¹ Nakita ko ang Ginoo nga nagtindog kilid sa halaran, ug miingon siya, "bunali ang tumoy sa mga haligi aron nga matay-og ang mga patukuranan. Dugmuka sa pino aron mahulog kini sa ilang mga ulo, ug patyon ko ang nahibilin kanila pinaagi sa espada. Walay usa kanila ang makalingkawas; ug walay usa kanila nga makaikyas. ² Bisan pa ug mokalot sila paingon sa Seol, kuhaon ko gihapon sila sa akong mga kamot. Bisan pa ug mosaka sila sa langit, pakanaogon ko gihapon sila. ³ Bisan pa ug motago sila sa tumoy sa bukid sa Carmel, pangitaon ko sila didto ug kuhaon. Bisan pa ug motago sila gikan sa akong panan-aw ngadto sa kinahiladman sa dagat, mandoan ko didto ang mga bitin ug mopaak kini kanila. ⁴ Bisan pa ug pangbihagon sila, sa ilang mga kaaway nga naggukod kanila, mandoan ko ang mga espada, ug mopatay kini kanila. Itutok ko ang akong mga mata kanila alang sa kadaotan ug dili sa kaayohan." ⁵ Ang Ginoo si Yahweh sa panon naghikap sa yuta ug natunaw kini; nagbangotan ang tanang nagpuyo niini; motungha ang tanan niini sama sa suba, ug mounlod pag-usab sama sa suba sa Ehipto. ⁶ Siya kining nagbuhat sa iyang lakang sa kalangitan, ug nagbuhat sa iyang lawak sa kalibotan. Gitawag niya ang mga tubig sa kadagatan, ug gibubo kini ibabaw sa kalibotan, Yahweh ang iyang ngalan. ⁷ "Dili ba kamo sama sa katawhan sa Cush alang kanako, katawhan sa Israel? — mao kini ang pahayag ni Yahweh - Wala ko ba gipalingkawas ang Israel gikan sa yuta sa Ehipto, ang mga Filistihanon gikan sa Crete ug ang Armenianhon gikan sa Kir? ⁸ Tan-awa, ang mata sa Ginoo nga si Yahweh anaa sa makasasala nga gingharian, ug laglagon ko kini gikan sa dagway sa kalibotan, gawas lamang sa banay ni Jacob nga dili ko laglagon sa hingpit — mao kini ang pahayag ni Yahweh. ⁹ Tan-awa, ihatag ko ang mando, ug tay-ogon ko ang panimalay sa Israel taliwala sa tanang kanasoran, sama sa usa ka pag-ayag sa trigo sa ayagan, aron nga walay mahulog bisan labing gamay nga bato ngadto sa yuta. ¹⁰ Mamatay ang tanang makasasala nga akong katawhan pinaagi sa espada, kadtong miingon nga, ''Ang katalagman dili mag-una o makigkita kanato .' ¹¹ Nianang mga adlawa tukuron ko ang tolda ni David nga napukan, ug ayohon ang mga pader. Tukuron ko ang mga naguba, ug tukuron ko kini pag-usab sama sa nangaging mga adlaw, ¹² Aron nga ilang maangkon ang kabilin sa Edom, ug ang tanang nasod nga gitawag sa akong ngalan — mao kini ang pahayag ni Yahweh— gihimo niya kini. ¹³ Tan-awa, moabot ang mga adlaw—mao kini ang pahayag ni Yahweh — Sa dihang ang magdadaro makaapas sa mangangani, ug ang mga tigpuga sa bino makaapas kaniya nga nagpugas sa binhi. Ang kabukiran magpatulo ug tam-is nga bino ug modagayday kini sa tanang kabungtoran. ¹⁴ Dad-on ko pagbalik gikan sa pagkabihag ang akong katawhan sa Israel. Tukoron nila ang nagun-ob nga mga siyudad ug puy-an kini, magtanom sila ug mga paras ug manginom sa mga bino niini, ug maghimo sila ug mga tanaman ug mangaon sa mga bunga niini. ¹⁵ Itanom ko sila sa ilang mga kayutaan, ug dili na gayod sila pagaibton pa gikan sa yuta nga akong gihatag kanila," nag-ingon si Yahweh nga imong Ginoo.