¹ Kini mao ang ikatulong higayon nga moanha ako kaninyo. "Ang matag akusasyon kinahanglan mapamatud an pinaagi sa duha o sa tulo ka mga saksi." ² Miingon na akong daan niadtong mga nakasala kaniadto ug sa tanan sa dihang anaa ako sa ikaduha nga higayon, ug isulti ko kini pag-usab: Sa akong pagbalik, dili sila makalingkawas. ³ Gisulti ko kini kaninyo tungod kay nangita kamo ug pagpamatuod nga si Cristo nakigsulti pinaagi kanako. Dili siya huyang nganha kaninyo. Hinuon, gamhanan siya diha kaninyo. ⁴ Kay gilansang siya sa krus tungod sa kahuyang, apan nabuhi siya pinaagi sa gahom sa Dios. Kay kita usab huyang diha kaniya, apan mabuhi kita uban kaniya pinaagi sa gahom sa Dios nga anaa na kaninyo. ⁵ Susiha ang inyong kaugalingon aron nga makita kung kamo anaa na ba sa pagtuo. Sulayi ang inyong kaugalingon. Wala ba kamo makaamgo niini bahin sa inyong kaugalingon, nga si Jesu-Cristo anaa kaninyo?—gawas kon, siyempre, kamo napakyas sa pagsulay. ⁶ Ug masaligon ako nga inyong makaplagan nga kami giuyonan. ⁷ Karon nag-ampo kami sa Dios aron nga dili na kamo makahimo ug bisan unsang sayop. Wala ako mag-ampo aron nga maipakita nga milampos kami sa pagsulay. Hinuon, nag-ampo ako nga kamo magbuhat kung unsa ang husto, bisan kami daw napakyas sa maong pagsulay. ⁸ Kay wala kami mahimo sa pagbuhat sa bisan unsang batok sa kamatuoran, kondili alang lamang sa kamatuoran. ⁹ Kay nagmaya kami sa dihang kami huyang ug lig-on kamo. Nag-ampo usab kami nga kamo mahingpit. ¹⁰ Gisulat ko kining mga butanga samtang halayo ako kaninyo, aron nga sa dihang makauban ko na kamo dili na ako makapasakit batok kaninyo. Dili ko buot gamiton ang katungod--- nga gihatag sa Ginoo kanako aron sa pagtukod kaninyo ug dili sa paglumpag kaninyo. ¹¹ Sa kataposan, pagmaya, mga kaigsoonan! Pagbuhat alang sa pagpasig-uli, pagdinasigay, pagsinabtanay sa usag-usa, pagpuyo diha sa kalinaw. Ug ang Dios sa gugma ug kalinaw maanaa uban kaninyo. ¹² Abi-abiha ang matag-usa uban ang balaang halok. ¹³ Nangumusta kaninyo ang tanang katawhan sa Dios. ¹⁴ Ang grasya sa atong Ginoong Jesu-Cristo, ang gugma sa Dios, ug ang pakig-ambit sa Balaang Espiritu maanaa kaninyong tanan.