¹ Tô ny niantomboahan'ny vaovao maharavoravon'i Jesôsy Kristy, lehy Zanaka Zagnahary. ² Araka zay voasaoratra akao amin'Isaia mpagnazary hoe : " tô, Zaho magniraka irakanaha handaiha alohaka Anao, lehy araiky hagnajary lalagnanao. ³ Misy feo regny magnantso mafy agny antany maty hoe: " atôvo vôgnogno lalagna Tompo; atôvo mahitsy lalagna himboany.'' ⁴ Avy Jaona, nagnano batisa tagny antany maty avakeo nagnambara ny batisan'ny fifônagna ho amin'ny famotsora-keloka nohon'ny fahadisoagna. ⁵ Ny tanin'ny Jodia jiaby ndraiky mponigny jiaby ao Jerosalema dia avy nagnatogno azy. Natany batisa tao amin'ny matsabôrin'ny jordana zareo, koafa nagneky ny fahadisoany. ⁶ Jaona dia nisikigny lamba volomparasy avakeo nagnano fehimbôko hôditry tagnandilany, aveo mendry ndraiky antely no nihoaniny. ⁷ Nivaolagna izy hoe: " Misy araiky hoavy fagnaraka zaho lehy mafy mihoatra zaho, aveo tsy magnaiva zaho na dia hamaha tadinkirarony aby. ⁸ Zaho nagnano batisa areo tamin'ny rano, fao Izy ndraiky hagnano batisa areo amin'ny Fagnahy Masigny.'' ⁹ Tamin'ny reo andro navian'i Jesôsy avy agny Nazareta tao Galilia no niboaka zany, avakeo natan'i Jaona batisa tamin'ny matsabôrin'ny Jordana Izy. ¹⁰ Koafa niboaka tamin'ny rano Jesosy, dia hitany nisaokatra ny langitry aveo nijôtso taminazy mitôvy amin'ny pizigny ny Fagnahy. ¹¹ Aveo nisy feo avy tagny andangitry nagnano hoe: "Anao no Zanako tiako. Anao no foky." ¹² Avakeo dia nitahômin'ny Fagnahy handaiha agny an-tanimaty Jesôsy. ¹³ Efapôlo andro Izy tagny an-tany maty, nalain'ny masantôko totry. Nipaitraka niaraka tamin'ny bibidia Izy, aveo nanompo Azy reo anjely. ¹⁴ Koafa voasambotra Jaona, dia avy tao Galilia Jesôsy nagnambara ny vaovao maharavon-Jagnahary, ¹⁵ avakeo nivaolagna hoe: "Afa avy ny fotoagna, aveo afa marikitry ny fanjakagnan-Jagnahary. Mifonào dia mankatoava ny vaovao maharavo." ¹⁶ Koafa nandaiha tagny nagnôlotro matsabôrin'i Galilia Izy, dia nahita an'i Simona ndraiky Andrea rahalahin'i Simona nagnarato, satria mpagnarato zareo. ¹⁷ Nivoalagna Jesôsy tamin-jareo : "Avià, magnaraha Zaho, fao ataoko mpagnarato ôlogno areo.'' ¹⁸ Samby teo dia nagnambaila harato zareo kay nagnaraka Azy. ¹⁹ Koafa nandaiha lavidavitry Jesôsy, dia nahita an'i Jakoba zanaka Zebedio ndraiky Jaona rahalahiny; tagnaty lakagna nagnamboatra ny harato. ²⁰ Nagnantso zareo Izy ka dia nilahaosany tagnaty lakagna samy teo Zebedio babany niaraka tamin-jareo mpikarama, kay nizôhy Azy zareo. ²¹ Avakeo dia homby tagny kapernaomy zareo, ary tamin'ny andro Sabata, dia nitsôfotro tamin'ny synagoga Jesôsy ary nampianatra. ²² Variagna tamin'ny fampianarany zareo, satria nampianatra zareo mitôvy amin'ny ôlogno managna fahefagna Izy fao tsy karaha reo mpanaoratra lalàgna. ²³ Aveo nisy lalahy araiky tamin'ny sinagogan-jareo zay nanagna fagnahy ratsy nangaiky mafy, ²⁴ nagnano hoe: " Ino moa hifandraisanay