen iti panangipadamagda iti saan a nasayaat maipanggep iti daga—37dagitoy lallaki a nangipan iti saan a nasayaat a damag maipanggep iti daga ket natayda iti sangoanan ni Yahweh babaen ti didgra. 38Kadagiti lallaki a napan nangkita iti daga, ni laeng Josue nga anak a lalaki ni Nun ken ni Caleb nga anak a lalaki ni Jefone ti nagtalinaed a sibibiag. ^{39 40} 39Idi impadamag ni Moises dagitoy a sasao kadagiti amin a tattao ti Israel, nagladingitda iti kasta unay. 40Nasapada a bimmangon iti agsapa ket napanda iti tuktok ti bantay ket kinunada, "Kitaenyo, addatayo ditoy, ket mapantayo iti lugar nga inkari ni Yahweh, ta nagbasoltayo." ^{41 42 43} 41Ngem kinuna ni Moises, "Apay a salsalungasingenyon ita dagiti bilin ni Yahweh? Saankayo nga agballigi. 42Saankayo a mapan, gapu ta awan kadakayo ni Yahweh a manglapped iti pannakaparmekyo kadagiti kabusoryo. 43Adda sadiay dagiti Amalekita ken Cananeo, ket mataykayonto babaen kadagiti kampilan gapu ta timmalikodkayo manipud iti panangsursurotyo kenni Yahweh. Isu nga awanto isuna kadakayo." ^{44 45} 44Ngem pinilitda latta iti sumang-at iti katurturodan a pagilian; nupay kasta, saan a pimmanaw ni Moises wenno ti lakasa ti tulag ni Yahweh iti kampo. 45Ket simmalog dagiti Amalekita, kasta met dagiti Cananeo nga agnanaed kadagitoy a turturod. Rinautda dagiti Israelita ket pinarmekda ida agingga idiay Horma.