¹ Mahitungod sa pag-alagad alang sa mga balaan sa Dios, dili na kinahanglan nga sulatan ko pa kamo. ² Nasayod ako sa inyong tinguha, nga akong gipasigarbo didto sa katawhan sa Macedonia. Ako silang giingnan nga ang Acaya nakaandam na sukad niadtong miaging tuig. Ang inyong kamatinguhaon maoy nakapadasig sa kadaghanan kanila aron molihok. ³ Karon akong gipadala ang atong mga kaigsoonan aron nga ang among pagpasigarbo bahin kaninyo dili makawang, ug aron nga kamo mangandam, ingon sa akong giingon nga angay ninyong buhaton. ⁴ Kay kung dili, kung adunay taga-Macedonia nga mouban kanako ug makaplagan nga dili kamo andam, maulawan kami — wala akoy ikasulti bahin kaninyo —kay nagsalig ako pag-ayo diha kaninyo. ⁵ Busa naghunahuna ako nga gikinahanglan ang pagdasig sa mga kaigsoonan aron nga moanha diha kaninyo ug aron makigsabot pag-una alang sa mga gasa nga inyong gisaad. Aron nga kini maandam na ingon nga usa ka panalangin, ug dili ingon nga usa ka butang nga gipangayo. ⁶ Ang tumong mao kini: Ang usa nga diyutay ra ang gitanom, diyutay ra usab ang paga-anihon, ug ang usa nga nagatanom alang sa katuyoan sa usa ka panalangin maga-ani usab ug usa ka panalangin. ⁷ Pasagdi nga ang matag usa mohatag sumala sa giplano sa iyang kasingkasing. Ayaw siya pahataga nga magul-anon o napugos. Kay ang Dios nahigugma sa tawong malipayong naghatag. ⁸ Ug ang Dios makahimo sa pagpadaghan sa tanang grasya alang kaninyo, aron, sa tanang panahon, makabaton kamo sa tanan ninyong gikinahanglan. Kini mahitabo aron madugangan ninyo ang tanang maayong buhat. ⁹ Mao kini sumala sa nahisulat na: "Giapod-apod na niya ang iyang kabtangan ug gihatag na niya kini sa mga kabos. Ang iyang pagkamatarong molungtad hangtod sa kahangtoran." ¹⁰ Siya nga naghatag sa binhi sa magpupugas ug tinapay alang sa pagkaon magasangkap usab ug magapadaghan sa inyong binhi alang sa pagpugas. Padaghanon pa niya ang ani sa inyong pagkamatarong. ¹¹ Kamo pagapalamboon sa matag paagi aron nga kamo magmanggihatagon. Modala kini ug pagpasalamat ngadto sa Dios pinaagi kanato. ¹² Kay ang pagbuhat niini nga pag-alagad dili lamang makatagbaw sa mga panginahanglan sa mga balaan sa Dios, kondili nagaawas usab kini ngadto sa daghang mga buhat sa pagpasalamat sa Dios. ¹³ Tungod kay kamo nasulayan ug napamatud-an pinaagi niini nga pag-alagad, kamo usab magahimaya sa Dios pinaagi sa pagkamasinugtanon sa inyong pagsugid sa Maayong Balita ni Cristo. Inyong himayaon usab ang Dios pinaagi sa pagkamanggihatagon sa inyong gasa ngadto kanila ug sa tanan. ¹⁴ Sila nangandoy kaninyo, ug sila nag-ampo alang kaninyo. Gibuhat nila kini tungod sa dakong grasya sa Dios nga anaa kaninyo. ¹⁵ Hinaot ang pagpasalamat ngadto sa Dios tungod sa iyang dili matukib nga gasa!