aminao, ry Jesôsy avy akagny Nazareta? Avy hagnapotiky zahay moa Anao? Haiko hoe zôvy anao. Anao lehy Masin-Jagnahary!" ²⁵ Nivaolagna mafy ny masantôko Jesôsy kay nagnano hoe: " Mangina aveo mialao aminazy!" ²⁶ Ary ny fagnahy ratsy nandavo azy ndraiky niboaka taminazy kay nagnantso tamin'ny feo mafy. ²⁷ Gaga ny ôlogno jiaby, kay nifagnontany zareo hoe: '' Ino tô? Fampianaragna vaovao misy fahefagna? Bikony na dia fagnahy ratsy aby aveo magneky Azy zareo!'' ²⁸ Ny vaovao mahakasiky Azy dia nipariaka tany jiaby tagny tamin'ny faritry Galilia jiaby. ²⁹ Koafa avy niboaka ny synagoga, dia homby tantragnon'i Simona ndraiky Andrea zareo, niarak tamin'i Jakoba ndraiky Jaona. ³⁰ Ary ny rafozam-bavin'i Simona nandry nararin'ny tazo, kay nivolagnin-jareo tamin'i Jesôsy ny mahakasiky azy. ³¹ Dia nagnatogno Izy, kay nanambotro azy tamin'ny tagnany, aveo nagnako azy; dia niala ny tazony, ary nanomboko nanompo Azy zareo. ³² Tamin'io aligny io, tafaran'ny maty masaova, dia nihentin-jareo tamin'Azy lehy marary jiaby na misy masantôko. ³³ Tafivory niaraka teo am-baravaragna ny tao antanagna jiaby. ³⁴ Nampahivagna ôlogno fôntry lehy nararin' ny aretigny maro isan-karazany Izy ary nandroaka masantôko maro, fao tsy nambailany hivaolagna reo masantôko satria nahay Azy zareo. ³⁵ Nonjonkiaka Izy, tamin'ny andro mbôla mahizigny; niala teo Izy kay nandaiha tagny amin'ny toeragna mitokagna ary teo Izy no nivavaka. ³⁶ Nizaha Azy Simona ndraiky lehy niaraka taminazy. ³⁷ Nahita Azy zareo ary nivolagna hoe: " Mizaha Anao ny ôlogno jiaby." ³⁸ Nivaolagna Izy hoe : "Alôhy atsika handaiha amin'ny toairagna hafa, agny ambailany ao amin'ny reo tanàgna magnodidigny, mbô ahavitako mitory teny agny koa. Fa zany no antony niboahako tatô." ³⁹ Dia nitety an'i Galilia jiaby Izy, nitory teny tao amin'ny synagogan-jareo salakady nandroaka masantôko maro. ⁴⁰ Nisy boka araiky avy Taminazy. Nitalaho Taminazy izy; nandongoalitry teo Aminy aveo nivaolagna taminazy hoe: "Izy koa mety Aminao, dia afaka magnadio zaho Anao." ⁴¹ Naforaigny azy Izy, dia namavatra ny tagnany Jesôsy ary nikasiky azy, nivaolagna taminazy hoe: "Mety. Madiova anao." ⁴² Niala taminazy samby teo ny habokagna,ary nadio izy. ⁴³ Nampitandrigny mafy azy Jesôsy aveo nagnandaifa azy. ⁴⁴ Nivaolagna Izy taminy hoe: "Tandremo tsy hivaolagna na ino na ino amin-jôvy na amin-jôvy anao, fao mandihiana, amboaho amin'ny mpisôrogno ny taignanao, aveo magnanaova fagnatitry nohon'ny fagnadiovagna anao araka ny nandidian'i Mosesy, mbô ho fijoroagna vavolombelogno amin-jareo." ⁴⁵ Fao niboaka izy ary nanomboko nagnambara tamin'ôlogno jiaby ndraiky nagnapariaka loatra ny volagna kay tsy afaka nitsôfotro an-kalalahagna tagny amin'ny tanàgna jiaby eky Jesôsy. Kay nipaitraka tagny ambailany amin'ny toairagna mitaokagna Izy avakeo nagnatogno Azy ny ôlogno avy amin'ny toairagna jiaby.