¹ Si Pablo, usa ka apostoles ni Cristo Jesus pinaagi sa kabubut-on sa Dios, ug si Timoteo nga atong igsoon, ² ngadto sa mga balaang katawhan sa Dios ug matinud-anon nga mga kaigsoonan diha kang Cristo nga anaa sa Colosas. Ang grasya maanaa kaninyo, ug ang kalinaw nga gikan sa Dios nga atong Amahan. ³ Kami naghatag ug mga pagpasalamat sa Dios, ang Amahan sa atong Ginoong JesuCristo, ug kanunay kaming nag-ampo alang kaninyo. ⁴ Nadungog namo ang inyong pagtuo kang Cristo Jesus ug ang gugma nga anaa kaninyong tanan alang niadtong gigahin alang sa Dios. ⁵ Aduna kamoy gugma niini tungod sa masaligong paglaom nga gitagana alang kaninyo sa kalangitan. Nakadungog kamo mahitungod niining masaligong paglaom sa wala pa ang pulong sa kamatuoran, ang ebanghelyo, ⁶ diin miabot nganha kaninyo. Kini nga ebanghelyo naghatag ug bunga ug nagtubo sa tibuok kalibotan. Nagapamuhat na usab kini diha kaninyo gikan sa adlaw nga inyong nadungog kini ug nakakat-on mahitungod sa grasya sa Dios diha sa kamatuoran. ⁷ Mao kini ang maayong balita nga inyong nakat-onan gikan kang Epafras, ang atong hinigugmang isigka-ulipon, nga usa ka matinumanong alagad ni Kristo alang kanato. ⁸ Gipahibalo kanamo ni Epafras ang inyong gugma diha sa Espiritu. ⁹ Tungod niini nga gugma, gikan sa adlaw nga nadungog namo kini wala kami mihunong sa pag-ampo alang kaninyo. Naghangyo kami nga pun-on kamo uban sa kahibalo sa iyang kabubut-on sa tibuok kaalam ug espirituhanong pagsabot. ¹⁰ Naga-ampo kami nga magalakaw kamo nga takos sa Ginoo diha sa makapahimuot nga mga pamaagi. Naga-ampo kami nga kamo magapamunga sa matag maayong buhat ug magatubo kamo diha sa kahibalo sa Dios. ¹¹ Naga-ampo kami nga magmalig-on kamo sa matag abilidad sumala sa gahom sa iyang himaya ngadto sa tanang pagkamalahutayon ug pagpailob. ¹² Naga-ampo kami nga kamo magmalipayon nga magahatag og pagpasalamat ngadto sa Amahan, nga naghimo kaninyo nga takos nga makaangkon og bahin sa kabtangan sa mga magtutuo diha sa kahayag. ¹³ Siya nagluwas kanato gikan sa pagdumala sa kangitngit ug nagbalhin kanato ngadto sa gingharian sa iyang hinigugmang Anak, ¹⁴ kang kinsa kita adunay katubsanan, ang kapasayloan sa mga sala. ¹⁵ Siya mao ang hulagway sa dili makita nga Dios, ang kamagulangan sa tanan nga binuhat. ¹⁶ Kay diha kaniya ang tanang butang nabuhat, kadtong anaa sa kalangitan ug kadtong anaa sa kalibotan, ang makita ug ang dili makita nga mga butang. Bisan ang mga trono o pagdumala o ang mga panggamhanan o ang mga adunay awtoridad, ang tanang mga butang nabuhat pinaagi kaniya ug alang kaniya. ¹⁷ Siya anaa na sa wala pa ang tanang butang, ug kaniya ang tanang butang nahiusa. ¹⁸ Ug siya mao ang ulo sa lawas, ang simbahan. Siya ang sinugdanan ug ang kamagulangan gikan sa mga patay, busa siya ang una taliwala sa tanang mga butang. ¹⁹ Kay ang Dios nahimuot nga ang kinatibuk-an niya nabuhi diha kaniya, ²⁰ ug aron sa pagpasig-uli pinaagi sa Anak ang tanang mga butang alang kaniya. Ang Dios naghimo ug kalinaw pinaagi sa dugo sa iyang krus. Ang Dios nagpasig-uli sa tanang butang sa iyang kaugalingon, bisan ang mga butang sa kalibotan o ang mga butang sa langit. ²¹ Ug kamo usab, sa usa ka higayon, mga dumuduong sa Dios ug iyang mga kaaway sa hunahuna ug sa daotang mga binuhatan. ²² Apan karon gipasig-uli niya kamo pinaagi sa iyang tawhanong lawas pinaagi sa kamatayon. Gibuhat niya kini aron sa pagpresentar kaninyo nga balaan, walay ikasaway, ug walay kaulaw sa iyang atubangan, ²³ kung mapadayonon kamo diha sa pagtuo, natukod nga lig-on, dili matarog gikan sa paglaom sa maayong balita nga inyong nadungog. Mao kini ang maayong balita nga gimantala sa matag-usa nga binuhat ubos sa langit. Mao kini ang maayong balita diin ako, si Pablo, nahimong usa ka alagad. ²⁴ Karon ako nagmaya diha sa akong mga pag-antos alang kaninyo, ug gipuno ko sa akong unod ang nakulang sa mga kasakit ni Cristo alang sa iyang lawas, nga mao ang simbahan. ²⁵ Mao kini ang simbahan nga ako usa ka alagad, sumala sa kaakuhan gikan sa Dios nga gihatag kanako alang kaninyo, aron matuman ang pulong sa Dios. ²⁶ Kini mao ang tinago nga kamatuoran nga gitago sulod sa mga katuigan ug sa mga kaliwatan apan karon gipadayag na ngadto sa mga balaan sa Dios. ²⁷ Ngadto kanila buot sa Dios nga ipahibalo ang kadagaya sa himaya niining tinago nga kamatuoran sa taliwala sa mga Gentil, nga mao si Cristo anaa kaninyo, ang paglaum sa himaya. ²⁸ Among gimantala siya, nga nagatambag ug nagatudlo sa tanan uban sa tanang kaalam, aron among ikapresentar ang matag-usa ka tawo nga hamtong diha kang Cristo. ²⁹ Kay alang niini naghago ug naningkamot ako sumala sa iyang kusog nga nagapamuhat kanako diha sa gahom.